掃呢頁CODE去手機

2014年8月8日 星期五

[忽然1周 993] 《沒女》造假維穩 網民踢爆嗌罷睇 沒女,MW,




媽咪姐

《沒女》造假維穩 網民踢爆嗌罷睇

以前媽咪姐睇《我是歌手》、《中國好聲音》等等內地綜藝節目,見到參賽者例牌好激動咁多謝評判,跟住鏡頭一轉,現場觀眾竟然喊到成面眼淚㖭呀!嘩,假得你吖。點知,依家唔覺意,睇咗大台嘅《沒女大翻身》,媽咪姐只覺得,真係打到嚟喇!

首先,大台繼《盛女》、《求愛》後,又搵女性嚟做負面標籤,話搵咗 7個沒樣、沒身材、沒學識嘅素人「沒女」嚟個半年大改造。查實完全以人身攻擊手法,將參賽者踩到體無完膚,公審咩!不過,最「體貼」觀眾嘅,都係要參賽者重演番啲所謂嘅「傷心時刻」,「對白」精警到度都冇咁準,仲喊住拍喎。媽咪姐只可以講,大家又幾好戲噃。大台啲姐仔,分分鐘拍喊戲都無咁多眼淚

所以好多網民一睇完,就覺得事有蹺蹊,「高登神探」即刻做嘢,唔使 24小時就發現節目中嘅聲音形態導師 Eva,今年 5月帶新移民參賽者阿銀,拎住大台咪牌去採訪驅蝗示威。仲話佢哋疑似做內鬼。

媽咪姐同班好姊妹都有做嘢㗎!發現阿銀原來早喺《沒女》誓師大會之前 5個月已經上緊導師 Eva私人開嘅課程,即係兩個原來一早就識!當時阿銀個 look其實無電視上睇咁娘㖭,成件事有冇人設計過?大家話嘞。依家仲陸續有網民放新料上網,爆《沒女》造假㖭。

不過,有更多網民企出嚟,叫大家罷睇唔好 share!用行動向低質素洗腦節目 say no。無錯,無視係最有力嘅抗議,媽咪姐就講埋呢次,大家自己判斷吓喇!

自稱落咗香港 6年嘅阿銀,喺誓師大會上,講到話俾人歧視,眼淚鼻涕出晒。只係奇怪佢情緒咁激動都完整講到中港矛盾,仲加埋洗腦元素,度都無咁準喎!難怪網民話假啦。

罷睇聯盟

對於內地嘅造假維穩風氣入侵,網民開 post話要當呢啲節目唔存在,唔理唔睇唔 share,網民一呼百應!

大台將幾位參賽者定位為沒樣沒身材沒學識,慘無人道!網民就為佢哋配對咗相似嘅卡通人物,同埋……小儀?!好彩,都幾 cute。

踢假事件簿——阿銀篇

即日踢爆

大台自稱搵咗成班素人「沒女」嚟大改造,但「高登神探」周一踢爆係做假。指今年 5月,導師 Eva帶住新移民阿銀去遊行,仲俾埋貼住大台嘅咪牌佢訪問反蝗遊行人士。成件事有晒鋪排,維穩到呢。

導師死撐

見到網上群情洶湧, Eva即刻喺自己網頁留言話所有人和事都好真實。只可講,假的真不了。

一早就識

上年 9月,阿銀已經出現喺 Eva嘅公司課程上,乜兩個原來喺開拍《沒女》 8個月前已經識㗎喇? Eva仲話呢班學生夠 chok㖭。

咁快 friend咗?

節目嘅誓師大會喺 2月舉辦,但睇吓下圖。阿銀今年 2月情人節嗰陣,就去咗 Eva公司春茗。咦,咁快 friend咗嘅?

再踢極品 Meggie

先有網民留言話 Meggie嘅背景係假,跟住有人竟然記得佢上過蘇民峰節目,仲 post埋條 link,又一「打假」力作!

2008年蘇民峰師傅為有線主持《峰生水起》節目, Meggie就用陳美嫻個名睇相,師傅仲話佢有 5、 6條婚姻線,唔似佢講自己只拍過 1次拖喎。



鍾意就快D Share啦!