掃呢頁CODE去手機

2014年8月22日 星期五

[忽然1周 995] 富二代反佔中 佔中,政治時事,MW,




何超盈同林心兒舉住香港菁英會橫額嚟行,兩個笑口噬噬、舉 V字手勢,開心到去嘉年華咁款。

媽咪姐

富二代反佔中

啱啱過去咗嘅星期日( 17日),有大堆公公、婆婆 join咗反佔中團,

出動去食飯、遊中環。除咗大班老人家,原來當日大會指嘅 19幾萬人之中,亦有唔少富二代稀客,佢哋各自代表自己團體現身,拎埋旗仔、橫額高調咁行,希望呢班富二代真係領悟到咩叫反佔中,唔好見人行就行。

何超盈做大家姐

邊個話賭王四房女何超盈一定夜晚出沒。近年幫阿媽梁安琪打理酒店、又會去北京進修國情教育嘅超盈,就多咗唔少日間活動。星期日佢就拉大隊,同班 friend去玩遊行。唔知千金小姐係咪覺得呢個活動好新鮮,見佢親手拎橫額,邊行邊影相,好 happy啫!

何超盈同林心兒極好姊妹,兩個經常孖住周圍玩。

近年喺國家行政學會進修國情教育嘅超盈,今次拉大隊出動,好有領隊 feel喎!

何猷啟四圍宣傳

平日鍾意便裝打扮嘅猷啟(右一),索性着住政協青年聯會嘅衫,帶 friend遊山頂。

賭王何鴻燊家族出動遊行唔止超盈一個,三房仔何猷啟亦有份參與。今年做咗政協青年聯會副會長嘅猷啟,耐唔耐就出席公益活動。今次仲代表個會去遊行,行完一大輪,佢衫都唔換、心口貼紙又唔搣,就帶由杭州嚟嘅朋友上山頂睇風景。

莊家彬兩邊插旗

莊氏集團太子爺莊家彬,今年擔任香港菁英會副主席。當日佢代表個會出席,由頭行到落尾,大汗疊細汗咁。佢頭上面分別插住香港同中國旗,唔使咁誇啩!

邢嘉倩冇面見人

今年 26歲嘅邢嘉倩,果然好落力,自己出動支持之外,原來仲搵咗唔少老友撐場。

邢李㷧同張天愛個女邢嘉倩,已經做咗 6年海南省政協。當日佢以大黑超加 cap帽,包到實去遊行,貫徹佢低調作風。為咗話俾大家知佢有出力,邢嘉倩仲即場放相上網。得喇!明喇!



鍾意就快D Share啦!