三點式出擊
日前（ 9日），本刊發現甩拖後的姜麗文，秘密約會楊受成孻仔楊政龍到西貢滑水暢泳。姜麗文更穿上火辣三點式，在楊政龍面前大騷 34D本錢。
滾熱辣
花心鄭俊弘狠撇 34D姜麗文進擊楊受成孻仔
秦沛愛女姜麗文（ Lesley）與鄭俊弘（ Fred）識於微時，兩小無猜以為共度患難亦可共富貴，可惜男方走紅後死口唔認戀情，更被踢爆腳踏四船。據知男方為求回復單身方便覓食，三個月前狠飛姜麗文， 3年情告終。
不過跌咗個「桔」，姜麗文竟然在短時間搵番嚿「金」。日前（ 9日），本刊發現姜麗文身邊男伴已經升呢為楊受成孻仔楊政龍（ Alex），二人相約到西貢滑水。向來密實的姜麗文，更在新歡面前大騷 34D驕人身材，難怪楊公子都要即時影低如此火辣場面。
早年在日本以獨立歌手發展的姜麗文，返港後與哥哥姜文杰組成「 Benji& Lesley」自資出碟。前年與大台鬧翻，二人過檔港視，可惜開台受阻，兩兄妹前路茫茫。直至近日，二人參加內地節目《我不是明星》，結果順利過關，在內地爆紅。
五月分手
事業有起色，可惜與鄭俊弘的三年戀情卻一池死水。鄭俊弘和姜麗文的拖友身份雖是圈中公開秘密，但自從男方在《星夢傳奇》彈出，為求大台一紙經理人合約，死口唔認有女友。本刊收到消息，二人原來早於五月中已分手收場，知情人透露：「其實年頭嗰陣， Lesley同 Fred已經試過冷戰啦，不過 Fred𠱁番女友，仲話過一排會放風出去，公開佢哋嘅戀情， Lesley都信㗎。點知之後 Fred爆出一腳踏四船， Fred仲試過瞞住 Lesley話開緊工，結果俾人影到佢同女仔出街。 Lesley好嬲質問 Fred，但 Fred話既然 Lesley唔信佢，一齊都冇意思，箍都懶得箍。」
茶座撐枱腳
與鄭俊弘三年情就此玩完，一直冇被承認過女友身份的姜麗文傷心欲絕，身邊不少好友都擔心她，每逢有聚會都會預她一份。甚有異性緣的她，原來近日已暗撻家底比鄭俊弘好百倍的楊受成孻仔楊政龍（ Alex）。
前周六（ 9日）下午，本刊發現姜麗文與楊政龍一身沙灘 look到西沙茶座 high tea。兩人點了兩杯 cocktail，在茶座暗角處談心，其間細聲講大聲笑，能度親暱。一小時後二人埋單離開，楊政龍以價值百多萬的 GTR跑車接載姜麗文。楊公子上車前不忘為女方開車門，盡顯風度。
連嗒三女
憑《星夢傳奇》忽然彈出的鄭俊弘，昔日形象乖仔，不過人紅咗就心癢癢，被踢爆背住正印姜麗文在四個月內連嗒三女。
比堅尼誘新歡
跑車直駛西貢榕樹澳，二人會合幾名友人後，便乘接駁船往附近魚排滑水。記者發現姜麗文甫到埗，便興奮剝剩粉紅比堅尼。只見平日甚密實的她原來屬有料之人， 34D魔鬼身材盡現，而楊政龍亦好識𠱁姜麗文，不時主動揸機替女方留倩影。之後眾人輪住出海滑水，楊政龍更主動替姜麗文穿滑水鞋，又教對方滑水秘技，似乎他是滑水高手。
讚冇公主病
玩足三粒鐘，眾人都謝晒，但一對小情侶卻意猶未盡，撇低班 friend，再到九龍城食泰菜。現場所見，楊二少不像一般富二代擺架子，竟不拘小節赤裸上身行街。他進餐期間，記者聽到他多次對姜麗文噓寒問暖，又為女方夾餸，體貼到暈。據楊身邊友人透露：「 Alex真係好識照顧女仔，就算 7仔買包紙巾，都爭住俾錢；見你八達通冇錢，又會幫你增值。佢唔似一般有錢仔咁一味揸靚車，有時都鍾意搭地鐵同巴士。佢同 Lesley喺外國讀書，識咗超過十年，當時大班朋友一齊玩，依家見番，兩個都係單身，加上 Alex覺得 Lesley份人唔造作，大情大性冇公主病，所以好啱 key！」
周三（ 20日），記者致電姜麗文，對於與猛料新歡楊政龍暗撻，姜多番迴避，只說：「哎吔！佢（楊政龍）係我啲 family friend，識咗好耐㗎」問到她與鄭俊弘分手，她想了一會，斬釘截鐵說：「我同佢從來只係好朋友！」至於鄭俊弘，上周六（ 16日）記者在活動上欲訪問他，但卻遭其助手阻攔。事後記者致電鄭，他則表示：「 Sorry，唔可以回應。」火速搵到超筍盤，姜麗文下一次比賽不如唱番首〈活得比你好〉
百億王國接班人
今年 27歲的楊政龍是父親楊受成與第二任妻子陸小曼的兒子， 09年畢業於美國波士頓 Suffolk University商科，現為英皇集團企業行政主任。他亦是深圳政協委員及富二代組班的菁英會會員。
前年在英皇的 70周年誌慶晚宴上，楊受成安排楊政龍緊接自己上台致謝辭，又親自介紹他認識各世叔伯。同年楊受成推出的自傳中亦透露在 Alex身上看到自己影子，似暗示他將有機會成為這個百億王國的接班人。出名謙虛低調的 Alex卻曾在訪問時搞笑謂：「我喺公司係二打六乜都做，要學吓嘢先。」被問到可會因利乘便追明星時，他則謙稱：「我估高攀唔起喎！」好識講嘢。
|
鍾意就快D Share啦！
|
|
|
