嘆啡密斟
日前，陳奕迅相約謝霆鋒到跑馬地邊嘆咖啡邊傾合作。兩人離開時心情大靚， Eason更加雙手托腮極風騷。
娛樂喧
飛起阿徐開公司 陳奕迅孖霆鋒做老闆
不少藝人未雨綢繆，會預早計劃後路，創業做老闆。娛圈中成功創業，打出名堂的表表者非謝霆鋒莫屬。本刊收到消息，就連陳奕迅都打算孖實老友搞音樂製作公司。
陳奕迅上月到台灣電台做訪問時突然自爆兩年後退出樂壇，及後又澄清，他並非退休，而是調整以後的工作，慢慢減產。據知 Eason計劃減產背後，其實是想轉型仿效霆鋒，一邊做老闆，一邊繼續歌唱事業。
今次 Eason創業，更飛起老婆徐濠縈，與候任經理人甘菁菁合資開公司，再與霆鋒的「 PO朝霆」合作。上月 Eason和霆鋒更於跑馬地咖啡店商討搵銀大計，實行有錢一齊搵。
陳奕迅近年主力搞世界巡迴演唱會及音樂創作，全世界四圍飛。上月他去到台灣宣傳國語專輯，做電台訪問時透露 2013年一張專輯銷量，竟然只有 900多張，又表示完成與環球唱片合約及兩張專輯後，便會淡出娛圈。
急為退出解畫
Eason退休的消息一出，不單嚇親粉絲，亦令有意接洽他的客戶卻步。為免影響幕前工作， Eason隨後急於澄清，指 900隻唱片銷售是指廣東地區三個月的銷量，所以並不是唱片不受歡迎。而自己亦只是想暫別樂壇，好好休息調整工作，慢慢減產，並非全面退出。
據知在休息背後， Eason早已有全盤轉型計劃，他一心以老友霆鋒為模仿對象，建立自己的公司。知情人士透露:「 Eason見霆鋒間『 PO朝霆』搞電影和廣告幕後製作搞到有聲有色，做老闆又可以兼顧幕前工作， Eason當然心郁想做老闆佢睇中大陸市場夠大，不過要喺內地做生意要有番咁上下人脈先得。呢方面霆鋒一早建立好人際網絡，有老友幫手加埋自己喺樂壇嘅地位，合作開音樂製作公司一定 no problem！」
先與甘菁菁開公司
Eason決定同霆鋒合資搞公司前，首先要過老婆這一關。知情人士又指：「霆鋒知道阿徐好多意見，佢同 Eason傾合作嗰陣話唔想阿徐參與。所以 Eason為咗𠱁老婆，早排咪豪擲 2億幾買壽臣山嗰間豪宅，間屋仲淨係寫阿徐個名。」除此之外，今年初 Eason經理人陳家瑛宣布即將退休，明年起會由前商台助理總經理甘菁菁接棒擔任其經理人。而 Eason已經暗地裏與甘菁菁成立「 ESL Limited」公司，為跟霆鋒合作做準備。
合資搞公司如箭在弦，早前本刊獨家拍攝到 Eason、霆鋒於跑馬地嘆咖啡傾合作事宜。二人討論近半小時，發現記者後 Eason更登上霆鋒座駕，轉移地點至 Eason位於曉廬的寓所。本刊記者就跟霆鋒合作一事問過 Eason，他表示：「你哋問乜我都唔會答，你哋自己鍾意寫乜就寫乜！」雖然 Eason講完等如冇講，不過種種跡象顯示，歌神有心「升呢」做老闆。
PO朝霆 年賺過億
PO朝霆於 03年成立，主要從事電影及電視廣告的後期製作。霆鋒表示 02年拍攝〈玉蝴蝶〉 MV時，發現大部分的本地製作公司水平有限，意識到本地後期製作行業的機會。他更指，當年為成立公司，以自己的身家做抵押。
時至今日，霆鋒的投資回報已經超出他的預料，由創業時 11名員工，擴展成現時過百人（左圖）， 09及 12年更於上海及北京設立分部。據知行內一直視 PO朝霆為優質保證，佔香港本地後期製作市場近五成，每年利潤高達過億港元。 Eason將有機會跟 PO朝霆合作，相信大把錢搵。
|
鍾意就快D Share啦！
|
|
|
