2014年8月21日 星期四

[壹週刊 1276] 孭住合約選港姐 (1)謝芷倫兇經理人放生 謝芷倫,港姐,M1,




即使有經理人約在身,但謝芷倫已多次瞞住公司接拍康業信貸及萬潔靈廣告,完全無視合約精神。

探熱針

孭住合約選港姐 (1)謝芷倫兇經理人放生

每年港姐必有是非!今年十六強入圍候選佳麗中,有「翻版栢芝」之稱的楊埕,因有經理人合約在身,焗住退選,至於大熱門(1)謝芷倫,其實同樣孭住經理人合約,但她比楊埕更有部署,加上未婚夫 Simon在背後把關,先在社交網站剷走親密合照,繼而「兩公婆」再殺上經理人寓所,威逼解約,務求「淨身」爭做港姐冠軍。

搞搞新意思

今屆港姐玩神秘,未有安排傳媒隨團到日本沖繩島拍外景,直至今個月五日,才向外公布十六強入圍佳麗名單。

「余詠珊之前玩一人一票選港姐,今年就玩神秘,本來想等到二十四號準決賽前夕先公開十六強候選佳麗外貌同資料,點知名單外洩,有傳媒攞到部分入選港姐資料,余詠珊唯有提前發放入圍港姐名單。」知情者說。

佳麗資料見光兩日後,便爆出大熱門楊埕有經理人合約在身,違反大會規定。大台選美漏洞百出,無綫火速補鑊,楊埕即時宣布退選。

謝芷倫與男友蘇文迪年初訂婚,更去了兩個月紐西蘭旅行。

兩年前,謝芷倫(中)簽約 HKTV拍劇,被安排與其他女藝員齊做宣傳。

未婚夫出頭

風波表面平息,但原來另一大熱人馬(1)謝芷倫,同樣與 Brilliant Power Limited有經理人合約。外貌似足上屆港姐冠軍陳凱琳的謝芷倫,一二年在經理人安排下,曾簽約王維基的香港電視拍攝劇集《大眾情性》,亦因此被標籤為「港視叛將」港姐。

「 Jan(謝芷倫)報名後都好擔心,遲早俾人知自己出面有經理人約,佢亦搵過經理人傾解約,之後仲搵埋未婚夫 Simon陪佢上經理人屋企,詐型話對方根本幫唔到手,係咁兇人要人哋自動終止合約,好無賴!」

八月八日,楊埕退選事件曝光後,無綫急 call所有港姐返電視城開緊急會議,警告佳麗們如有經理人約在身,務必盡快解決。同日夜晚,謝芷倫再搵經理人要求解約。

「過去呢年幾以來, Jan經常話經理人幫唔到佢,要求終止合約,又不停出律師信俾公司;仲惡人先告狀,怪經理人唔積極,甚至要求賠償,總之不斷出招疲勞轟炸。上次搵未婚夫出頭,返電視城開完會嗰晚,佢提出願意賠償之前公司墊支俾佢學日文嘅學費同使費,軟硬兼施,佢經理人唔想再糾纏落去,第二晚(九號)就搞掂晒,雙方解約。」知情者說。

二○○八年簽約 Brilliant Power後,謝芷倫在經理人關小姐安排下,曾獲英皇 Mani試戲和雷頌德試音,最終被指戲屎兼唔唱得,簽約失敗。

本週二(八月十九日)港姐活動上,記者問謝芷倫是否與 Simon已訂婚,她即表現驚慌,搵 TVB公關擋記者,至於孭住合約參選、與 Simon會否延遲婚禮?她更全程左閃右避,扮聽唔到。

隱瞞婚約

外表斯文的謝芷倫,為求達到目的,大話連篇。據知,她與拍拖三年、從事 I.T.技術員的男友 Simon蘇文迪,今年三月訂了婚,為免事件曝光,兩人協議隱瞞婚約,更剷走上載到社交網站的親密合照。

「舊年年尾佢同 Simon去咗紐西蘭兩個月,放咗好多親密相上 facebook,三月又晒鑽戒話男友求婚成功,但呢啲相已經全部剷走晒,佢仲將自己個名由 Janny改為 Jan,全部有晒部署。」謝芷倫身邊人說。

向謝芷倫前經理人公司 Brilliant Power負責人關小姐求證,她直認謝芷倫是在未有知會公司情況下參選港姐,到入圍十六強後,雙方才解約。「(佢要求解約時態度好差?)佢全程戴住墨鏡,你哋喺鏡頭前睇到嘅親切笑容,冇嘅,禮貌都冇乜!其實我唔想同佢解約!我都好想佢當選,如果佢做到,敝公司就可以做到香港小姐嘅經理人,咁都幾好㗎!(點解最後答應解約?)佢處心積慮咁部署好晒,我哋咪成人之美,我衷心祝福佢!」

謝芷倫

二十五歲的謝芷倫,與去年港姐冠軍陳凱琳撞樣,難怪她對摘冠自信爆棚。

陳凱琳

原本與男友蘇文迪在大圍同居的謝芷倫,參選港姐後才搬回父母位於西貢的寓所。

八月八日,謝芷倫與母親離開寓所,由父親駕車載返電視城,據知當日爆出楊埕退選消息,所有候選港姐被召返無綫開緊急會議。

平日有男友揸車接載的謝芷倫,參選期間要保密戀情,被迫搭巴士出入。

三年前,謝芷倫跟身形仍未發脹的未婚夫蘇文迪,學唱歌而認識。

余詠珊加入無綫後,一二年開創一人一票投選港姐,但最終因系統失靈,只能由評判定賽果,令大熱朱千雪倒灶,余詠珊亦被鬧爆。

選美是非圈

選美是非年年有,溝仔、借錢、墮胎、床照,一單比一單精彩。

許亦妮 欠債 10萬

11年大熱佳麗許亦妮,是非一籮籮,先被指專黐富二代,曾連𠝹13仔;其後,又爆出在英國讀書期間,向十多位同學借下逾 10萬港元,更一借無回頭,當年一班債主同窗聲言要在比賽當日,直踩無綫追債。

張名雅 墮胎疑雲

12年冠軍張名雅,參選期間被揭讀書成績差,經母親搭路才有機會在滙豐工作,並傳她曾為在加拿大擔任電台主持的男友墮胎。

歐陽巧瑩 床照流出

去年參選期間被封為「黑色乳牛」的歐陽巧瑩,網上流傳一張男朋友從後揸胸的照片,其後再爆出一張跟另一男子的親密床照,行為豪放。



鍾意就快D Share啦!
Related Posts Plugin for WordPress, Blogger...