掃呢頁CODE去手機

2014年8月21日 星期四

[壹週刊 1276] 黎姿孻女萌爆 like象 黎姿,M1,




有媽咪抱住, Pegella要埋大象身又摸又拍。

探熱針

黎姿孻女萌爆 like象

黎姿為老公馬廷強誕下孖女後,前年十月再生埋孻女 Pegella,要照顧老公和三個女,今年五月更為弟弟黎嬰創立的皮膚醫學中心開分店,七手八腳!

上星期,黎姿帶埋接近兩歲、將入學前班的孻女出街,被媽咪拖住的 Pegella樣貌似足爹哋,梳了一個冬菇頭,一雙小腿在商場走來走去,見到大笨象展品又摸又拍,萌爆。

上學前班

黎姿做了馬太後,生活比做幕前更忙碌!要上班開會,又要接送小朋友返學,做廿四孝媽咪。四歲孖女(大孖家蔚細孖家鎂)讀幼稚園,暑假後,孻女 Pegella亦準備上學前班。

上週四(八月十四日)下午三時,一身富貴打扮的黎姿,帶同 Pegella到太古廣場,買定開學用品。十月便足兩歲、著住娃娃裙的 Pegella仍要用口水肩,行路未算好穩陣,要外傭及媽咪一左一右拖實,沿途見到大笨象展品, Pegella表現興奮,要停低睇。

有媽咪抱住, Pegella要埋大象身又摸又拍。

Pegella拖住媽咪及外傭衝向大笨象。

睇大笨象時,媽咪忍唔住錫錫。

有求必應

之後黎姿拖住囡囡行入 LeSportsac專門店,好奇的 Pegella在店內走來走去,為怕她跌倒,一直跟實的外傭索性抱起她。

在店內逗留二十分鐘,快手快腳的黎姿買了一個七彩小背囊離開,折返再經過大笨象展品時, Pegella又再表現興奮要行近接觸。黎姿抱住女兒行向展品,讓 Pegella摸吓拍吓大象身;摸完一隻, Pegella要摸另一隻,黎姿照「指示」,目的達到, Pegella乖乖聽媽咪耳語,冇再扭計。

有外傭幫手照顧三個女,但黎姿好多時都自己落手落腳,更絕不厚此薄彼,大細抱勻,免得三個女呷醋爭寵,顧家湊女睇檔,親力親為。

黎姿在店內揀袋,唔夠廿分鐘即搞掂走人。

生完孻女兩個月,黎姿依然親自送大細孖返學,對女兒照顧得無微不至。

五月,黎姿幫細佬黎嬰的皮膚醫學中心開分店,請來老友鄭伊健及林曉峰撐場。

黎姿退出幕前多年,跟老公馬廷強間唔中才出席慈善活動,生活低調。

萌二代

萌爆星二代,隨時比老豆老母更惹人注目,如在內地大受歡迎的王詩齡,而曹格三歲半女 Grace最近亦在網上爆紅,比父母有更多粉絲。

王詩齡

主持人李湘與導演王岳倫的女兒王詩齡,參加內地真人騷《爸爸去哪兒》火紅,廣告身價四百萬人民幣,四歲人仔,已有機會跟兩影帝周潤發及張家輝合作拍賀歲片《賭城風雲 2》。

曹格女

被指濃眉似《蠟筆小新》的曹格女兒 Grace,在第二季《爸爸去哪兒》一哭成名,人氣急升,有份參加《爸爸 2》的吳鎮宇更指 Grace是他的女神。

Soler仔

組合 Soler細孖 Dino的 20個月大囝囝 Damiano,頭髮鬈曲加混血靚樣,唔夠兩歲已經行時裝騷出活動,比爹哋更搶鏡。



鍾意就快D Share啦!