2014年11月14日 星期五

[忽然1周 - 1007] 網上爆紅 貼錢買戰衣 韋綺姍孖蔣志光台慶搶收視 蔣志光,MW,




試足一粒鐘

周二晚( 11日),韋綺姍在海港城名店揀戰衣,三位售貨員貼身服侍她試足一小時。她睇中的銀色連身短裙價值萬三元(圓圖),闊太血拼果然面不改容。

滾熱辣

網上爆紅 貼錢買戰衣 韋綺姍孖蔣志光台慶搶收視

《老表,你好 hea!》一劇中,韋綺姍與蔣志光重唱〈相逢何必曾相識〉成為高潮,播出當晚有 188萬觀眾收看,更在網上爆紅, fb上不停洗版,那句「令你、令你、令你……」連小朋友都識唱。

韋綺姍與蔣志光在短短一星期變成大紅人,登台出騷應接不暇。大台亦絕不放過這對搶收視的秘密武器,遂安排他們下周三( 19日)在台慶夜表演,力抗香港電視開台。

周二晚( 11日),韋綺姍到名店 Marina Rinaldi揀戰衣,大台出名孤寒,對於要貼錢裝身,她笑說:「最緊要靚同襯到志光」








大台正熱播的台慶劇,配角蔣志光與韋綺姍實在太搶眼,主角王祖藍、郭晉安及萬綺雯都變得黯然失色。上周三( 4日),重唱 90年代經典合唱歌〈相逢何必曾相識〉的一幕,更令蔣志光與韋綺姍再度爆紅。

蔣志光與韋綺姍在 90年代叱咤樂壇,想不到二人合唱的〈相逢何必曾相識〉會在廿年後再次掀起熱潮。

11月 4日,大台舉行節目巡禮,話就話晒冷,不過最大粒都只是佘詩曼,她將與黃浩然及張志恆演古裝劇《呂后》。

韋綺姍之後再試了另一套衫,記者聽到她說想為大結局當晚的活動揀衫,售貨員好緊張問:「吓!咁快大結局?我三年冇睇劇集,依家晚晚追呀!」

韋綺姍試完靚衫離開時發現記者,對鏡頭保持微笑。對於近日人氣急升,她笑言壓力很大,近日常失眠。

臨時加插合唱

大台亦打鐵趁熱,臨急臨忙決定在 11月 19日台慶夜中,加插蔣志光與韋綺姍再度合唱,更安排壓軸出場。據知情者透露,「台慶夜撞正港視開台,一個星期前大台最高領導人開會,話要諗啲絕招搶收視。咁啱之前蔣志光同韋綺姍嗰集一出迴響咁大,班高層話師奶一定鍾意睇呢啲舊人,點都要加一 part合唱。近年大台台慶劇收視都插水,小生花旦來來去去都係得嗰幾個,節目又冇新意,難得播緊套《老表》搞笑得嚟又收得,梗係食住條水不過大台好孤寒囉,搵韋綺姍幫拖都係得雞碎咁多出鏡費,人哋置裝都要錢㗎,真係貼錢賀台慶!」

大台大星買少見少,早前的節目巡禮動員 200藝員大晒冷,最大粒只是回巢拍劇的佘詩曼。據知大台仍為台慶夜的撐場卡士頭痕,正游說陳豪、林峯及佘詩曼等人出席,無奈多位一線演員都未能確定是否現身。

拍住登台聲價十倍

電台客串開咪

周二( 11日)下午,韋綺姍到 D100電台為顏聯武的節目做嘉賓主持,在節目中大唱經典金典。她透露已邀請劇中演員輪住上節目齊 jam歌,包括老拍檔蔣志光。

53歲的蔣志光翻身,連帶老拍檔韋綺姍亦成為傳媒追訪對象。近日邀請二人同台表演的工作蜂擁而至,騷價亦以倍數激增。甚至有人以過百萬邀請他們在周年晚會上合唱〈相逢何必曾相識〉,可是蔣志光有藝術家性格,並非所有工作都會接,即使酬勞可觀,若他無興趣亦一一拒絕。重出江湖的韋綺姍則積極復出,有唱片公司向她招手外,更簽了糖妹的經理人,幫自己處理排山倒海的演出邀請。

周二晚( 11日),韋綺姍到尖沙嘴海港城名店 Marina Rinaldi揀戰衣。離開時她向本刊記者表示要趕下場,未能停下接受訪問。問她是否貼錢買戰衣,她邊急步邊說:「總之要靚同埋襯到志光」

其後記者致電韋綺姍,對於大台搵她與蔣志光做秘密武器打港視,她表示未有聽聞,「我唔係太識睇中文,冇睇有關娛樂圈嘅新聞,亦唔知邊個打邊個。(大台見你同蔣志光受歡迎就臨時搵你哋?)應該係囉!出咗唱歌嗰集四日左右,監製就打嚟話可唔可以幫吓手,同志光一齊表演唱歌。」

工作排到明年

對於接踵而來的工作,她仍未消化到。「套劇出街後受歡迎我係開心,但有好多嘢我應付唔嚟囉!兩三日內突然有咁多事發生,好多人打嚟,好多走埠、商場騷同私人活動搵我。以前幾個月都冇一個,依家竟然有咁多,已經傾緊出年嘅嘢。十幾廿年冇經歷呢種生活,突然日日都要做訪問同影相,仲未慣。有好多人搵我同志光一齊出騷,都要睇佢有冇期。佢好忙有好多劇要拍,有啲係一早搵咗志光,依家再加埋我。(係咪同志光一齊出騷酬勞升咗十倍?)哈哈哈!我唔知㗎!你問我經理人可以講嘅係有一定升幅,不過冇十級跳咁誇張。」

蕭定一向蔣招手

至於蔣志光似乎已看淡名利,近日在空餘時間寧願到書店打書釘、逛街市,平民化生活依舊。周三( 12日)下午,他出席電台活動後接受訪問,透露未想復出歌壇。「突然捲起咁高嘅浪,唔知會發生咩事,如果貿貿然應承人哋,之後打回原形,咪剩番我喺個舞台上?等熱鬧過後所有嘢都平靜,啲人仍然捉住你唔放,咁就證明對我仲有誠意。 Chilam嗰間公司(蕭定一的「 3D中國」)搵過我,不過呢排好忙,等安頓晒所有嘢先。我識唱歌唔代表我鍾意唱,有人搵我出騷會參與,不過未必就到時間,都係拍劇行先。(大台搵你『光復』台慶喎?)公司搵我做節目,只有願意同唔願意兩個選擇,呢兩個字唔好放我身上。(有報道話你淡薄名利?住唐樓?)事實係事實,冇嘢可以隱瞞。」倘若蔣志光與蕭定一成功斟洽,唔知他和 Chilam兩兄弟繼〈舊朋友〉後會否再度合唱呢?

配角變主角

蔣志光在大台效力廿年,對上一次參加台慶已是 8年前,當年他拍住鄧梓峰(左)扮女人跳艷舞。今年蜀中無大將,他終於有機會揸咪做主角。

慳家王

蔣志光甘於平淡,多年來過着慳家生活,出入以地鐵代步。對於人氣急升後大把機會搵錢,他都不為所動。

韋綺姍大女做接班人

韋綺姍出生音樂世家, 95年結婚後做少奶奶,近期客串大台劇再度獻唱備受讚賞。想不到她 18歲的大女 Natasha黃愷珊,除樣子同媽咪十足餅印,連唱功都盡得媽咪遺傳。早於 12年 Natasha曾經參加全港校際歌唱比賽憑〈 If I Ain't Got You〉同埋〈 Lady Marmalade〉獲得冠軍,翌年更成為該比賽的表演嘉賓。 Natasha不時上載自彈自唱的短片上網,絕對有潛質出道做歌手。

韋綺姍神隱廿年做少奶奶,把心機和時間都放在一對女兒身上。對於大女想入行,她表示:「唔會反對,不過等佢讀完書先」

兩年前韋綺姍大女 Natasha參加校際歌唱比賽一鳴驚人,其巨肺歌喉拍得住母親。

網上瘋狂點擊

上周大台台慶劇,蔣志光與韋綺姍合唱經典歌曲〈相逢何必曾相識〉,令該劇上周收視推高 2點,平均收視 26點,最高收視更有 29點,傲視其他黃金時段節目。

這曲出街後紅歌又紅人,上載未夠一個星期網上點擊率已近三十萬,連帶蔣志光劇中改編歌曲〈相逢何必曾相識〉點擊率亦破 13萬。但最高點擊率一定是蔣志光自彈自唱的〈愛是永恆〉,點擊高達 50萬人次,網民勁讚之餘,仲話希望蔣志光復出唱歌。



鍾意就快D Share啦!
Related Posts Plugin for WordPress, Blogger...