娛樂偵訊
自製超級富豪緋聞 周秀娜玩大咗
周秀娜近日被傳同城中有名超級富豪秘密拍拖，但原來呢單新聞，是她趁新戲《 iGirl夢情人》上自製緋聞谷宣傳，諗住黐富豪個名自抬身價，點知富豪唔肯鯁隻死貓，準備向周秀娜採取法律行動，阻止被她再利用。
收到風的周秀娜知道玩大咗，本週一（ 7/3）接受訪問時，突然改口叫大家唔使估：「根本冇呢個人存在！」
搞新聞谷戲
自從冇再出寫真拋波示眾後，周秀娜人氣同工作量都大減，即將有新戲上映的她，唔想無聲無氣決定自度宣傳，多橋又醒爆的娜姐於是自編自導自演一單與城中超級富豪的緋聞，結果成功上了報紙頭條同雜誌封面。
上星期四（三月三日），周秀娜回應同富豪關係時，答得似是而非。「依家係有人追，係咪富二代？唔知呀！唔會一嚟就咁問人哋。」
事件愈鬧愈大，周秀娜一方態度又模棱兩可，任由這單緋聞繼續發展下去。不過，超級富豪有頭有面，不甘被人利用來炒作宣傳，唔肯食呢隻死貓，已經準備向周秀娜採取法律行動，希望她收手。
「其實富豪咁㷫唔係單單因為今次，因為早喺一年前，已經有人周圍暗示自己同富豪關係密切，仲搵埋啲身邊人同化妝師周圍散啲風出去，搞到呢單嘢喺闊太圈都傳咗一段時間，可能有人覺得黐住富豪個名，身價會高啲囉！」知情者說。
笠水改口供
由於周秀娜都收到風，知道富豪準備做嘢，覺得今次真係玩大咗！星期一晚（七日），她出席電影首映禮時，被記者問到有關同富豪拍拖的問題，說法同之前大有出入，甚至𤓓爆自揭根本沒有這個富豪存在。
「（嗰個富二代係邊個？）唔使估啦，唔使估啦，因為根本冇呢個人存在，身邊都冇任何富二代嘅朋友。冇富二代，冇男朋友，我單身！」周秀娜說。
新聞女王
08年出道的周秀娜，由寂寂無聞的啤酒妹變𡃁模，除靠出眾身材成為焦點，周秀娜更經常自製新聞，借見報上位。
寫真露乳暈
09年，推出處女寫真《 Kissy Chrissie》，其中一輯三點式相疑似走光露乳暈，周秀娜解釋是一時錯漏。到出第二輯寫真時，發給傳媒的照片全是食雪糕、牙膏滴落胸等誘惑相，令她成功密密見報，在𡃁模書戰突圍而出。
黐內衣品牌老闆
12年娜姐成為內地內衣品牌 La Miu代言人，去年底，她更斥資 8位數推出自家內衣品牌「 LaaNaa」，為咗谷行宣傳，娜姐不惜放風自爆與 La Miu老闆董路到西貢食海鮮撐枱腳，成功製造緋聞。
撰文、攝影、攝錄：娛樂組
|
鍾意就快D Share啦！
|
|
|
