掃呢頁CODE去手機

2015年3月12日 星期四

莊父要脅踢出董事局 傅明憲莊家彬協議疏遠 [壹週刊 - 1305] 莊家彬,傅明憲,M1,



莊家彬與傅明憲拍拖已經有長達九年時間。

探熱針

莊父要脅踢出董事局 傅明憲莊家彬協議疏遠

四十四歲傅明憲( GiGi)與坐擁八十億的莊士集團太子爺,現年三十三歲的莊家彬,姊弟戀九年,最近突傳「分訊」,有指男方另結新歡,搭上台灣女音樂人而提出分手。

但據了解,分手導火線另有其人。莊家彬父親莊紹綏一直反對兒子同傅明憲拍拖,多年來想盡一切辦法包括經濟封鎖棒打鴛鴦,最近更使出絕招,逼莊家彬辭去莊士集團執行董事職務,將他踢出董事局。為了保住男友前途,傅明憲同莊家彬最終協議,將情侶關係逐漸疏遠。

經濟封鎖

莊紹綏由始至終都反對這段戀情,用盡方法拆散他們。

年齡相差十一年,加上傅明憲結過婚,所以由拍拖第一日開始,莊家已經反對!拍拖九年,其間莊家彬父親莊紹綏,一直用盡辦法阻止兩人繼續交往,甚至對兒子採取各方面經濟封鎖,不斷施壓。

據知,身為莊士集團執行董事的莊家彬,月薪只有約六萬元左右,以執行董事計,薪酬極度偏低,此舉是為免莊家彬有多餘錢花在傅明憲身上,以此令對方放手。

「其實拍拖咁耐, GiGi用家彬嘅錢一定唔多,早排買樓同之前租樓嘅錢,全部都係 GiGi自己,就算有時一齊去滑雪潛水,好多時 GiGi都係自己俾番機票錢,都唔想使男友錢,係莊生(莊紹綏)成日以為有人因為錢,先同佢個仔一齊!」知情者說。

試過不同打壓方法,都無法令莊家彬放棄傅明憲,直到半年前,莊紹綏開始訂立新家規,要莊家彬每晚必定回家報到,禁止他在女友屋企過夜。雖然如此,但兩人仍搵到機會見面,不過最終都被莊父的線眼所發現。

莊家彬是家中長子,被視為「莊士集團」接班人。

以往 GiGi同莊家彬間中會出席公開活動,但都刻意保持距離,怕莊父見到報導會不高興。

GiGi得唔到莊家兩老歡心,但她與男友的弟弟莊家峰關係不俗,早前更一齊去潛水。

莊父最介意傅明憲與葉劍波結過婚,及年齡比兒子大。

莊家彬同傅明憲經常拍拖到外地滑雪同潛水,雖然兩人都沒有在微博及 Facebook擺放合照,但他們經常放同一環境相片,唔介意披露二人身處同一地方。

走投無路

莊家彬已經三十三歲,莊紹綏愈來愈心急,希望兒子成家立室,但他絕不容許傅明憲入門,過去軟硬兼施都搞唔散,最近再將行動升級,將一封預先打好的辭職信交到莊家彬手上,如果他選擇繼續同傅明憲一齊,就在辭職信上簽名。要保住傅明憲,莊家彬便要起身,同時失去做「莊士」接班人機會。

橋段似足電視劇《豪門恩怨》,但橋唔怕舊,終於令莊家彬無路可走,要面對現實。

「家彬梗係有同 GiGi講呢件事,大家都好無奈,其實 GiGi一早都預咗,自己同家彬唔會有乜嘢結果,但求兩個人一齊開心就夠,完全冇要求過結婚呢樣嘢。不過見到莊(紹綏)生做到咁絕, GiGi知道如果家彬俾人踢咗出董事局,佢嘅前途就係咁先,加上佢又係政協同菁英會副主席,萬一俾人踢咗出董事局,其他都好難做落去,所以大家協議咗將關係逐漸疏遠。」莊家彬身邊人說。

唱 K爆喊

近兩個月,莊家彬和傅明憲都沒有再見面,農曆新年期間, GiGi返加拿大探父母,莊家彬就舉家到日本度假;上星期傅明憲轉飛歐洲滑雪,長時間離港,避開見面。

「佢哋表面上冇乜嘢,亦都好少提起件事,不過有次家彬去唱 K,飲咗啲酒,唱唱吓《天梯》嘅時候,突然爆喊,喊咗成十分鐘!不過當時大家都未知原來出咗事!」莊家彬身邊人說。

早前 GiGi與家人到郵輪度假,更大騷三點式泳衣照。

莊家彬同 GiGi在拍拖期間,經常一齊出席朋友聚會。

GiGi透過 WhatsApp回覆,她表示相信莊家彬為人,唔信他另結新歡。

莊家彬是全國政協(上圖),又同一班富二代一齊加入菁英會,萬一冇咗「莊士集團」董事身份,對他這些職銜都有影響。

棒打鴛鴦

要嫁個有錢人做豪門新抱,隨時要過關斬將,就算身份背景合格,仲要氹得老爺奶奶歡喜,圈中女星想升呢做闊太,更難!過去有唔少情侶,都因為父母反對,導致分手。

劉嘉玲 許晉亨

劉嘉玲與許晉亨拍拖三年, 86年一度對外宣布婚訊,但遭許家阻撓,更對許晉亨作出經濟封鎖,二人被迫分手。

楊其龍 何超瓊

00年,何超瓊與許晉亨離婚後, Pansy經常被拍到在楊其龍寓所過夜,賭王何鴻燊更公開批評男方「質地唔好」,又警告女兒「不要跌落會撻死人的坑」,若二人堅持一起「就會乜都冇」。

林建岳 王祖賢

90年代,有傳因為王祖賢介入,令林建岳與謝玲玲婚姻破裂,當外界以為王祖賢有望入門補位,但問到林老太余寶珠對王祖賢的看法,林老太竟公開大罵「我當我個仔叫雞」。戀情被反對,二人最終分手收場。

鍾意就快D Share啦!