年僅六歲的嘉嘉，非常好戲，連影后千嬅都俾個 like佢：「好有前途！」
探熱針
誠意之作 俾童星搶鏡 楊千認輸
電影《五個小孩的校長》，是將元朗錦上路「元岡幼稚園」 4,500蚊校長呂麗紅，如何力挽狂瀾，保住五個小朋友有書讀的真人真事。楊千嬅飾演神奇「呂」俠，古天樂飾演校長老公謝鴻慈，「古老闆」更出錢出力，參與投資。戲中古仔、千嬅要同五個小朋友鬥戲，其中僅得六歲的嘉嘉，人仔細細但演技超晒班，更加搞到全組人一齊喊晒！俾細路搶鏡，影后千嬅甘拜下風：「佢係好有前途！」
拍爛手掌
為遷就有份演出的小童星，《五個小孩》在暑假期間進行拍攝，日日三十幾度高溫，卻著住冬天衫，在元朗的鐵皮屋實景埋位，只要一停機，千嬅便拎住風扇仔，係咁吹。
面對惡劣環境，成年人都頂唔順，但得六歲的嘉嘉冇扭計之餘仲交足功課。其中一場戲講嘉嘉的屋企被發展商迫遷，故意將大量泥頭倒在其家門前，而嘉嘉的爸爸（姜皓文）又因工傷失去工作能力，經常同老婆（劉玉翠）搞到家嘈屋閉，因為害怕父母離婚，嘉嘉唔想返學，最終要校長搵上門。
埋位前，嘉嘉聽完導演關信輝講解後，自己坐埋一邊培養情緒；一 roll機，嘉嘉竟然可以倒轉頭，帶動幾個專業演員入戲，喊住講對白，完全冇甩漏，同場對手楊千嬅同劉玉翠都喊到眼腫，導演嗌 cut，全場人拍爛手掌！
身為人母的千嬅，同五個小朋友日對夜對，經常母性大發，買定零食、玩具氹細路。對於嘉嘉這個小對手，她更讚不絕口：「真係好挨得，尤其係呢種咁惡劣嘅環境，要有咁大起大落嘅情緒，對我嚟講係好殘忍。嘉嘉係比較成熟啲同埋有悟性，佢真係會去了解個角色，仲劉玉翠同埋黑哥（姜皓文）俾咗好多心機去湊佢，俾佢有屋企人嘅感覺，可以好快咁去消化個故事，我覺得佢係好有前途。」
全本土製作
戲中校長和五個小朋友角色不可分割，劇組亦動用五個副導演，採取人盯人方式照顧。監製陳木勝親自落場揀蟀，千挑萬選飾演小雪、嘉嘉、珠女和南亞裔姊妹 Kitty同 Jennie五個角色。「成套電影最艱苦嘅時間，係要喺四百個小演員之中先揀十個，之後同時訓練三個月，再喺十個入面揀五個，大家都好痛苦，因為十個都好好。千嬅非常錫啲小朋友，俾咗好多包容同忍耐出嚟，因為有時拍一場戲原本只係兩個鐘，但我哋可能變成八個鐘，真係好辛苦。」一名劇組人員說。
據了解，劇組一度考慮用《爸爸去哪兒》紅爆的童星王詩齡做其中一個小孩，但顧及到 4,500蚊校長是個本土真人真事，用個已有名氣的內地童星，反而格格不入，最終保持全本土製作，原汁原味。
戲中千嬅放棄高薪厚職，做四千五百蚊校長，即使遇到重重困難，仍有老公古仔無條件支持，感人情節跟現實中的呂麗紅校長沒有兩樣。
|
鍾意就快D Share啦！
|
|
|
