全城熱爆的娛樂八封新聞 & 時事趣聞 & 生活 + 趣聞
戴住氣喉嘅莎莉媽唔舒服，廿四孝葉蒨文𠌥低身就住行，都要拖住媽咪隻手。
瑞士型流感甲型 H3N2大爆發，流感死亡人數已經超過三百四十人，年紀大長者或長期慢性病者更加首當其衝。八珍長氣都要再講，戴口罩勤洗手，最緊要係有乜唔妥即刻睇醫生，咪拖。
早排葉蒨文就出動兩個外傭，陪媽咪去中環中建大廈睇醫生。因為司機要將七人車泊埋置地文華出面上落客區，車未到位，葉蒨文已經提早跳車，走埋去同職員講，要求俾佢架車泊喺度，等媽咪睇完醫生，可以即刻上番車唔使等。亦難怪莎莉咁緊張，事關莎莉媽不但要坐輪椅，仲因為氣促，出外都要聞住氧氣。家陣咁嘅環境，真係要睇得好緊㗎！
兩個外傭一個推輪椅，一個一袋二袋，離開中建大廈一出到街，葉蒨文即刻用張氈遮住媽咪雙腳，以免佢凍親。
葉蒨文從後扶住媽咪，幫佢企起身上車。
司機未將七人車駛埋落客區，葉蒨文已經提早跳車，埋去同職員打定招呼，要求俾佢架車停响度等，方便坐住輪椅嘅莎莉媽，睇完醫生即刻上車。
舊年十月，兩母女出街食飯，當時莎莉媽已經要坐輪椅。（《蘋果日報》圖片）
