William借舊愛 Baby過橋，自薦加入最新一輯《奔跑吧！兄弟》，結果慘食檸檬。
探熱針
𢱑撈做《跑男》 陳偉霆死黐 Angelababy
失驚無神在大陸劇《古劍奇譚》彈出後，陳偉霆在大陸終於有人識，不再被稱呼為 Angelababy前度，又或者阿 Sa（蔡卓妍）現任男友，但相比前女友 Baby，他的知名度和受歡迎程度，依然差九條街。
想再上一層樓，陳偉霆經常借啲意同 Baby扯上關係，製造話題。最近，他主動接觸《奔跑吧！兄弟》（大陸版《 Running Man》）製作單位，希望可以加入，在第二輯節目同 Angelababy拍住做主持。陳偉霆識計數，可惜製作單位卻嫌他未夠班！
借舊愛造勢
大陸「浙江衞視」買入韓國綜藝節目《 Running Man》版權，製作中國版《奔跑吧！兄弟》，去年播放第一輯，無論收視和受歡迎程度，都搶過其他真人騷，更惠及節目中七個主持，包括 Angelababy、王祖藍和鄧超等都因此爆紅，甚至連曾經上過節目的嘉賓，都一樣有着數。
由於一直有傳第二輯將會換主持人，引來不少藝人對這個「包紅」的空缺流晒口水！其中在大陸終於有人識的陳偉霆亦收到風，更主動向製作單位𢱑撈，爭取加入，希望進一步增加自己的人氣。
「 William（陳偉霆）好清楚娛樂圈玩法，亦識得點樣去製造話題，好似有重要嘢要宣傳，佢唔會提阿 Sa，反而提住個 ex（ Baby）多啲，因為佢知道大陸媒體對佢同 Baby單過氣緋聞興趣大過阿 Sa，只要黐住 Baby，就必定上頭條。」一名大陸製作人說。
可惜，陳偉霆的如意算盤打唔響！電視台方面好明白陳偉霆的動機，但卻擔心利用緋聞或者是非製造話題，會影響節目檔次，更重要是有關方面認為陳偉霆未紅到去一線位置，於是否決他加入，至於原有主持王寶強的空缺，最終由大陸演員包貝爾補替。
被浙江衞視拒諸門外，但陳偉霆依然唔死心，表態做嘉賓都照殺，更自薦同《古劍奇譚》男主角李易峰一齊上節目。陳偉霆咬住唔放，但製作單位最終只請了人氣較高的李易峰做嘉賓，要陳偉霆再次吞多個檸檬。
離奇爆飯敍
事實上，陳偉霆是慣性利用 Baby，拍拖時如是，連分手後都咬住唔放，兩年前，他在內地仍是「蛋散」一個時，有次在橫店拍《四大名捕》，剛好 Baby同期在當地拍《雲中歌》，陳偉霆於是相約前度食飯敍舊，事件一直冇人提過亦冇被傳媒揭發，直到陳偉霆的《古劍》開播，這單新聞就校啱時間，離奇爆出。
「 Baby覺得自己光明正大，加上大家分咗手都可以做朋友，所以 William約食飯， Baby都會去，但其實都過咗好耐，一齊食飯呢件事突然爆咗出嚟，仲要遇啱係 William套劇上，邊有咁蹺呀。」知情者說。
|
鍾意就快D Share啦！
|
|
|
