2015年7月22日 星期三

唔掟蓋 骨折做手術 朱慧敏煲湯「復合」  Eddie氹掂:好窩心 [FACE - 426] Eddie,朱慧敏,MF,



為氹番未婚妻朱慧敏, Eddie就算右手骨折都冇偷懶,只係包住膠布就照樣開工。雖然睇落仲未消腫,不過有朱慧敏愛心湯水滋潤,相信好快冇事

真面目

唔掟蓋 骨折做手術 朱慧敏煲湯「復合」  Eddie氹掂:好窩心

因為背住未婚妻朱慧敏( Queenie)偷食「長腿 G.E.M.」斷正嘅 Eddie(彭懷安),雖事後出力補鑊,仍改變唔到婚禮延期嘅局面,最近仲被朱慧敏降至「好拍檔」同「好知己」身份,關係跌到低位!

幸好患難見真情!事關 Eddie意外整傷手,搞到骨折要全身麻醉做手術,身為「好知己」嘅朱慧敏即緊張大師上身,準備湯水兼人肉速遞到醫院慰夫,仲探足兩日添!帶傷為新戲《男極探射燈》開工嘅 Eddie難掩興奮,「好窩心!佢好緊張!仲煲咗無花果湯畀我!」呢次箍掂煲,因病得福喎!

喜愛夜蒲兼溝女嘅 Eddie,就算有個拍拖 3年兼成功求婚嘅未婚妻朱慧敏,點知都爆出連環偷食行為,婚事無了期順延,身份仲降至「好拍檔」,估佢唔到,實情兩人原來一早「復合」。

朱慧敏就算轉咗大台普通藝人約都一樣唔憂做,近日仲經常出席各大活動搵銀,同時仲學埋唱歌裝備自己添!

知道 Eddie受傷,朱慧敏明顯心軟,咁 sweet嘅呢一幕,相信好快會重現眼前。

朱慧敏喺《愛•回家》大結局零對白,唔少網民都戥佢唔抵, Eddie反而話:「佢戥我唔抵多啲,成日都戥我唔抵!因為有時拍嘢要跳樓跳海嗰啲得佢知,其他人唔知,反而會戥我唔抵!」電視畫面

人肉速遞無花果湯

為咗氹番朱慧敏,偷食 Eddie事後發誓戒煙戒酒兼戒蒲,務求以誠意打動未婚妻,不過朱慧敏近日又將 Eddie降至「好拍檔」和「好知己」身份,二人關係至今仍成謎。

直到最近 Eddie右手受傷要入院做手術,朱慧敏連續兩日到醫院探望,關係睇落已有進步。 Eddie日前為新戲《男極探射燈》開工,仲笑晒咁話:「好窩心!多謝佢即刻嚟睇我,佢好緊張,知道我全身麻醉煲咗無花果湯,等我醒咗有得飲,因為知道全身麻醉好傷身,個湯可以解咗啲藥。」

問到兩人關係, Eddie坦言有好大進步:「我哋溝通漸入佳境,一路有 keep contact,大家都知大家發生緊咩事。訂婚前都發現唔到咩問題,訂婚後發現好多溝通上問題,𠵱家不斷抽絲剝繭解決。」問到會唔會用未婚妻形容對方, Eddie就話:「我心裏面係(未婚妻)!但呢啲兩個人有共識,唔係單方面覺得係。想用知己、朋友嘅心解決咗呢堆問題先,之後先再昇華未婚夫、未婚妻嘅關係。」

撐住開工

Eddie包住膠布開工,未埋位時仲一個人匿埋一邊刨劇本,期間仲擘大口打咗個大喊路,攰樣出晒嚟。

「共識有小朋友!」

對於有傳因生 B一事搞到分手, Eddie就話:「我同佢都好鍾意小朋友,有共識將來都會有小朋友。話唔定做婚前檢查時,可能到我有問題,但唔會因為佢有問題而選擇離棄佢!(身體唔允許生小朋友?)都冇辦法!唔會因為小朋友而冇咗自己終身伴侶!」

講到朱慧敏在大台由親生女轉咗普通藝人合約,每個月要孭住 2萬多元供樓費, Eddie就坦言唔使驚,仲話全數包辦:「有我嘛!會全力支持佢!(為佢孭起層樓作愛巢?)我哋會繼續供,都會計劃再買樓,而嗰個先係我哋嘅愛巢!」講過就要找數呀!

Eddie因為仆親搞到右手骨折要做手術,不過有朱慧敏人肉速遞愛心湯水同心意,甜到漏!

朱慧敏現居清水灣半島單位,𠵱家每個月都要用 2萬蚊供樓,不過供唔掂都唔緊要,因為 Eddie話會全數負責,講得出做得到先好喎!《蘋果日報》圖片

抽水抽乾

幾經辛苦,由李逸朗擔正嘅新戲《男極探射燈》終於成功開拍,新戲學《選戰》玩政治話題,導演劉俊輝仲加插齊昕遊中環經典一幕,角色名亦改為「柴奀」暗寸推戲齊昕,抽水抽到盡!

叫柴奀

楊子瑤執齊昕「二攤」,拍住男主角李逸朗擔正新戲《男極探射燈》,佢話:「戲中角色名改咗叫「柴奀」,仲加插咗齊昕當日遊 ifc一幕。」

齊昕辭演角色搞到導演劉俊輝嬲爆,齊昕仲喺網上明寸女主角楊子瑤係奀星,冇面畀!

《男極探射燈》劇情主要講政治醜聞,連戲中做記者的男主角李逸朗嘅公司《探射燈》週刊 logo,都照抄。

689房

唔只 logo抄到足,就連辦公室大門都用上「 689」字眼,明抽特首水!

扮葉劉

講明玩政治,戲中梗係唔少得政治人物代表,好似葉劉就由吳浣儀扮演,造型上抄到足㗎!

鍾意就快D Share啦!
Related Posts Plugin for WordPress, Blogger...