千嬅的五星級超大廚房，空間感十足，雪櫃門上個芝麻街公仔好搶眼，唔知係咪 Torres貼上去呢？電視畫面
真面目
私家居 豪晒私房 楊千嬅廚房大過你個廳
明星參加真人騷，觀眾最想睇他們露出真面目之餘，當然都好關心明星的私生活！
楊千嬅破天荒同老公丁子高一齊參加內地節目《極速前進 2》(《 Amazing Race中國版》)，貴為天后的千嬅多次因唔夠醒目慘被老公呼喝，在熱帶雨林鬥快生火烤魚時，急躁丁子高忍唔住在鏡頭前失控喪鬧老婆「妖，你行開！」，娛樂性十足！
為賺千萬人仔，真性情冇得收埋，估唔到連私竇都要出賣。丁生丁太早年買入的 2,700呎豪宅首曝光，單睇個廚房，都大到可以劏開幾間棺材房有餘！
自從 12年誕下兒子 Torres，楊千嬅開始選擇性接 job，工作量可能未及之前，但吸金力卻有增無減；加上 13年憑《春嬌與志明》成為影后，《五個小孩的校長》又大收過 4千萬，令千嬅更搶手，唔憂冇人搵！
半億豪宅首曝光
早前千嬅及丁子高以 1千萬人仔接拍內地真人騷《極速前進 2》，要去勻世界各地接受挑戰完成任務。雖然開拍前千嬅因呼吸道感染及輕微肺炎而留院，不過睇錢份上都要頂硬上，寧願將廣州演唱會延期都要接大陸騷。
收得天價，自然冇得再收收埋埋。攝製隊直踩上丁氏夫婦屋企拍攝，對於一向低調的千嬅，算係好大犧牲。首度曝光的千嬅私房，位於港島陽明山莊，面積達 2,700呎，由千嬅兩公婆在 10年 12月以 4,350萬買入，現時市值近 5,500萬。
千嬅怕攰唔追女
其中一 part影住千嬅煮意粉，嘩，原來天后個廚房唔講得少，分分鐘大過公屋一人單位！甚少入廚的千嬅，有齊焗爐及巨型雪櫃等設備，仲擺得落一張飯枱，另外又有雜物枱專門放 Torres的奶粉，恨死一眾擠迫戶呀！
屋企空間十足，生多幾個小朋友絕對冇問題，連丁子高早前都開到聲想追多個女。不過事業心重的千嬅講明未有計劃，「戲入面可以為個女扮公主、當佢朋友咁傾偈，但原來湊女好攰，同湊仔係兩回事！老公有個仔就想生女，我驚湊兩個會好攰！」不過 41歲唔後生，丁生想追多個就要氹下千嬅喇！
躁爆丁生 hea千嬅
《極速前進 2》要求參賽者有無限體力同鬥志， 6對拍檔要去不同地方挑戰不同任務，除了體能，亦考驗二人默契！雖然丁子高同千嬅一齊 8年，不過兩人在節目中表現極端，丁生勁緊張搏到盡，千嬅就懶懶閒勁 hea，超過 9成任務交俾老公做，搞到丁子高忍唔住當眾呼喝老婆，其中一項鬥快烤魚時更差啲爆粗，「妖！你行開！等我嚟！」
|
鍾意就快D Share啦！
|
|
|
