掃呢頁CODE去手機

2015年8月6日 星期四

飛高海寧 王晶新寵處女馨 [壹週刊 - 1326] 處女馨,王晶,高海寧,王君馨,M1,



探熱針

飛高海寧 王晶新寵處女馨

15年賀歲片《賭城風雲 2》在內地大收十億人仔,再開第三集,除原有孭正的發哥及張家輝外,再加入劉華、張學友,投資和陣容都加重料。女角方面,除了劉嘉玲有得留低,其他例如負責出胸器的高海寧,全部出局,原來王晶𥄫中大台四大處女之一 36D王君馨,並一早向無綫攞人。

故意留難

作為《賭城風雲 2》合作投資者之一,無綫大條道理安插殼王愛將高海寧、忽然富貴的朱晨麗入組演出一角,高 Ling雖然佔戲唔多,但被安排著比堅尼揸住水上電單車片來片去開槍,搶晒鏡!但第三集又大執位,連有得留低的劉嘉玲,都要出場即死,至於新加入有內地人氣女歌手李宇春,和自己友王君馨。

「今次無綫都有份投資,不過公司咁多女仔,王晶只係睇中君馨,做個警察角色,但都要騷身材。自從睇過王君馨喺幾部電視劇入面著貼身裙晒身材,王晶已經同人講呢個女仔好索有得做,上次開《賭城 2》已經同無綫要人,不過當時話佢開工無期,總之諸多留難唔放人,所以最後用咗張慧雯。」一名劇組人員說。

據了解,當日公司唔放人,並非針對王晶,而是要懲戒參加《星夢》比賽後簽約星煥唱片,唔聽話,堅持唔肯留長頭髮的王君馨。

「君馨表面好溫柔,但份人其實幾硬頸, Herman(何哲圖)唔鍾意佢短髮太男仔頭,要佢留番長,但佢點都唔肯, Herman係一言堂,邊個唔聽佢話就冇嘢做,所以君馨到而家都未出碟。」

本週一( 3/8)大卡士賀歲片《賭場風雲 3》舉行開鏡儀式,王君韾多得監製王晶安插演出,之後她在微博識做多謝呢位伯樂。

如果唔係王晶關照,相信入行八年的王君韾,冇乜機會可以一次過同發哥,劉華等重量陣容合照。

因為唔聽公司話堅持剪短髮,令王君韾一度被打入冷宮。

去年有殼王罩住,高海寧得王晶力捧,在《賭 2》賣噴血身材,雙贏!

轉做打女

激嬲高層,加上王君馨跟公司傾續約表現拖拉,過去一年,也只拍了兩部電視劇。

「舊年只係拍咗《飛虎》同《老表,你好 hea!》,佢同王祖藍都係基督徒,所以先有機會拍《老表》;而家有王晶撐腰,有得拍賀歲嘅《賭城 3》,嚟緊仲同王晶經理人公司旗下嘅伍允龍合作電視劇《城寨英雄》,突破做打女。」知情者說。

在無綫被擺埋一邊的王君馨,週二(八月四日)出席《賭城 3》記者會,跟發哥、張家輝等一線紅星玩自拍後,在微博公開多謝出手打救她的王晶,十分識做。

她跟三位信徒姊妹,一度被稱為無綫處女幫。李亞男年初已婚,退出此列。

日前她與伍允龍等人為新劇《城寨英雄》練武。

出席《賭 3》記招當日上午,王君韾先為美容院開張任嘉賓。

前年在劇集《熟男有惑》,打出 36D誘豹哥,睇到呢幕嘅王晶亦中伏。

波女救星

王晶對晶女郎口味,跨世紀不變,巨峰首選。由昔日的港代表邱淑貞、關秀媚、李思蓓,到國產的孟瑤、童菲、胡然等,只要啱口味合眼緣,王晶中港不拘,絕對是波女救星。

高海寧

盛傳是殼王陳國強頭寵,作為舊同學兼老友的王晶,亦視 34D高海寧如晶女郎般呵護。去年安插她拍住周潤發、張家輝等大卡士拍賀歲片《賭城風雲 2》,性感比堅尼上陣,極搶鏡。

梁敏儀

34B的梁敏儀, 06年簽約王晶公司旗下,掹車邊做晶女郎。雖然唔係最得寵一個,但王晶幫亞視劇《情陷夜中環》做監製或開拍電影,總會預她一角。 13年梁敏儀在王晶古惑仔系列電影《江湖新秩序》,全裸露點演出,回饋對方多年照顧。

李思蓓

以前在無綫只算是四線演員, D cup李思蓓離巢投王晶後,經常有份參演電影,做晶女郎有工開,雙方合作十二年,算是王晶最長情一個。

撰文、攝影、攝錄:娛樂組

nextb@nextmedia.com

鍾意就快D Share啦!