探熱針
反口覆舌 無綫反口 Kelly吳雨霏撞板
閂埋門一家親的無綫，綜藝節目極度環保，鄭俊弘、吳若希、許廷鏗重複又重複，睇到觀眾叫救命。唔想收視愈插愈低，監製麥鎮東主動向環球唱片借將，成功得到陳慧琳、吳雨霏、盧冠廷幫手做下個月舉行的《星光熠熠耀保良》表演嘉賓。點知大台高層余詠珊又反口，突然飛起 Kelly同吳雨霏，出爾反爾，再次辣着環球。
敲門借將
喜歡自己人玩晒的余詠珊，老公何哲圖旗下唱片公司歌手，包攬大小音樂節目，一三年更上埋船，主理無綫唱片部「星夢娛樂」，無綫的音樂頒獎禮，「星夢」打橫行，獎項凌駕環球、東亞、英皇。
一直與無綫友好的英皇娛樂，近年亦冇啖好食，更一度反目，絕跡大台，綜藝節目要靠老牌歌手撐二打六，零大牌收視插水。
下月二十六日在紅館舉行的《星光熠熠耀保良》，是無綫年度大騷，監製麥鎮東為交功課，早於六月已向各大唱片公司敲門借將，當中包括有不少紅人在手的環球唱片。
「監製主動搵環球嗰邊幫手，對方亦即時做嘢度期，最後俾咗 Kelly、 Kary、盧冠廷同 Robynn& Kendy我哋。點知去到上個月底，突然話唔使環球歌手做個騷！」一名無綫人說。
高層玩嘢
據了解，無綫突然反口，全因高層余詠珊玩嘢。
「 Sandy話環球歌手一直唔肯簽歌星合約，年底頒獎禮亦唔肯撐場，所以無理由搵佢哋出大騷喎！」
度完期又話唔要，環球唱片對於大台出爾反爾，亦感不滿。
「 Kelly年底要開演唱會，已經忙緊籌備， Kary結完婚返嚟亦有好多工作要還債，佢兩個唔係得閒冇嘢做，無綫浪費我哋時間，以後再話要攞人幫手，真係要認真考慮。」一名環球員工說。
損人不利己
09年，無綫與環球、華納、 EMI及 Sony四大唱片公司因版稅問題鬧翻，互不讓步，大牌歌手陳慧琳、陳奕迅、李克勤等天王天后全面被封殺，大台頒獎禮食白果外，各大型節目亦再冇紅星。損人不利己！大台唯有硬捧自己友「巨聲幫」；糾纏超過三年， 13年初，大台新主殼王陳國強出手成功和解，雙方作出讓步，版稅加幅減一半。
撰文、攝影、攝錄：娛樂組
nextb@nextmedia.com
|
鍾意就快D Share啦！
|
|
|
