2015年8月19日 星期三

靠家姐 栢芝送 145萬車捉蟲 豪龍柏文轉揸 Uber [FACE - 430] 栢芝,張栢芝,MF,



張豪龍知道乘客女兒鍾意迪士尼,立即播放《魔雪奇緣》動畫,又稱自己個女都兩歲大,鍾意一上車就睇,所以早有預備。

真面目

靠家姐 栢芝送 145萬車捉蟲 豪龍柏文轉揸 Uber

Uber風波仍未平息,雖然市民力撐優質嘅接載服務係理所當然,但政府似乎強勢打壓,更估唔到 Uber同張栢芝兩個細佬張豪龍同張柏文都有關係。

據知張栢芝早前分別送咗每部約值 72萬嘅 Vellfire超豪七人房車畀兩個細佬,兩兄弟實行唔做幕前去咗做 Uber司機,豪龍更兼埋快的 Taxi嘅「一號專車」。不過近日 Uber被政府大清洗又拉司機,柏文同豪龍亦要停工避風頭,豪龍更驚青話:「我諗唔好喇,唔講喇!𠵱家呢個情況大佬……費事喇!」

張栢芝一向愛錫豪龍同柏文,雖然柏文曾因買車呃差價激嬲栢芝,不過當栢芝知道柏文因欠租被追數後,即刻和好兼開水喉接濟;唔單只咁,栢芝更分別豪送每部值$72萬 5千元 Vellfire七人車畀兩個細佬,柏文黑色、豪龍白色,皆大歡喜。

《忽然 1周》圖片

張栢芝一向愛錫兩個細佬,故豪花 145萬送車,等豪龍同柏文可以做職業司機。

播《魔雪奇緣》唱歌冧客

而上年尾 Uber進軍香港市場,柏文冇耐就加入做 Uber司機,豪龍隨後加入,後來豪龍加入埋另一 call車公司「快的 Taxi」嘅「一號專車」,實行做全職白牌車司機。

喺網台 HKBC《又娛樂大家》嘅女主持人 Gladys在上月底更透過「一號專車」 app幫襯張豪龍, Gladys更盛讚豪龍服務一流:「張豪龍落車開門又幫我搬 BB車,又叫我小心上車;又問我冷氣會唔會太凍,知道我哋去迪士尼又開電視播《魔雪奇緣》俾我個女睇,仲同阿女一齊唱歌;佢話自己個女都係兩歲幾,一上車就要睇《魔雪奇緣》,所以有呢隻碟;同埋老婆喺加拿大,遲啲可能會返去。」豪龍更應佢要求合照留念。

網台主持 Gladys使用「一號專車」 app,即見到張豪龍應機,顯示姓名同車輛型號。

豪龍唔單只服務好,乘客要求合照亦大方應承。網上圖片

網台 HKBC《又娛樂大家》主持 Gladys搭過豪龍車,喺節目中跟另一主持李穎大讚豪龍「成個乖晒」:「佢仲驚我哋喺迪士尼太熱,送咗兩樽水俾我哋。」細心到咁!網上圖片

張豪龍 12年迎娶大肚化妝師女友周紫雯,同年 11月誕下女兒(紅圈),家已兩歲幾。《忽然 1周》圖片

豪龍同張崇基、張崇德一齊開滑水學校,豪龍亦攞過好多國際賽獎,𠵱家雖然冇再教滑水,但佢表示仍然有參加比賽。《蘋果日報》圖片

張豪龍曾經跟張崇基及張崇德喺三門仔開滑水學校 Wakeboard school,但最近在公司註冊內顯示學校股東只剩張崇基名字,豪龍可能已退出全職做司機。

週一( 17日)本刊致電張豪龍,問佢有冇繼續服務「一號專車」時答:「冇吖!冇開呀!( Uber呢?)有,有揸呀!」但問到有顧客讚佢服務態度好,佢就顯得驚青:「我諗唔好喇!唔講喇!𠵱家呢個情況大佬……所以費事,陣間開又……乜嘢……唔好喇!(會唔會驚冇得揸?)唔會唔會,因為……唔會搏,我諗唔會喇!唔會講喇!」至於係咪會返加拿大以及有冇繼續教滑水,豪龍亦話唔想回答。

柏文一齊撈

張柏文喺 ig暗示自己做咗 Uber司機,更騷自己戴黑超着西裝開工相上社交平台。網上圖片

Uber喺其他國家亦得到市民支持,曾有市民遊行撐 Uber,豪龍亦有影相放上 ig。網上圖片

柏文約半年前將車輛後座鋪咗 Uber地氈嘅照片放上 ig,問大家準備好未;但最近 Uber事件發生之後,就冇再提起 Uber。網上圖片

好多人撐

《蘋果日報》圖片

警方打擊各 call車 app平台, Uber首當其衝有司機被捕,雖然有唔少市民力撐服務高質素嘅 Uber,但事件令司機人心惶惶,暫時唔敢開工,柏文同豪龍亦要停工。

另外警方雖然未對豪龍同時服務嘅「一號專車」採取行動,但「一號專車」 app亦受影響,雖然 app內地圖顯示附近有可用車輛,但冇司機接單,形同虛設,唔通我哋真係冇得選擇?

採訪、撰文:娛樂組

鍾意就快D Share啦!
Related Posts Plugin for WordPress, Blogger...