好難怪被人搶生意 的士司機惡行真係激死人 [FACE - 430] MF,

全知言

好難怪被人搶生意　的士司機惡行真係激死人

所謂樹大有枯枝，近來被討論得最多嘅，一定係的士司機的各種劣行，拒載踩油再急煞又急轉彎，有時仲會狂兜路，總之𠵱家喺香港地要搵架的士坐吓簡直難過登天！唔怪得被 Uber搶生意！

遇上最差的士司機後，可能嬲完一陣就無事，不過惡行唔可以就咁算數。全知言就俾個機會大家，一齊數爆啲劣質的士佬

Jeana：加兩舊都無車

我梗係有遇過差嘅的士司機啦，我直頭返到屋企用咗幾個鐘頭不斷打俾我啲朋友鬧囉！𠵱家啲的士好興唔過海，嗰時我病，啱啱睇完醫生，咁喺銅鑼灣諗住過返九龍返屋企，第一架車佢話無氣要入氣，我算！之後我排住隊 call車，已經行西隧再加二百蚊都係無車，跟住排咗差唔多 9個字至上到車。我覺得我已經加咗 200蚊都可以無人應我，佢哋咁叻倒不如唔好做的士司機

雨僑：司機打窗

喺的士站上車，因為佢唔肯去我去嘅目的地，佢拒絕我，咁我又堅持，因為嗰時我係隻腳斷骨所以我唔願意再行，點知佢喺車入面打個窗，又用個袋掟隔籬個位，即係精神崩潰嗰隻，最後我係要報警先 settle到呢件事。

周秀娜：去錯地方錢照收

試過喺第二度，因為唔識啲地方，又唔識語言，咁我就指住旅遊書嘅地圖話要去呢度，點知佢就喺馬路中間掉低咗我，又收咗我錢，我就問佢係咪呢度，咁佢又嘰呢咕嚕，最後我發現原來我落車嗰度係目的地嘅相反方向！

鍾采羲：遇多口司機

我曾經遇過一啲司機係好煩，佢哋好多嘢講，不斷迫你同佢傾偈，咁你唔好意思應佢又唔係，但係又唔想同佢講嘢，嗰程的士可能會搭得好辛苦，唔可以休息囉！

趙哲妤：遭連環拒載

有次夜媽媽喺中環搭的士，我要去一個好近嘅地方，個司機聽完，跟住佢即刻關窗走咗！之後我索性唔去搵朋友，返屋企啦，點知問第二個的士司機，同佢講去荃灣，個司機又係即刻關窗開車！即係遠又唔去近又唔去，真係好激氣！

街坊數惡行　司機當睇你唔到

的士司機有生意就照做，理得你係咪明星！所以明星被拒載、搵笨，市民又點會無吖？

葉小姐

兜路照俾錢

有次係兜路唔講俾你聽，跟住覺得唔對路之後照同佢理論，不過都係無計，佢都係照收你貴啲嗰個錢㗎喇！

杜先生

硬食粗口

嗰次出街唔記得帶錢，跟住上咗的士，之後同個司機講話車返屋企，攞番錢俾你，點知佢話唔使！都搭咗 70蚊，跟住個的士司機就話：「當我黑仔」跟住講一兩句粗口就俾我走喇。

廖先生

當俾 tips

有時得嗰 5毫子，咁就算啦，尾數就俾咗佢當 tips咁俾囉！

黃小姐

短程唔載

短程嘅話個司機會話不如你行過去深夜嘅話有時會有啲的士當睇你唔到囉！

即時報料 facepop

熱線： 9222 0828

電郵：facenews@nextmedia.com

facebook： Face Magazine inbox

line、 we chat id： facemagazine

鍾意就快D Share啦！

下一篇 》