2015年8月14日 星期五

全城估真假 胡楓:冇答案! 胡楓,

謝賢推着坐輪椅的曾江,與胡楓、Joe Junior在俄羅斯街頭遊覽。

全城估真假 胡楓:冇答案!

謝賢前日在宣傳無綫節目《4個小生去旅行》後,爆粗兼動粗怒摑曾江,成為全城熱話,引發坊間猜測事件孰真孰假,抑或半真半假(夾計宣傳,但郁手則屬乘機抽水假戲真做),兩位當事人謝賢及曾江昨對事件有限度封口,胡楓及Joe Junior則妙語解構,全城繼續為《4個小生去旅行》未出發先興奮!

79歲的謝賢與80歲的曾江被傳積怨多年,前日謝賢在宣傳活動結束後終於大爆發,七度爆粗狂鬧曾江拍攝時「詐跛」,因而怒摑對方,夾在中間的胡楓慘食無情掌,眼鏡被打到移位,曾江雖然「食唔應」,但助聽器亦被打甩。由於事件太過出人意表,事發時Joe Junior全程舉咪收音,表現冷靜,加上胡楓事後以「宣傳論」打圓場,令外界揣測整件事乃宣傳伎倆。

「永遠當佢朋友」

謝賢昨日被問是否夾計宣傳?他說:「都過咗去啦,收線啦。(曾江有冇打畀你?)仲講嚟做咩啫,都過咗去,唔記得喇!」隨即收線。

  • 放大圖片
  • 放大圖片
  • 放大圖片
曾江與太太焦姣一齊晚膳。
  • 曾江與太太焦姣一齊晚膳。

而曾江昨日黃昏時獨自由寓所步出,準備乘的士往尖沙咀與友人飯局,行路一拐拐的他被問到臉部痛不痛?他說:「唔痛,隻腳就痛,食咗藥喇。(謝賢有冇打電話畀你?)冇,最好依家見到佢!希望佢撞到我,大家揸吓手就算(佢摑到你塊面?)冇,佢打到胡楓,揩到吓我。」

之後曾江接受本報電話訪問,問他點睇外界猜測他們夾計宣傳,他說:「今次唔係囉!成件事我都幾驚訝。(有冇朋友做?)永遠當佢朋友。(17日去唔去飯局?)請我咪去,佢唔請,我點去?(你可以主動示好?)做主動嗰個唔係我,個波唔喺我度。(你話等謝賢道歉電話,佢話你要等佢入咗棺材先?)使乜道歉,有乜咁大件事啫。(太太焦姣有冇擔心你傷勢?)有冇咁大件事呀?你哋睇吓佢係發火啫,但有冇全力打?不過太太永遠擔心我,我好多時都令佢擔心。」

曾江昨晚與太太及友人飯局後,對於藉被打來宣傳,他笑笑口說:「我都希望係啦,哈哈!(同謝賢有積怨?)應該冇,係呢次,我都好耐冇見佢(謝賢請台前幕後17日飯局?)係呀,冇叫我。(自己到?)無謂(唔想再見?)我冇所謂。(有冇問候胡楓傷勢?)當時問咗,佢冇事。(謝賢)都唔係好大力打。」

當日夾在謝賢與曾江中間的胡楓,前日聲稱是宣傳,昨日就「褪軚」,他說:「我做乜咁老實,你哋認為係真就真,假就假,冇答案。(你又話係宣傳?)我冇講大話呀!但有車大炮啫!哈哈!(無綫叫你封口?)做乜唔畀我講啫!」他又得戚地表示事發時眼明手快,使出一招「顏面救江」,他說:「我其實手腳都敏捷!唔講啦,我出去傾九月演唱會啲嘢,(搵4個小生組四大天王演唱?)good idea!但謝賢一定話『好!睬你都傻!』」

「情願係我畀人呃」

Joe Junior被封「盡責收音師」,對於有傳事件是宣傳,他昨在電話中說:「我情願係我一個畀人呃,連佢哋都呃埋我,因為大家好朋友,想以和為貴,其實嗰日錄音,我哋四個有講有笑,我仲以為謝賢同曾江講笑,我太集中精神做嘢喇!」

有指《4》幕後工作人員早在拍外景時,已聽過謝賢說:「我打你(曾江)就上娛樂頭版!」故認為事件是謝賢自編自導自演的宣傳,不覺他動了真火,更不信是借勢將新仇舊恨一次過大爆發。而監製蘇敏儀被問會否將今次事件在節目中交代或向大家道歉?她斬釘截鐵地說:「唔會,呢個係旅遊節目,總之原本計劃係點就點樣播出街!」

文:影視組

攝:追蹤組

鍾意就快D Share啦!
Related Posts Plugin for WordPress, Blogger...