掃呢頁CODE去手機

2015年8月19日 星期三

扮杜如風《東征攻略》玩大咗 新城 DJ科林:要改名做杜如科 [FACE - 430] 杜如風,MF,



扮杜如風《東征攻略》玩大咗。杜如科扮杜如風非常神似,接受訪問時杜如科就好認真咁講:「如果杜如風你有睇我嘅片,希望你唔好嬲,我真係好鍾意你先彷效你。」杜如風未有男朋友喎,使唔使幫你做媒人?

爆 Like王

扮杜如風《東征攻略》玩大咗 新城 DJ科林:要改名做杜如科

睇咗杜如科未?唔係自認港女嗰個杜如風喎!係扮杜如風去東京,將《東京攻略》變做《東征攻略》,拍咗 4條片上 YouTube,學埋杜如風講嘢慢半拍,兼試埋杜如風介紹過嘅美食,網友笑爆追捧點擊迅即過 20萬。

但應該冇乜人知,呢位杜如科真身係 DJ科林,原名吳浩賢,喺新城電台主持節目《百萬 U.S.B》,既愛杜如風、又愛東京至拍片自娛,意外地一夜成名,更意外地玩大咗添!「我講過點擊過 10萬就改名杜如科,𠵱家要找數!」杜如科真係做咗杜如科,呢次點收科?

F:點解會扮杜如風拍《東征攻略》?

科:我好鍾意去東京,每年都去兩次,以為自己好叻,但睇咗佢嘅節目,原來好多地方我都冇去過,覺得好好睇,咁啱我去東京旅行,點解唔拍埋出嚟呢?睇吓啲嘢係咪真係咁好食,話埋畀觀眾聽;好多人話杜如風呢樣嗰樣,但我想話畀大家聽,佢介紹啲嘢係堅正!大部分我覺得好好食!

大部份網友覺得杜如科扮得搞笑,亦有網友認為佢太收斂唔夠杜如風咁放。

杜如風介紹過嘅菠蘿包同牛奶山埃等杜如科都有實地試食,佢話好辛苦:「我得 4日時間,食到搭車嘅時候反胃,好多人問點解冇龍蝦包,其實我有經過,但飽到一個地步,係望住或者聞到味都吞唔到口水嘅時候,係食唔落喇!」

F:覺得自己扮得似唔似?

科:好多人話我似,但其實當我放空,或者輕鬆啲嘅時候我都係咁慢㗎!我唔係扮,只係特登用多咗少少力啫!其實初初入行已係扮嘢為主,扮過 Cookies叫 Aunties,啲 90後可能唔知係咩嚟,我係第二代得 4個人,上網都未必搵到我,但當時好多大專騷做。我真身係電台 DJ科林,好多時講嘢好似好流利咁,其實我一講得快,會有好多啫、呀、即係咁,呢啲連接詞,只係將啲連接詞變咗停頓位,大家就覺得似杜如風喇!

上星期杜如科真係去咗入境處改名仲拍埋片上 YouTube,但改名手續太複雜,先要填妥改名契先,所以暫時未找到數。 網上圖片

F:係咪好似杜如風咁大使?

科:佢講過係使自己錢咋嘛,我唔覺得有問題,賺到錢去使有乜問題?佢鍾意買名牌我都鍾意,奈何有時未必買到啫!之前《流行首爾》有人話佢炫富,我冇咁誇張,但有錢嘅話買嘢冇問題吖!我以前多買鞋,𠵱家都係服飾多,我有 50對鞋咁上下唔算太多。我鍾意玩玩具、四驅車,例如 Michael Jackson公仔、矇面超人,今次旅行喺專門店買咗對波鞋,去日本都係搵啲香港買唔到或者炒到好貴嘅!

F:你要找數改名係乜嘢一回事?

科:因為《東征攻略》第 2集出嗰時口輕輕,話如果 YouTube是但一集過 10萬點擊,我就身份證改名做杜如科,點知 fb好快過咗 10萬,啲人催我找數,但我話明 YouTube喎,點知 YouTube第 3集真係過 10萬,咁咪改名找數囉!去咗入境處,原來好煩,要搵律師又要填改名契,又要排期,超驚阿媽鬧,電台有同事打畀阿媽,問佢我將科林改杜如科得唔得?阿媽話冇乜所謂,但佢唔知我改埋身份證呢!𠵱家好擔心!有啲啲後悔玩咁大(改咗名第時生仔要姓杜個喎!)係喎!冇諗咁多添,阿爸阿媽會殺咗我!

好多網友覺得杜如科好似第一代日劇《金田一》嘅堂本剛,杜如科於是決定拍攝《金田 four少年之事件簿》,女主角極可能係網絡紅人兼魔術師 Miss Hunny喎,預計 9月有得睇!

呢期杜如科勁 hit,我哋就同佢出旺角測試吓有冇人認得佢,下載 FACE Pop有得睇。

F:《 FACE》

科:杜如科

攝影:周倪瑩

髮型: Alex@Hair Corner

鍾意就快D Share啦!