掃呢頁CODE去手機

2015年8月19日 星期三

吊命 冇馬家收視插水 新《愛.回家》玩多半年斬 [FACE - 430] 愛.回家,MF,



黎諾懿現為新劇《純熟意外》開工,劇中飾演男二,同女主角蔡思貝有不少談情戲。上週六( 15日)在烏溪沙拍外景,對於新一輯《愛•回家》收視差,他說:「俾啲時間佢哋啦。」

真面目

吊命 冇馬家收視插水 新《愛.回家》玩多半年斬

大台死唔斷氣處境劇《愛•回家》第二輯,播咗超過一個月,首星期食住第一輯威勢,收視平均 25點,但之後就開始直線下挫,最近平均收視跌到 21點,好失威。

劇集收視半死,據知大台下令若收視冇起色,農曆年前就會腰斬。高層當然諗計起死回生,原想搵馬家全部人「回家」救亡,可惜馬家演員已四散各劇開工,想齊人埋位都要 11月。馬壯黎諾懿就話:「佢哋都係開始咗一個月啫,大家俾啲時間佢哋啦。」𠵱家就係冇時間呢最慘。

大台處境劇《愛•回家》第二輯,由張繼聰、黃翠如孭飛,頭一星期食住「新屎坑」兼第一輯舊粉絲,平均收視都有 25點,但威咗一星期後即開始向下沉,最近收視更跌到 21點,以大台嚟講絕對響起警號!最慘收視差口碑更差,其中翠如 BB更被狂踩睇到怕零演技,最近傳出若收視持續冇改善,農曆年就會收皮。

除咗第一週有威勢外,《愛•回家》收視插水落,平均 21點試過兩星期,掂住警戒線喇!

新一輯《愛•回家》由張繼聰、黃翠如孭飛,兩位甚有觀眾緣,可惜收視依然不理想。

翠如 BB自入大台後,機會多,觀眾緣都唔錯,不過最近就俾網民話佢曝光太多,就連啱啱播完嘅《超強選擇一分鐘》都唔應該出現。電視畫面

馬壯:唔好同我哋比!

《愛•回家》收視進入 ICU,高層亦諗計救亡,原本諗住要「馬家」一眾成員回歸,希望吸納舊粉絲「回家」,可惜「馬家」已四散各劇,蔣家旻拍緊《警犬巴打》 9月先完,徐榮忙拍新劇《巨輪 II》,他說:「我要開到 1月呀,播咗一個月啫,慢慢嚟啦,未聽過要我哋返去喎,觀眾睇多陣,熟悉咗佢哋,收視一定好番!」

而最受巴打歡迎的馬壯黎諾懿,正為新劇《純熟意外》開工,上週六(15日)黎諾懿在烏溪沙拍外景,他說:「未收到通知喎,我可能要拍到 10月,雖然開工但我都有睇新嘅一輯,我諗收視呢啲,大家觀眾俾啲時間佢哋啦,只係做咗一個月啫,唔可以攞我哋播咗三年去比較。」你肯俾時間啫,高層唔肯呀!

雖然孭飛新劇收視差,不過翠如 BB一樣紅爆,騷接騷,週日出席活動時騷長腿,係幾養眼嘅!

聽電視

第二輯男一張繼聰成日對住鏡頭講劇情,完全照顧師奶需求,但就令好多觀眾頂唔順太低智,加上同翠如 BB一早係情侶,追看性大減。

雖然新《愛.回家》收視一般,不過冇影響張繼聰嘅星途,首次做男一嘅《收規華》都會喺 8月底播,到時一晚見到佢兩次,實入晒屋

未夠班

除咗張繼聰、黃翠如外,新《愛》劇亦加了張震朗,吳業坤、何君誠、龔嘉欣,戲份不少,但後生仔都未必識佢哋,何況睇開 8點嘅師奶,收視低係正常。網上圖片

搵馬家救亡?

徐榮(馬強)

我拍嗰陣,冇睇收視,俾啲時間煲吓(真實對白)

蔣家旻(馬子妮)

我拍到 10月,不過冇收到通知呀!(真實對白)

羅天宇(馬子仁)

唔知道呀,冇收到通知!(真實對白)

《愛.回家》風光過

新一輯《愛回家》收視仆直,但《愛.回家》播咗超過 3年,都曾經威過㗎, 12年收視最高試過 38點,當時講馬壯生母之謎,講到尾《愛•回家》都係靠馬家食糊。

網上圖片

馬壯同德如嘅戀情,亦係《愛》迷追劇原因,可惜第一輯結局朱慧敏得 2分鐘出現,令粉絲相當失望。網上圖片

最高收視係 12年創下,第 55集《因母之名》,馬虎向馬壯交待生母一事,最高 38點,平均 28點。網上圖片

除咗馬家外,近年多人談論嘅係木偶哥,馬子仁同思思嘅戀情。網上圖片

採訪、撰文、攝影:娛樂組

鍾意就快D Share啦!