大台嘅小生、花旦買少見少，除左因為外邊更好撈之外，製作質素都好重要，如果拍正啲渣野，又真係搞到個人冇晒心機囉！
喺電視圈撈咗好多年嘅李家鼎（鼎爺），見慣風浪，都開始有怨言呀！鼎爺早排接受新城知訊台《娛樂旗艦店》主持路芙同董敏莉訪問，喪插大台啲劇集製作馬虎，演員顧住玩手機，冇心學嘢。鼎爺更加寸嘴話唔怕無綫追究﹕「我唔怕得罪人0架，仲有幾個月合約啫！炒咪炒囉。」
鼎爺話大台劇組根本冇認真做資料搜集，有好多古裝對白嘅文法錯得離譜，又唔根據真實歷史背景，連一啲朝代嘅年份都計錯，搞到要重拍，但有時啲劇組係懶得改，鼎爺話﹕「提議咗，但佢哋唔改，話求其最後咪搞到收投訴信囉！」
鼎爺覺得0依家香港嘅劇集製作，比內地劇仲馬虎，戲服特色係需要配合朝代，但港劇成日着錯戲服，反而內地劇組會仔細考究，例如會到博物館問教授意見。鼎爺仲話﹕「故事內容應該最少要有70%係真實，但香港嗰啲全部都係呃神騙鬼。」
插完製作，鼎爺又講到演員嘅問題，佢覺得好演員唔應該跟足晒劇本，要用對白就番自己嘅風格：「但係好多演員，雖然背熟晒對白，其實根本唔知道自己噏緊乜，尤其係新嗰班，根本冇心學，顧住玩手機。」
講完工作，又轉下話題講家庭，鼎爺笑話細個家教好嚴，食飯好似行刑、寫字就係受罪，連寫毛筆字都有口訣。因為喺嚴厲家教環境下長大，所以自己對工作都好認真嚴謹，拍劇從來冇遲到，更加唔會拍拍下周圍去玩﹕「如果連自己都唔尊重，人地都唔會尊重你。0依家啲後生連基本禮貌都唔識，見到長輩都唔會有禮貌打招呼。」
|
鍾意就快D Share啦！
|
|
|
