早前有傳姚樂怡懷孕，但可能怕小器嘅關係，所以佢一直都冇承認過，直至今日，姚樂怡喺微博貼咗張大肚嘅相，可以大大聲宣布自己已經有咗四個幾月身孕喇。
而本報記者今日打去恭喜姚樂怡，佢就話自己好開心同期待，佢就話未知係男仔定女仔，佢仲話預產期係明年一月一日，姚樂怡表示：「同我睇婦科醫生一樣，都係一月一日，聽聞一月一日小朋友好聰明，唔知呀，要近小小日子先知，可能會早少少未定，但預產期係一月一日。」
問到佢有冇作嘔呢啲懷孕跡象？佢就話：「頭三個月都冇作嘔，但就有其他嘢，冇作嘔，食唔到其他嘢，所以頭兩三個月反而瘦咗五六磅，因為個肚一到六點鐘，係好準時脹，好似飲完可樂會『嗝』，一晚五六十下，頂到食唔到嘢，冇胃口，係過咗三個月好啲，但跟住就皮膚敏感，睇咗兩個皮膚專科醫生，都話冇辦法喇，好多孕婦都會皮膚敏感，因為荷爾蒙唔同咗，仲記得睇其中一個皮膚醫生，佢仲話可能要痕到生為止，因為好多大肚婆都係咁，荷爾蒙問題，荷爾蒙越來越多，會越來越痕。」
姚樂怡續說：「我話咁點算？醫生話唔敢畀類固醇嘅藥我食，適量可以畀我搽，但治唔到個底，佢話痕到生為止，我即刻喺診所喊，連續五日都瞓唔到，每晚total瞓幾個鐘，個幾鐘醒一次，係痕醒，個幾鐘醒一次再搽藥膏，之後要用冰敷，等佢唔好咁痕，連續五日都喺咁，即係嚟緊五六個月都痕到冇得瞓，人都癲，好彩後來遇到有人介紹一隻冇類固醇cream，搽咗一星期就好返，真係感恩，如果真係五六個月冇得瞓，精神壓力幾大，對BB都唔好。」
姚樂怡又話生BB係大project：「雖然我冇嘔，但好多問題，一係成口痱滋，但唔可以搽藥用嘢，變咗要用鹽水漱口，痱滋好完又生，醫生話好多孕婦都係咁。」
|
鍾意就快D Share啦！
|
|
|
