2015年9月17日 星期四

一日錄近40萬點擊 FFx騎呢MV 成本$900



今年六月,「廣告狂人」fb專頁先至爆出,保險公司宏利有職員希望以$500,製作3段合共3分鐘嘅「上太空」宣傳片,內容要有森林、太空船同上空。

$500製作費唔係做唔到,事件曝光後,網民集思廣益製作多輯$500唔使嘅片段,但效果當然係……$500,不止侮辱業界專業,同樣亦是mission impossible。原來呢個FFx《SUGAR BABY》MV,成本只需$900。啲錢使咗去邊?FFx經理人Sam承認,今次只係用咗$900,啲錢係用咗去租借拍攝器材之用。

$900換來近36萬點擊(截至今晚8時),同一萬個負評,抵到爛,仲帶挈FFx成為網絡紅人添。咁隊crew唔使人工?睇埋落去就明。

呢個MV,原來拍於一年前,網民瘋狂改圖強烈恥笑,難為片尾出credit嗰班導演、攝影師同工作人員,今次真係「出晒名」,想扮事不關己都難。一名自稱有份拍攝嘅assistant camera operator,就於fb爆seed,大家先至知原來筆直得$900!

呢位攝影師助理寫道:「今日黃昏有一班朋友WhatsApp、inbox小弟,問題如下:『你拍0架?Ass camera operator係你?』食飯嗰陣,附近的人都不停播,不停笑。

「(略)一年前!我去咗探另一班crew,諗住睇下拍成點,點知個仆街經理人budget只得900元正,我唔忍心一班有熱誠的年輕小伙子被人欺壓,俾個咁的X樣欺壓,所以我落場做個小打雜!諗住幫幫手。

「唔好怪點解隊crew拍成咁,有啲page仲話,冇執色,冇化妝,冇排舞!成隊crew 10個呀!水都冇滴,飯都冇得食呀!器材都已經佔成嚿budget,你以為好過癮呀?」

呢位「小打雜」並列出今次拍mv最大問題,係經理人同監製:

1.想用$900拍到$30,000至$50,000質素的經理人,連水同食物嘅錢都唔俾隊crew;

2.接個job返嚟、之後長期潛水的所謂監製。前期傾劇本唔見人,中期拍嘢唔見人,後期剪片又唔理,交片都係個導演自己交,budget更加唔去傾。

最後「小打雜」怒道:「由個客欺壓一班有熱誠夢想的學生哥!(略)隊crew已經盡咗力,問心無愧!」

《蘋果》即搵咗FFx經理人阿Sam。Sam話:「只係我想講,大家當初合力做好件事,拍MV,當中好清楚冇偷呃拐騙成份,拍攝人員當日好正常,冇不良表現,拍攝隊內部問題我冇任何意見,有問題可以當時提出同唔拍嘛,無強迫。」

Sam續謂:「依家今日才爆料,有啲唔明白。重申係班學生好努力,希望網民唔好搞佢哋,佢哋唔係藝人,冇抵抗能力,比網民追殺會好慘。」

至於budget只係得900蚊,阿Sam就話:「$900係租器材錢,學生冇收錢,我唔想個學生搞手俾人誤會落格。」

鍾意就快D Share啦!
Related Posts Plugin for WordPress, Blogger...