熱爆娛樂: 大台辣招綁人　馬國明反抗入雪櫃 [壹週刊

2015年9月17日星期四

大台辣招綁人　馬國明反抗入雪櫃 [壹週刊 - 1332] 大台,馬國明,M1,TVB

探熱針

大台辣招綁人　馬國明反抗入雪櫃

大台無綫經歷前所未有的逃亡潮，過去大半年，已經先後有九個藝人離巢，仲要個個都有番咁上下，其中包括胡杏兒、徐子珊、陳茵媺、郭羨妮、吳卓羲及阿姐級的李司棋、關菊英都前後腳閃，至於即將約滿的林欣彤亦去意已決。

逃亡風不息更愈吹愈急勁，眼見未來陳豪、佘詩曼、黃宗澤、鄭嘉穎等排住隊滿約，大台四大高層（李寶安、余詠珊、曾勵珍及區偉林）最近勒令一眾藝員返公司面聖，並以高壓手段，逼大家加簽合約，如有不從，即時入雪櫃，第一個被祭旗，就係馬國明。

四大高層聯手

大台無綫的逃亡人數，同歐盟要面對的難民一樣，有增無減。明年二月，一哥陳豪和一姐佘詩曼相繼約滿，二人亦放晒聲氣，暗示續約機會微，至於已疊埋心水北上發展的黃宗澤，亦與內地華誼兄弟傾得八八九九，只要一夠鐘，就閃！一旦保唔住這兩王一后，大台再無一線小生花旦，全線清倉。

有見及此，後知後覺無綫高層終於知驚！李寶安、余詠珊、曾勵珍及區偉林，最近頻頻安排一班即將約滿，甚至仍有三、四年合約的一線和二線藝員，連可能有機會上位的都唔放過，全部返公司面聖，四大高層聯手，逼大家加簽合約。

據了解，已被召見的藝人包括陳展鵬、馬國明、胡定欣、鍾嘉欣、田蕊妮、蕭正楠、岑麗香、王浩信、朱千雪及黃智雯……等。

「接到通知都知唔妥，返到去見四個高層坐晒喺度，真係嚇到癲咗！佢哋最初都好客氣，問吓我拍劇拍成點，有乜意見咁，之後就開始入正題，話嚟緊公司會有新政策，會捧啲同公司有較耐約嘅人，叫我加簽，仲要唔俾時間考慮，盡快答應。

「我知道有啲人唔肯答應，或者話要諗諗先，佢哋就即刻反面，話咁樣公司好難會再俾資源捧我哋，暗示會雪藏，所以仲有兩年或者以上約嘅人，好多都冇得反抗，焗住答應，如果唔係，一定冇運行。」一名有份被召見的藝人說。

大台四大高層李寶安、區偉林、曾勵珍同余詠珊（左起），聯手逼藝員加簽留人。

黃宗澤近年狂接大陸劇，一早已決定約滿就北上掘金。

陳茵媺已約滿走人，陳豪亦很大機會跟住走，然後與前經理人陳嘉莉自組公司。

即時開刀抽劇

據了解，馬國明首當其衝，因為唔肯就範，公司殺一儆百，立即向馬明開刀，送他入雪櫃。馬國明孭飛的《流氓皇帝》，原本安排在八月初播出，但因為被懲處，劇集在出街前兩星期突然被抽起，改播王浩信主演的《樓奴》，直接將馬國明踢出今年爭視帝之列。

其實六月拍完《為食神探》後，至今年年底進入籌備階段的新劇，一套都沒有馬國明份，其間他只被安排做一些冇一線小生肯做的海外宣傳，又或者配腳上一些蚊型綜藝節目，做咗都冇人知。

有馬國明做人辦，一班上位中近一線的藝人例如胡定欣、陳展鵬和蕭正楠，都唔敢再扭計，以免倒跌淪為配角，就範答應加簽。

上個月，馬國明與唐詩詠到海外宣傳，求其安排一些工作給他。

自從六月同岑麗香拍完《為食神探》後，馬國明未有再被安排拍劇。

一線藝員甚少要上綜藝節目，但馬國明卻要上《活得健康嗎》，做埋一堆騎呢測試。

七月馬國明同周麗淇已為《流氓皇帝》拍了宣傳片，點知臨時被抽起。

胡杏兒原本度晒期做《陪著你走》宣傳，但因為過檔蕭定一公司，結果被大台封殺，禁止她現身宣傳活動。

求苟姑娘留多一年

至於今個月約滿的苟芸慧，受甲狀腺問題影響，體形暴脹，早已被公司放棄，苟姑娘亦死心，準備走人，而大台原本亦冇打算挽留，但見流失量有如肚瀉，為了公司面子，竟掉轉頭求苟芸慧留多一年，希望風頭火勢，留得一個得一個。

不過，留得住苟芸慧，留唔住關菊英、林欣彤，唱得演得的菊姐月前已無聲無色約滿離開，準備明年為 nowTV，與李司棋、夏雨等一眾《溏心風暴》班底再合作拍劇；而林欣彤的合約尚餘唔夠兩個月，據知她已經搵到後路，合約一滿，即撇。