掃呢頁CODE去手機

2015年9月17日 星期四

實機試玩 新 iPhone買?定唔買? [壹週刊 - 1332 - 生活] iPhone,M1,



任你點睇,都未必睇得出新 iPhone同 6/ 6s外形上的分別,因為……係無嘅。

壹科林

實機試玩 新 iPhone買?定唔買?

一年容易又 iPhone,作為 iPhone迷,每年等 iPhone推出,期待度肯肯定重要過 Boxing Day拆禮物。

講名,當然無驚喜,照例跟族譜改, iPhone 6s/ 6s Plus,但注入更多新功能。

之不過今次不同的,是毋須等香港出貨先有機試,索性直接飛去三藩市現場,先睇 Tim Cook表演,再玩新 iPhone,試清試楚,究竟吸引力可以去到幾盡!

如果屬炒機一族,以下成篇文,無謂嘥你時間,可以直接 skip,因為就算講到部機幾差,你點都會買,仲會出埋「機械人」日夜守候,之不過,假如用緊 iPhone 6,諗住外形一樣,無必要換機,只能講句「年輕人,你太天真,信不信我外形不變,一樣可以叫你換機?」的而且確,睇完 iPhone 6s/ 6s Plus新功能,以下幾個原因,已經叫你好難忍到手。

原因 1: 3D Touch屏幕

首次現身 iPhone身上的 3D Touch,可根據手指壓力,而決定彈出功能選單,即是話用少少力㩒一㩒(比平時點一點,要用少少力),就可以彈出選單,例如在微博圖示,㩒一㩒就會出現選單,問你想找、睇片定出新 post,如果在電郵畫面,電郵內容有日期,㩒實就會跳出臨時行事曆視窗,放手就會自動關閉,講到尾,一隻手指搞掂晒。

3D Touch其實好易上手,玩慣玩熟之後,好難返轉頭。

3D Touch另一方便位,是㩒實畫面之後,可以即時進行其他功能,例如刪除郵件。

原因 2: 1200萬像素相機

像素提升,影相更靚,同阿媽等於女人般廢話,不過加入 4K拍攝,就肯定最實用,即場睇片,畫質已經好細緻,點知雙指一拉,放大之後,忍不住都要嘩一聲,每條毛都睇到清清楚楚,就算屋企無 4K電視,拍完 4K片,喺手機睇,依然好過癮,最後一提,前置相機亦都升級到 500萬像素,玩自拍,女友肯定更省鏡,交都嗌少好多。

後置相機升級到 1200萬像素,不過照舊凸起,又驚又喜。

無 4K電視,拍 4K又關我事?查實拍完可以即時手機重播,兼且能夠隨時放大睇,這就是 4K。

原因 3:兩隻新色

為襯番一套而推出的同色充電機座,實物質素同電腦商場貨色有得比,即是無.驚.喜。

幾乎在徇眾要求之下,新加入玫瑰金及粉紅兩隻色,前者,絕對是食住高級手錶熱潮,當手上戴住隻玫瑰金 Patek Philippe,無理由唔襯番一套;後者,冧盡萬千少女心,就算男士們,都好難置身事外,女友話要,你無理由唔買。

大到離譜  iPad Pro

其實發布會上, iPad Pro比 iPhone更早出場,亦是會上第一個高潮,皆因 12.9吋屏幕,視覺上已經好震撼,拎埋上手,多數講一句:「嘩,咁輕!」叫得 Pro,規格肯定最高, A9X處理器兼經過大升後的圖像處理器,用 iMovie剪片,加埋機身四個喇叭,應該仲爽過部兩年前出的 Macbook。之不過今次 iPad Pro焦點,竟然俾拍檔 Apple Pencil( 99美元)搶了鏡,可以感應筆尖壓力,寫粗定寫幼,完全無難度,買得 iPad Pro,肯定要買埋,而 iPad Pro十一月先開賣, 799美元(約$6,230)起。

恃住屏幕夠大,隨時可以進行多工作業,兼且畫面一開二,好睇好睇。

同場配件仲有個可摺式鍵盤,以磁石連接 iPad Pro,黐埋就打得。

神奇的 Apple Pencil,玩壓力感應,但只支援 iPad Pro,其他 iPad無份。

發晒皮氣  Apple Watch

今次 Apple Watch都有出場,不過新款欠奉,同新 iPhone一樣,加入玫瑰金及粉紅色,(膠)錶帶亦新追加鮮紅色,較有驚喜是跟 Hermès合作,推出好有 fashion味的皮錶帶,擺明打女果粉主意。

新色雖然中規中矩,但實物幾討好,未入手的,買得過。

又 Wii又 Siri  Apple TV

今次全新 Apple TV,用上不少時間解說,皆因新功能勁多,新頻道未必關香港人事,唔講,最重要是全新遙控器,可支援 Siri之餘,仲好似 Wii手掣,對應體感操作,所以買部 Apple TV,無電視睇,都可以打機問天氣。

玫瑰金最好炒

新一代 iPhone登場,果粉最關心的,當然是新機仲有無得炒。要知這個問題,當然要去搵香港最大易手 iPhone集散地,旺角先達的 G-World老闆劉志剛( Lo哥)分析:「其實只要係 iPhone,都一定有得炒,至於炒幾耐,今次就好難講,因為香港同大陸同步推出,仲要大陸可以上網訂,香港貨源又分薄,所以個炒價都未必靚。」

不過, Lo哥指出,就算大陸都有得賣,但始終國內需求大,所以最少頭一個月都會炒得起。「今次推出玫瑰金新色,憑過往經驗都知點都有得炒,尤其是開賣第一日頭一個小時內,如果拎到機就即刻拎去先達,回收價最少賺一倍,始終剛開始,大陸點多都未必夠貨滿足龐大需求。

炒機準備

今次以 AOS方式賣機,買到與否睇彩數,隨時要落幾次單先中到一次。

今次新機在 9月 12日已經開始預訂,出書時雖然已經無得訂頭批,但難保之後仲有機會,當然要做足準備功夫。今次玩法主要是 AOS( Apple Online Store),即是限時鬥快搶,預訂後直接寄到家中。想訂 iPhone,就要記住以下網址:http://www.apple.com/hk-zh/shop/buy-iphone/iphone6s

最好先 bookmark定,得閒留意有無話幾時有得賣,夠鐘即刻入去。其次當然要預備好 Apple ID同信用卡,揀型號顏色一定要夠快。不過就算手快,都隨時要等兩個星期先有機,運氣差就可能要等一個月。至於最差情況,就是俾 Apple cut單,總之一句:「睇你彩數。」

醒多句

最意想不到中國同香港同時開賣, Lo哥都話對炒價有影響,不過影響幾多,就要等 Apple出貨先知。

炒機除了要買玫瑰金, Lo哥話買 16GB最穩陣,因為價錢比較低,就算炒不起都不怕蝕入肉,買得太貴,大陸又多貨,就隨時變「蟹貨」。

撰文:劉耀祥、蘆甘

攝影:劉耀祥(美國三藩市)

features.nextmedia.com

鍾意就快D Share啦!