探熱針
唔識貨：肉價 40萬 俾王晶飛 袁嘉敏：唔搵我係佢損失！
《鴨王》收得，頭炮孭飛露點的袁嘉敏立晒功兼成為焦點，不過剝衫壓力大變抑鬱，以至宣傳失場，又跟戲中男女對手鬧不和，王晶月底開拍續集，為免麻煩搞到自己，決定起用新晶女郎文凱玲及唐紫睿做膽，原裝的袁嘉敏慘被飛出局。打算脫價加一倍先再剝，自信爆棚的袁嘉敏一口葡萄：唔搵我，係佢哋損失！
請王晶返屋企坐
為《鴨王》脫出可觀票房的袁嘉敏，有膽識有演技，可惜欠人緣。近日王晶埋班開《鴨王 2》，卻選擇起用身材縮一 cup的文凱玲，由三級「降 grade」到 2B級，也要將惹火的袁嘉敏飛出局。
收到風《鴨王 2》冇自己份，袁嘉敏說第一個反應係：打……俾……王……晶！
「我唔知開第二集，咪打俾王晶問吓，不過佢話呢套戲唔係《鴨王》延續版，係輕喜劇，主要係講何浩文做鴨，其他女主角做妓女，雞鴨戀咁囉！」袁嘉敏說。
至於是否覺得王晶所言，是出於安撫，她說：「我同佢關係冇安撫成分，只係坦白攤開嚟講，冇乜感情。我哋一路有保持聯絡，之前我有請佢食飯。我搬新屋，都有請佢上嚟坐。」公關功夫做足，但於事無補。
嫌人身材冇睇頭
「我了解後，個古仔講雞鴨戀，又係成班女人圍住男主角，其實對我嚟講唔係咁有意慾去做。再拍嘅話，我希望焦點喺女主角身上，男仔做配角。」袁嘉敏的不屑，充滿葡萄。
飛走原裝正版，《鴨王》賣點難免打折扣！
「我覺得任何人唔搵我都係損失。《鴨王》最後收六百幾萬，我絕對交到差。之前喺街有人記得我係《殺破狼》入面嘅兇狠老婆，而唔係之前脫嗰個角色，咁係要做到一定水準，先唔會俾人只記住某一個形象。」袁嘉敏說。
換上文凱玲（ Connie）、鍾采羲（ Iris）及有份冧庄的唐紫睿（ Hazel）， D Cup以下的陣容，袁嘉敏興趣一般！
「嗰幾個女仔瘦削咗啲，我比較鍾意睇豐滿嘅，銀幕上觀感係豐乳盛臀會好啲，所以唔係好知啲情慾戲到時點拍，或者鏡頭可以影到佢哋有曲線嘅。不過印象中，文凱玲係斯文靚女，記得《鴨王》佢有嚟睇首映，希望佢哋到時首映都俾飛我睇！」
加價一倍先再剝
收二十萬剝衫拍《鴨王》後，袁嘉敏至今仍未發市，主要收入靠內地登台。
「呢半年都有兩套戲搵我做女主角，要求同樣都係要裸露。但除非係去參展嘅藝術片，好似鍾麗緹嘅《晚孃》，仲要睇同監製、導演夾唔夾，先考慮再大膽演出。如果純粹係商業片，我就要加價一倍（四十萬）先拍。」袁嘉敏說。
撰文、攝影、攝錄：娛樂組
nextplus.nextmedia.com
|
鍾意就快D Share啦！
|
|
|
