探熱針
冧出面：無綫加簽箍五年 大狀男友撐麥明詩入娛圈：佢好完美
見今年出爐港姐麥明詩人氣盛，樂易玲決定提前補倉，要求今屆三名港姐，簽約年期加至五年。女友一夜成名，大狀男友林作被大起底，又被爆落區選議員做政壇新人；對於十優女友要入娛圈發展，林作日前接受訪問表態支持，更力讚麥明詩好完美。
大媽緊張𥄫實
上週四（九月十日）晚，四位得獎港姐在大媽樂易玲率領下，一行六人到仁愛堂慈善演唱會，由於冠軍是眾矢之的，樂大媽亦有備而來，全程𥄫實外，更預先篩選傳媒訪問；被教路過的麥明詩，亦只有官式回應有關大狀男友林作參選區議員一事，聲稱未必有時間用行動支持對方。
「樂小姐對今屆港姐特別緊張，事關公司走咗好多花旦，舊年嗰屆港姐又上唔到，今屆一出已經咁有人氣，所以佢係咁 mark實，尤其係麥明詩，已經有內地廣告搵佢，所以公司要加簽五年約，但冠亞軍嘅屋企人都唔簡單，做事好謹慎，而家仲睇緊份合約，冇即刻應承。」一名無綫人說。
開腔講女友
參選港姐期間，麥明詩已經是非不斷，男友林作間中以幽默方式在 ig曲線表態支持；上週四，本刊在上環一間酒吧遇見林大狀，他首次開腔講有關「人生勝利組」港姐女友。
壹：壹週刊 林：林作
壹：點解麥明詩最初唔認你係男朋友？
林：而家都冇認，都係你哋話啫。
壹：兩人關係係點？
林：好朋友囉，佢都話互相支持，一齊成熟嘛。
壹：係咪支持佢參選港姐？
林：大家朋友都支持。
壹：佢支持你參選區議員？
林：我冇話過參選，你哋寫啫。
壹：麥明詩俾其他女仔杯葛，係咪好大壓力？
林：係咩？我唔知。
純粹路過
壹：點解會去西九活動？
林：我唔係特登去，有個男仔朋友（係何猷亨）要去嗰個活動，我又要去附近，咪坐佢順風車，𥄫吓囉！睇吓就走。其實我路過，都幾尷尬。
壹：你喺 ig寫個活動好 boring？
林：睇兩眼，覺得悶悶哋咪走囉。
壹：佢得獎後有冇慶祝？
林：冇（會唔會？）朋友食吓飯，飲杯嘢梗係會嘅。
壹：贊唔贊成女友入娛樂圈？
林：冇話贊唔贊成，佢自己諗。
好難揀
壹：外邊覺得佢讀書咁叻，好似有啲浪費？
林：新一輩諗嘢唔同，後生仔有唔同諗法好正常，幾過癮呀，佢而家咁叻，又走去做港姐。
壹：佢講過有興趣從政？
林：佢而家仲有冇興趣呀？我覺佢應該拍劇做花旦。（咩類型電視劇啱佢？）佢乜都得，佢咁好戲，應該得嘅，我唔知，訓練吓應該得，佢咁叻女。
壹：你覺得佢咩嘢最叻？
林：好難揀，佢咁多嘢都咁叻。
壹：咁最欣賞女友邊方面？
林：真係揀唔落手，真係唔知，真係好完美。
能夠成為牛津大狀男友眼中的完美，麥明詩果然超班。
Order飯局
十優港姐麥明詩當選冠軍，加冕時台上被隱形冇人恭賀，全城熱話。贏獎輸人緣，無綫覺失禮，向其他港姐施壓。收 order的冠亞季唔敢逆旨，上週三（九日），麥明詩做老細宴客，請晒入圍的十二位佳麗，去上環食日本菜，借飯局打交道。亞軍龐卓欣為洗脫帶頭杯葛死敵的罪名，主動將飯局相放上網，展示友誼已由被迫拖手仔，發展至坐埋一齊有講有笑。港姐呢餐飯，交足戲！
撰文、攝影、攝錄：娛樂組
nextplus.nextmedia.com
|
鍾意就快D Share啦！
|
|
|
