2015年12月16日 星期三

自爆窒過叻哥 李思捷發癲 司徒夾帶:俾 TVB剪走晒係陰謀! [FACE - 447 - 專訪] __,思捷,司徒夾帶,TVB,李思捷,MF,

真人騷自爆窒過叻哥 李思捷發癲 司徒夾帶:俾TVB剪走晒係陰謀!33歲的陳學鳴,是Umovie的中堅份子,也是第一代港產YouTuber。07年開始,他為求突破,粉墨登場惡搞司徒法正扮司徒夾帶,結果仲紅過捉鬼大師本尊;今年再求突破,應邀錄影大台節目《網絡挑機》,結果出街開始多人認得俾人捉住影相,同時因為對住叻哥陳百祥表現得不如平時伶牙俐齒,亦都多咗更多負皮。好哋哋在網絡界經已有一番作為(講緊Umo ...


真人騷

自爆窒過叻哥 李思捷發癲 司徒夾帶:俾 TVB剪走晒係陰謀!

33歲的陳學鳴,是 Umovie的中堅份子,也是第一代港產 YouTuber。

07年開始,他為求突破,粉墨登場惡搞司徒法正扮司徒夾帶,結果仲紅過捉鬼大師本尊;今年再求突破,應邀錄影大台節目《網絡挑機》,結果出街開始多人認得俾人捉住影相,同時因為對住叻哥陳百祥表現得不如平時伶牙俐齒,亦都多咗更多負皮。

好哋哋在網絡界經已有一番作為(講緊 Umovie喺 YouTube有 20萬訂閱,個人 fanpage都有 18萬個 like),上咩大台呢?既然上得大台面對面,點解唔把握機會窒爆叻哥呢?你唔窒得罪萬千網民嘅叻哥,咪就得罪萬千網民囉……

以上問題,夾帶不慌不忙逐個解畫:

「一咩番作為呢?我今日先見到個留言,話我係過街老鼠!」

「其實我同叻哥係互窒㗎!其實我有問佢有冇睇 TVB,佢都唔識答㗎!不過俾 TVB剪晒咋嘛!」

「其實仲有第二個做嘅訪問,係李思捷脫晒軌黐晒線,唔只冇得出街,直情係冇得留底添!佢咁剪梗係有佢陰謀啦,冇辦法,你面對 TVB冇辦法要求公平!」

「係囉,咁我又上 TVB?因為全世界最多講廣東話嘅人喺深圳河以北,因為再唔拉多啲睇開 TVB嘅人上網,香港網絡咪就係塘水滾塘魚囉。我想發展,想香港養到 Bomba,養到熊仔頭,養到司徒夾帶呀,俾我揀幾多次, TVB,我都一定上!」

這一番話,我聽到的重點是深圳河以北,是發展,是「養」到。

我想起聽過王晶說:「港產片你估真係拍俾香港人睇,咪又係一盤生意!」,也記起他的確在《網絡挑機》講過:「你就會永遠覺得被加租很可憐!」,我還想到那個以為 45個 like同 share就是無限商機的港媽。你怪司徒夾帶唔型?你話人值入廣告向錢看?你鬧班 YouTuber上大台自己攞嚟?

其實我想講, YouTuber唔係虛擬人物,食花生 cap圖係唔會食得飽,真係冇可能派 like同 share俾隊 crew當出糧囉。

網絡的事唔報導,平行時空呀?

你同所謂的藝人不同在,一般人捲入公關災難時唔敢做訪問,你唔怕嘅?

首先我唔覺得佢係公關災難,呢個災難係網民說法,另外,你會發覺網上聲音同街上面嘅好唔同。呢兩個禮拜我出親街,都有市民認得我。同埋喺網絡上,今次係最多朋友 pm、 inbox鼓勵我嘅一次。我亦都好明個文化走勢,頭嗰幾日負評爆破得太快,你再負評,好似已經唔再花生,所以個風向都開始轉……連我再出新片,好評都多番,所以我唔覺得係一個災難。上 TVB呢件事,你俾我揀多幾多次我都要上,我別無選擇。

點解一定要上呢?

因為香港網絡業界實在太狹窄,個認受性亦都低,以一個經濟角度睇,我哋香港創作嘅片要講廣東話,咁全世界大部份講廣東話嘅人其實睇唔到我哋啲片……因為佢哋喺深圳河以北。另外,我哋講香港文化好「地」嘅人,離開香港太耐嘅人已經睇唔明,呢啲比起鄰近地區都蝕底咗,再加上香港本土傳統媒體,唔知係夾埋定專登,唔多提網絡上件事……除非嗰件事真係好大好大……香港網絡人要提升認受性,講白啲,即係想多啲人識,一定唔可以只在網絡世界塘水滾塘魚。

王晶以前做訪問講過,咩集體回憶咩港產片其實都唔係拍俾香港人睇,都係一盤生意。你咁講法,做 YouTuber其實都係一盤生意?都係想過條深圳河?

我哋嘅原意唔係一盤生意,我亦都唔希罕去做生意,只不過營運落去……如果要發展,首先你要營運到呀,即係你永遠有份正職、唔係全職 YouTuber你唔會發展到吖嘛,如果要發展,將佢生意化係避免唔到,無可奈何地要咁做。我同王晶睇法唔同,我依然係想拍嘢俾香港人睇,我從來冇將其他市場放於香港之上,所以我要上 TVB,就係要嗰啲唔上網睇 TVB嘅人,都留意我哋,都知道香港本土呢班網絡人。

王晶喺節目亦都講咗另一番說話,話當你成長,當你老婆仔女問你攞錢開飯……

我認同㗎,咪就係營運囉!我自己都係一個網民,呢啲嘢咪唔型囉!有負擔咪就係唔型囉!仲有一個最嚴重問題,係我喺眾多 YouTuber裡邊,我嘅負擔最重。因為我要養隊 crew,我要養一間 production house。所以我睇到嘅嘢,見到嘅業界發展,我係擔心嘅。咁樣塘水滾塘魚,香港呢班網絡人靠原有呢班養唔養到呢?呢塊餅有冇辦法加大呢?啱啱今日出咗香港 YouTube十大短片,裡面有六、七條都係 Bomba出品…… Bomba係目前香港最優秀嘅一條 channel,你唔知邊個唔緊要,唔係你有問題,係怪媒體。喂!十條片攞六、七條,即係十大中文金曲,一個單位攞咗六、七隻歌喎,冇人講嘅?平行時空呀?

所以上完 TVB,你見到啲咩實際改變?

睇嘅人多咗,認得嘅人多咗,有啲新嘅聲音,俾正評嘅人多咗, pm我鼓勵我嘅人多咗,當然負評一定比例係多啲,但數量多咗,而好多 pm嘅人係唔敢喺出邊留言,我啱啱去完台灣,有個女人搵我影相,都係第一次發生……我𠵱家仲體驗緊,仲經歷緊,未識答住。

某程度上,網絡又的確係平行時空喎!

但係其他地方唔係吖嘛!喺台灣唔係呢!唔係平行得咁緊要呢!人哋係有交叉點㗎!呢個係唔正常㗎,係改變緊,但相比於鄰近地區一定係慢,即係話發展亦都一定會落後。

你頭先話 inbox鼓勵嘅唔敢喺出邊留言?點解呢?因為大家覺得網民太癲?

我唔定性佢哋係癲,我明白佢哋做緊乜嘢,佢哋上得網,就係要搵個位留言、搵個位發洩,我哋做得,預咗,正如行得入 TVB,預咗。但係留言 inbox嘅朋友,佢哋唔敢抗衡呢啲聲音,因為好似大部份人係插,你唔插,咪唔跟大圍囉!我幾擔心,係大家都想跟大圍,其實我哋拍得片擺上網,就係唔想跟大圍,唔係跟大圍嗰班人。我哋需要有獨立個性,但係我唔明係唔係香港教育造成,所有人都要同隔籬嗰個一樣。

要求釋放李思捷……發癲條片!

會唔會係人嘅劣根性?無論現實定網絡世界,有人就會有呢一面?

我唔知,我只能夠話香港特別嚴重。我知道就算喺網上非當惡毒嗰班朋友,佢哋現實並唔係咁,佢係喺留言空間至會咁。咁代表咗佢現實同網絡有兩面,呢下更危險,我最怕佢現實性格會被網絡世界佔領,當你好擅長地搵到嘢嚟鬧,呢個性格去咗現實社會,會好危險。

人有兩面,所以大家會覺得你喺網上能言善道,但去到 TVB俾陳百祥窒「傻仔」會唔識駁嘴?

冇!嗰一晚係大家都互寸大家㗎,大家都為個氣氛互窒大家㗎,為咗個氣氛啫!其實嗰晚個氣氛好好,亦都好好笑,係俾 TVB剪到唔好笑,剪到斷斷續續啫。我唔係唔窒佢,我有窒,我嘅思路冇比阿叻哥緩慢,只係 TVB冇剪到。

咁你咪啞仔食黃蓮?

係,無辦法,因為我係與虎謀皮,邊個要你要去 TVB啫?我有問叻哥有冇睇 TVB㗎! TVB𠵱家做緊咩劇集,叻哥都係唔知㗎!

TVB咁剪法會唔會有啲陰謀?

佢當然係有佢嘅陰謀啦,佢直情剪咗成段李思捷唔出添!嗰 part係薑檸樂同 Kibi訪問李思捷,我聽番嚟,李思捷係脫咗軌黐咗線咁去鬧佢兩個,然之後嗰條片係底都唔留!唔係唔俾出街,係直情唔留底!我好想知,好想叫 TVB釋放李思捷呀!喂,佢如日方中轉數咁快,又係監製,可能佢鬧得啱呢?點解唔俾出街啫?你嘅藝人脫咗軌又唔出,我哋出軌呢?無辦法,你面對 TVB冇可能要求公平。

講下自己,你父母做盛行?你又喺邊區長大?

爸爸做蔬菜批發,媽媽做文員,我喺南區大,出世到七歲住喺赤柱,嗰啲叫寮屋,都係獨立屋嚟㗎,我屋企有韆鞦㗎,不過係自己整一塊木板兩條麻繩嗰種,一直住到七歲抽到鴨脷洲居屋……我讀傳統男校,高主教書院,中六、中七原校直升,但 A-level考得麻麻去咗浸會讀副學士,直到我十幾年後離開學校,先至知道原來女人係一種完全唔同嘅生物。屋企得我一個,所以我好習慣擅長自己同自己講嘢,所以我咪對到鏡頭講嘢囉!又因為我好擅長同人溝通,所以我好清楚知道自己想要啲乜嘢。香港好多人唔知自己想點。

由赤柱返堅道高主教返學,搭車咪好耐?

一定要轉車,然後由娛樂行行到上山要十幾分鐘,我都唔記得點行到。返到學校,有時啲同學見到大隻啲嘅蟻都要叫,呢啲我真係代入唔到,赤柱最多蛇蟲鼠蟻,我屋企嗰隻咪仲大……山頭有十零戶人,試過有蛇,係大蟒蛇,隔籬屋打死咗隻蛇,然後戶戶有得分蛇肉食……我覺得我哋同沿途經過啲西班牙式別墅差唔多,可用空間仲多添,咁至係生活。

你話十幾年讀男校嘅生活,到畢業至知女性係唔同生物?

係呀,因為我少接觸女性,我嘅圈子冇同齡同性朋友,我見得最多係我阿媽,佢堅強啲,講道理啲,我仲以為女人都係咁,出到嚟至知,下?乜咁嘅咩?

父母有冇睇你拍嘅片?知唔知你今時今日喺網絡界都叫有一番作為?

一番作為我唔敢講,今日至有人留言話我係過街老鼠……父母有睇我啲片,有留意我 fanpage,我行到今日,係多得佢哋明知唔穩定,但從來唔會對我做嘅嘢說三道四。

師母係我初戀,亦都係初夜!

可以做到過街老鼠某程度上都係一種作為嚟㗎!咁就要講下你對上得到最多負評,應該係俾人話鬧完香港波又抽港足水?

佢哋(網民)搵到一個位就自己會入,唔緊要,上得呢個平台我預咗。但我始終最擔心,你講完,嗰個係唔係你真正想法?我係話過,唔係假波新聞我都唔記得香港仲有足球……我唔覺得我有問題,同時我都想為香港足球做啲嘢,因為我有份食香港足球呢包花生。我批判香港足球,但我唔係同香港足球有仇吖嘛!正如 TVB都唔係我嘅仇人,但係佢拍啲劇膠,我一樣會批判!我係同梁振英有仇嘅啫!

講下你太太,阿師母,佢係你第一個女朋友?

係呀,我嗰陣時冇諗過出街溝女,連 icq都未有,傾咗幾個月先 send一張相去,邊有𠵱家咁 WeChat傾一晚,第二日就開房嘅啫?邊有咁過癮㗎?係㗎,師母係我嘅初戀,亦都係我嘅初夜。

已經結咗婚,好易出事㗎?

擔心㗎,係非常擔心,我老婆都叫我出去玩下試下,但我𠵱家未有頭緒去邊度試好。

𠵱家啲人興上網搵,係咪易過以前好多?

我上網,但我唔同其他網民,我現實中係司徒夾帶,上到網一樣係司徒夾帶,所以我講嘢我做嘢,個負擔係多過一般網民。

咁你隻求婚戒指幾多卡?你求婚過程又驚唔驚喜?勁唔勁抽?

都係去長洲海灘,冇乜特別……輸咗㗎,錢又冇乜……隻戒指喺我當時嚟講係大半身家喇已經,即係萬幾蚊……我當時嘅收入都未有萬幾蚊!起步中?未起步添!你諗下司徒夾帶個名都係呢兩、三年嘅事,求婚係四年前喇!絕對唔係一個搵到食嘅地步。𠵱家又搵唔搵到食呢?叫做夠食,但我唔知夠食得幾耐。

咁跟住落去呢?你哋 YouTuber下一步可以行到去邊?

有生機亦都有隱憂。靠網民繼續真係養唔到我哋,講真,有幾多人睇完條片係會俾錢?係冇。就算 Bomba最勁嗰條片二百幾萬人睇咗,亦都冇一個 view係俾咗錢。靠 YouTube分脹?幾千蚊咋都係!必需要靠廣告, Bomba開價幾十萬,雖然啲客未必肯俾,但係我覺得抵俾囉!我喺呢度要講, Bomba真係好抵俾!最終養佢哋唔掂,就走㗎喇,我唔想見到呢一日。我想香港養到 Bomba,想香港養到熊仔頭、養到司徒夾帶呀!

係唔係即係成長呢?你幾年前會用大半副身家買戒指求婚,𠵱家會成日擔心仲夠食得幾耐?

我做嘅嘢依然係我想做嘅,但考慮嘅的確多咗。有人問我點解拍少咗抽水片,係事實……以前我抽完水都係知面嗰浸,我都係標題黨,但因為拍,我留意多咗政局時,我發覺唔好笑喇嗰件事,係好大鑊㗎嗰件事!高鐵、三跑,唔好笑囉,我唔知用咩角度去拍,我真係幽默唔到。以前唐英年就算喺花園有個地牢就算有婚外情,有幾大鑊啫?佢上咗去做特首,可能王維基會有牌,我覺得好遺憾……嗱,鍾樹根就真係好笑喇,就真係唔大鑊喇!

網絡老油條

同樣係新聞人物,同樣係當造網絡負皮王,若果我約嗰個係藝人,一早潛水,打死都唔好訪問住。不過講緊呢個係喺 YouTube打滾十幾年,同網民打交道十幾年嘅司徒夾帶,負皮走勢、花生市價完全胸有成竹,所以訪問照做,片照拍,就在我和攝影師 set燈搞器材的幾分鐘,他已經火速拍了條新片 upload埋上面書,幾個鐘又有萬幾次點擊。

我開始明,負皮都係皮,負皮即係有份點擊,網民係鍾意食花生,不過更鍾意開包新花生,再皮過。

窒與被窒(電視畫面)

司徒共聚(網上圖片)

紅牌師傅

撈埋電影

初戀師母(網上圖片)

愛將 Hunny (網上圖片)

撰文:朱小博

攝影:范仲良


鍾意就快D Share啦!
Related Posts Plugin for WordPress, Blogger...