向來形象陽光嘅坤哥，估唔到近期埋咗娛圈「毒后」 Winnie Yuen堆，坤哥千祈咪行差踏錯呀！
封面
唱非法 K盒 吳業坤黐娛圈「毒后」開 P
《超級巨聲 2》出身的吳業坤一向行陽光毒男路線，今年一曲《原來她不夠愛我》唱到街知巷聞，網上 MV更有 246萬點擊而成 YouTube本地 MV點擊第 2位，勁過周柏豪。不過升呢坤哥連朋友都同時升呢，本刊得到一批私相和絕密影片，內有坤哥邊飲酒邊唱首本名曲，又用啤酒樽作勢爆好友陳國峰頭，玩得好 high！最爆係坤哥開 P地點，竟是在有娛圈「毒后」之稱的 Winnie Yuen家中，大班人開 P狂歡，竟用非法 K盒唱 K，與平時傻更更的坤哥另一個樣。
25歲坤哥難得捱出頭來，連叱咤5強我最喜愛男歌手都入埋圍，坤哥都係玩得小心 D好！
日前本刊發現一批私密照片和一段影片，內有大量吳業坤在友人家中又唱歌又飲啤酒，當中更有坤哥和陳國峰作狀打交的連環圖，重點是，屋主正是曾承認吸毒的娛圈「毒后」 Winnie Yuen。
「有人叫我毒后」
坤哥在眾人眼中都是陽光毒男，唔煙唔酒，不過照片中的坤哥，不但玩得好 high，而且手執啤酒，似乎飲大咗！「 Winnie Yuen喺娛樂圈識好多人，以前做 Disco公關，𠵱家喺深圳開卡拉 OK，仲有同唔少圈中人聯絡，坤哥應該係經成日上大陸接登台騷嘅古卓文（《亞視星光幫》）介紹。」現年 55歲的 Winnie，在 15年前的訪問中，親口承認有吸毒習慣，加上當時她與藍潔瑛和陳寶蓮相熟，有傳二人後來精神失常都關 Winnie事，但她否認。
據知 Winnie和過氣女星羅明珠最熟，二人經常孖住外出，相約圈中爛蒲一族玩；而 Winnie在訪問中提到：「我 15歲開始食草（大麻）， 17歲已經有人叫我毒后，都只不過係花名。圈中人食大麻好普遍，尤其係打 band玩音樂嗰啲，我覺得食咗大麻可以令人聽清楚用乜嘢聲、用乜嘢樂器好啲。」不過當年她在訪問中聲稱已冇再掂毒品。
最多講音樂
Winnie Yuen不論是對演員或是歌手，都愛打交道，曾表示熟悉音樂、熱愛電影的她，替不少唱片做過混音、替電影做過配樂，近年在深圳開夜場後，更容易接觸北上賺人仔的新人歌手。坤哥離奇黐上「毒后」，當晚開 P，與 Winnie好 friend的 47歲羅明珠亦是座上客，羅明珠前夫王培宏早年藏毒罪成，羅亦曾捲入大劉情史。當晚眾人隊啤打邊爐又唱 K，坤哥即場演繹自家金曲，仲用非法 K盒唱 K添！
參加《超級巨聲 2》入行的吳業坤，當年雖然只得第 5名，不過從來無放棄過做歌手的願望！由路人甲，到台慶扮棋，坤哥今年終於捱出頭來，不但成功拍劇入屋，更出碟有 hit爆歌〈原來她不夠愛我〉，年尾音樂頒獎禮，攞獎無難度。
係女人都冧
坤哥雖然表面怕怕醜醜，私底下其實十分主動，除主動問女仔攞電話外，噓寒問暖招數做到足，而且年齡不限！ 00年參加完《巨聲 2》後，星煥即與胡鴻鈞簽約，「 Herman（星煥老闆何哲圖）睇死坤哥紅唔起，寧願改簽胡鴻鈞，都一直唔肯簽佢。」坤哥參加得比賽就預要入行，所以遂向樂易玲埋手，經一輪觀察後，樂小姐出面成功令星娛樂接收坤哥。
坤哥除了向樂小姐埋手，為保飯碗，坤哥亦冧掂珍姐成功加入戲劇組，在《愛．回家》有一個相當重要的角色外，亦是綜藝節目常客，開始被重用。
至於音樂方面，由於仍由 Herman話事，明知大台成績唔慌好的坤哥早已鋪定後路，落足本與電台 DJ打好關係，商台 DJ麻利亞、急急子等都和坤哥份屬友好，而且商台特別重視唱作歌手，亦令坤哥今年順利入圍我最喜愛男歌手 5強。
前途大直路，坤哥玩乜都要小心呀！
亂唱 K 坤哥隨時被索償
據梁永鏗律師表示，坤哥雖然係私人使用呢個 K盒，亦無作銷售用途，所以唔算係刑事罪行，不過，其實唱片公司，或者版權持有人都可以從民事索償定坤哥罪喎！「其實就咁喺私人地方咁做，一般唱片公司都唔會大費周張去告嘅！」
「毒后」自爆毒史 藍潔瑛陳寶蓮閨蜜
原名阮慧珊的 Winnie Yuen，今年已經 55歲。 17歲開始做過幾間有名 Disco公關，最風光時月入 30萬（幾十年前！），她亦因此認識唔少圈中人。 Winnie又聲稱從事過唱片混音製作及替電影公司工作， 00年她曾接受週刊訪問自爆：「好多毒品我都試過，包括冰、四仔、 Coke同 K，但係𠵱家都冇掂，由始至終我都只係食草（大麻）啫！」當年藍潔瑛和陳寶蓮就是 Winnie的閨蜜，而 Winnie當年受訪目的是要澄清她毒品「拆家」的傳言。她又爆：「 Yammie（藍）冇嘢戒，最主要係戒戇居，至於 Pauline（陳）唔可以話戒唔戒，佢其實食唔食都得！」由藍潔瑛、陳寶蓮群到坤哥、陳國峰， 55歲「毒后」真估佢唔到喎！
專做女人湯圓
咪睇其貌不揚嘅坤哥平時唔聲唔聲，其實係冧女高手！
採訪、撰文：娛樂組
攝影：娛樂突發組
|
鍾意就快D Share啦！
|
|
|
