雖然撻着有米皮草太子爺，但短褲打扮的傅穎依然樸素。
娛頭
撻着一年 同皮草太子爺齊齊執樣膠鬥膠 傅穎著超雲舊鞋
與前度羅仲謙發生爭執，推撞之間搞到 pat pat大髀瘀晒的傅穎，事後決定遠離傷心地，北上發展。在內地打拼五年，最近 Theresa被指撻着富婆，錯晒！真命其實係同賭王千金何超雲拍過拖的皮草太子爺王大業。
變得愈大愈靚的 Theresa，同男友撻着已接近一年，二人志同道合，拍拖後，王大業的面貌，看來比女友還要大變化，所以，即使大家背景懸殊，一樣溝得埋！
唔係二世祖
同羅仲謙分手後，過去五年，傅穎近乎絕跡香港；同時間，人事全非！前度同楊怡秘婚，同期出道的餅女吳雨霏、楊愛瑾亦先後成為幸福人妻，至於宿敵 Stephy，雖然同小方情變，也只因為情投排球教練、同性密友小牛鄧衍敏。
看似大落後！但其實 Theresa早於去年九月，已搞掂有米皮草太子爺王大業，八歲隨家人移居加拿大的 Andy，時裝設計系畢業後返港，幫父親王廣照打理家族皮草生意，絕非游手好閒二世祖。
家底厚的王大業，一○年因為同賭王三房千金何超雲高調拍拖，而為人識，但今次跟出身背景大不同的 Theresa，則冚得密一密。
「 Andy（王大業）係生意人，屋企有頭有面，之前啲女友好似超雲、唐貝詩，甚至傳過緋聞嘅莊思敏，個個都有家底， Theresa唔想影響到男友，更加怕外界覺得佢想黐 Andy啲乜；加上想專注做好自己事業，所以同 Andy都有共識，唔公開戀情！」知情者說。
廿九歲富婆
對感情事講啲唔講啲，搞到傳出 Theresa撻着內地富婆變同性戀，傅穎惟有急解畫。
「忽然傳咗個富婆出嚟！雖然以前都傳過 Theresa同何韻詩，但今時不同往日， Theresa係擔心啲新聞影響到男友屋企人諗法。仲有，嗰個俾傳媒形容為富婆嘅女仔其實得二十九歲！點樣叫富婆！」
事實上，傅穎三年前已經認識王大業，至去年九月，兩人在北京一個朋友聚會上重遇，忽然撻着。
得閒執一劑
情投意合的同時，兩人還有共同興趣和話題。拍拖不夠一年，定時修葺的傅穎，已有本事影響男友，得閒執吓。
「 Andy自己都好貪靚，著衫亦好姿整，兩個講扮靚已經有排傾。嚟緊 Theresa出寫真， Andy亦俾咗唔少意見，不過 Theresa喺內地做嘢，返香港時間唔多，所以 Andy好多時要飛去北京見！」知情者說。
月前，放假回港兩天的 Theresa，由男友王大業駕着價值 180萬的馬莎拉蒂，接載到淺水灣燭光晚餐。二人刻意揀了餐廳較隱蔽位置坐，邊食邊飲酒，十分浪漫。
浪漫 3小時
下月再戰書展的 Theresa，全晚滔滔不絕，與讀時裝設計的 Andy講個不停！兩人浪漫淺水灣撐枱腳，足足三小時，才孖住攞車離開。
和何超雲拍過拖的王大業，試過因隔空寸爆前度新歡陳山聰冇風度，搞到超雲超蓮合力發炮還擊；與圈中人關係密切的他，是楊千嬅老公丁子高、麥明詩大狀男友林作等的玩腳，不時相約聚會，搞活動。
對仲有幾個月就滿三十二歲的傅穎來說，王大業絕對是千載難逢的筍盤。
半斤八兩
叫得「皮草太子爺」，王大業緋聞多多，當中不乏富二代有錢女，但大多個個快來快去；至於新歡傅穎，就男女通殺，大家半斤八兩。
王大業
傅穎
儲磚頭
出生富裕之家的王大業，父親王廣照經營皮草生意，家族持有多個市區單位，但只買不賣。
持有物業
青山公路金麗苑 B座單位 買入 688萬（ 11年） 市值 1100萬
漆咸道其士大廈單位 買入 844萬（ 05年） 市值 3600萬
沙田名城 3期 3座單位 買入 750萬（ 12年） 市值 842萬
紅磡鶴園東街恒藝珠寶大廈單位 買入 730萬（ 12年） 市值 980萬
紅磡維港中心 2座單位 買入 730萬（ 04年） 市值 4000萬
市值超過一億
撰文、攝影、攝錄：娛樂組
|
鍾意就快D Share啦！
|
|
|
