2016年6月30日 星期四

Hanna開金口 劉華送花冧麗倩 [壹週刊 - 1373] __,Hanna,劉德華,劉華,劉向蕙,M1,

娛樂偵訊Hanna開金口 劉華送花冧麗倩已經成立28年的「華仔天地」,上週六(25/6)舉行一年一度周年會慶,家長劉華同二千名「家人」在九展開大P;繼去年一家三口首次同台,今年照辦煮碗,將老婆朱麗倩同囡囡劉向蕙擺上台。二千華粉當晚亦順道同「阿爺」華爸慶生,劉華一手拖老婆,一手抱女切蛋糕,已經大咗一歲的Hanna今次更開埋金口,跟住唱生日歌。高潮位是劉華繼續放閃,送花氹老婆!碌地做沙包同「家人」開P ...


娛樂偵訊

Hanna開金口 劉華送花冧麗倩

已經成立 28年的「華仔天地」,上週六( 25/6)舉行一年一度周年會慶,家長劉華同二千名「家人」在九展開大 P;繼去年一家三口首次同台,今年照辦煮碗,將老婆朱麗倩同囡囡劉向蕙擺上台。

二千華粉當晚亦順道同「阿爺」華爸慶生,劉華一手拖老婆,一手抱女切蛋糕,已經大咗一歲的 Hanna今次更開埋金口,跟住唱生日歌。高潮位是劉華繼續放閃,送花氹老婆!

碌地做沙包

同「家人」開 P,每次劉華都會絞盡腦汁,為一眾華粉製造驚喜。今年會慶主題是「華運會」,場地布置成大型運動場,搵埋森美、小儀、歐陽妙芝、林家棟、吳家樂等撐場,分四隊進行比賽。

與眾同樂,家長劉華亦有落場玩埋一份,撐艇碌地再做埋人肉沙包,絕對冇欺場。而華嫂朱麗倩就一直抱住 Hanna,坐在觀眾席第一排觀賽。

玩足兩粒鐘,萬眾期待的一幕終於出現。當日劉華準備蛋糕提早同老豆慶生,切蛋糕環節,主持森美請華爸華媽上台,再食住上:「劉太同囡囡都出埋嚟吖!」全場華粉即時瘋狂尖叫。

聚會結束,朱麗倩抱住 Hanna在大班保鑣護駕下離開,其間朱麗倩一直用手遮住囡囡塊面。

忙住拍《拆彈專家》的劉華,上週六抽出一日空檔,同粉絲慶祝歌迷會成立廿八周年。

父親節當日,劉華收到 Hanna親手用泥膠做的電話模型,即刻放上網同粉絲分享。

扭計要老豆抱

不過,當時在觀眾席的 Hanna突然扭計,唔肯上台,劉華見狀,即衝落台安撫, Hanna見到爹哋,立即伸出手手要抱,之後劉華一手抱女,一手拖實老婆,一家三口上台,森美又即時現場旁白:「最甜蜜嘅時候嚟」

跟住全場一齊合唱生日歌,一直伏在爹哋膊頭的 Hanna,亦口噏噏跟住唱。唱完歌,森美提醒劉華:「送紮花俾劉爸爸先!」劉華即刻緊張話:「送俾老婆先!」朱麗倩當堂冧晒,笑到四萬咁!

活動尾聲,劉華連唱《一起走過的日子》、《回家路上》、《我恨我痴心》,台下的 Hanna亦跟住打拍子。一如去年,朱麗倩提早抱 Hanna返入後台,並在多名保鑣護駕下,先行返歸。

會慶主題係「華運會」,劉華親自落場同粉絲比賽,好落力。

林家棟、歐陽妙芝、小儀等一班忠實「華粉」亦有現身撐場。

劉爸爸、劉媽媽是歌迷聚會的常客,當晚劉華順道同劉爸爸慶生。

節目尾聲,劉華連唱幾首經典金曲,將氣氛推至高峰。

自從去年四月, Hanna的廬山真面目曝光後,劉華夫婦開始讓囡囡參與粉絲聚會,和「家人」見面。

劉天王 最長情

一向視粉絲如家人的劉德華, 88年成立「華仔天地」,至今 28年,多年來無間斷舉行各大小聚會,家長劉華甚至出錢支薪,讓會員自行運作「華仔天地」,相比其餘三大天王的歌迷會,最有組織亦最長情!

郭富城

早年成立的「郭富城國際歌迷會」,已經再沒有收取會費,但城城與歌迷偶然仍有聚會,歌迷亦可透過歌迷會優先訂飛。

黎明

「黎明家族」形同解散,對上一次歌迷聚會已是 2005年,就連網頁亦停止運作,沒有任何資訊。

張學友

張學友的「友友俱樂部」,已經沒有聚會多年,學友與會員再無聯繫,只剩下幾個義工會員更新網頁,而內容只簡單顯示學友即將舉行演唱會的日期。

撰文、攝影、攝錄:娛樂組


鍾意就快D Share啦!
Related Posts Plugin for WordPress, Blogger...