方先生參與太和邨天價工程抗爭後，寓所遭人淋紅油。他最初一度感到驚慌，事後決定面對鏡頭，表明毋懼恐嚇。
壹週人物
抗圍標遭淋紅油 太和的後裔：毋懼黑勢力
大埔太和邨上月爆出圍標疑雲，一班八、九十後居民自發組成關注組抗爭，天價工程最近發還重審，須重新招標。
正當他們獲得初步勝利，積極籌備推翻法團之際，有成員寓所遭人淋紅油恐嚇，同層二十四個單位全被波及。
事主方先生估計，由於他是網上關注組創辦人，而且傳媒報導事件後，他一直避免上鏡，「對方可能覺得我怕事先揀我……指名道姓話我爭人錢，我強烈感覺不安，一定要出嚟講嘢，如果唔係其他組員都可能有類似情況發生。」以淋紅油作為恐嚇手段，儼如七、八十年代電影情節。方笑言：「淋紅油喎，依家財務公司都唔會用呢種方法追數啦。」
他表明毋懼惡勢力抹黑，對方愈想他噤聲，他愈要發言，「本身我住喺太和邨，我係居民，我父母係業主，我關心太和邨嘅事，唔需要收斂。」
本月二十二日凌晨一時許，太和邨福和樓十二樓全層遭人淋紅油。有街坊稱，事前見到四名戴口罩人士在附近徘徊。翌日下午，楊太仍在清洗油漬，事發時她正在洗澡，聽到門口傳來怪聲，步出客廳驚見門縫滲入紅色漆油，開門後已不見犯案者蹤影，便報警並通知鄰居。同層的方母開門後見滿地紅油，還以為是血，驚魂甫定才敢行出走廊，發現四處都是兒子欠債一百二十萬元的單張，慌忙致電兒子。
恐慌
「我收到屋企人電話，問我發生咩事，你爭人錢咩？我好愕然，話冇呀。佢話屋企俾人淋紅油，我梗係驚。」方先生翌日受訪時心情已經平復，提起當時情景仍有點緊張。他近年遷出涉事單位，形容當晚趕回家的一刻，「一大班差人，好誇張，成條巷都係紅油，道道閘都有紅油，𨋢口貼晒有我張相、有我身份證號碼、有我住邊戶（嘅單張），個畫面都幾震撼！」當晚他到警署落口供至清晨才回家。
三十一歲的方居於太和邨廿多年，一直關注時事，但從沒參與社運，即使支持佔中都沒上街。去年四月，他得悉管理費狂加到百分之十八，於 facebook建立太和邨管理費加價關注組專頁，圖引起關注，當時僅在網上發聲，至上月爆出天價工程，他才上街抗爭。事件起因是邨內有樓宇外牆石屎墮下傷及途人，被勒令維修，結果維修三座樓約百分之七外牆，費用高達二千七百萬元。
他認為價錢不合理：「條邨有事發生，無理由唔企出嚟。」關注組矛頭直指業主立案法團及工程公司涉圍標，方負責在網上發文，提醒居民事件近況，又積極在網上留言，疑因此惹人不滿，「裡面牽涉好多利益關係，我都唔清楚係邊一個部分（嘅人做），我淨係估係關呢一樣嘢事。」
其實他早有心理準備，「翠湖花園都好似有人淋紅油，仲有人被跟蹤。但當發生喺自己身上，就唔知點應對，見步行步，見到差人就落口供，見到屋企人都唔知點安慰。」事後他外出會留意四周，但強調不害怕，反而最無奈是影響到家人及鄰居，「屋企人好驚，我反而冇乜嘢，冇特別好驚俾人打或者乜，因為人係要生活，要出街，呢啲嘢防備唔到。」
堅持
方認為對方想抹黑他，「淋晒咁多個單位，想話俾全層人聽我有問題，想羞辱我，想我無面。但我唔覺得佢哋成功，佢哋咁做反而會激起更多邨民關注事件。」被波及的楊太慨嘆無辜：「既然要針對佢，點解要搞我哋居民？如果係追債，唔會咁樣全層都淋晒，我哋幾廿年街坊，我信佢（冇欠債），佢依家都洗濕咗個頭搞對抗，如果拉得到個法團落嚟，我都好支持佢。」
淋紅油前四日，關注組遞交約千名居民簽署，正等候舉行特別業主大會，以決定能否推翻法團，怎料發生恐嚇事件。不過，關注組其他成員均無意退出，核心成員 Cherry憶述，事發時正在睡覺，接到來電得知事件，擔心自己都遭殃，便跑到門口，「我望一望防盜眼，望咗一分鐘，見到冇人，我先敢開門。」可幸她並沒成為目標。
「其實當時係驚慌、好亂，因為我喺義工組入面算行得比較前。」她冷靜下來後，決定更加堅持，「如果有人真係因為天價工程，而去搞我哋嘅成員，即係證明我哋做緊、行緊嘅係一條正確嘅路。我覺得要堅持落去，先有更加多街坊知呢件事，咁對我哋嘅保護先係最大。」
撰文：李啟發
攝影、攝錄：鄭樹清
news@nextdigital.com.hk
|
鍾意就快D Share啦！
|
|
|
