兩公婆夾檔氹仔，郭晶晶大媽踎，好腳力！
娛頭
家族基金限住俾 霍啟剛拋頭露面 郭晶晶 3千萬接 show養外家
貴為霍家長房長孫的霍啟剛，孭住「霍英東集團」總裁身份，平日唔使點做，頂多偶然出席一些有關體育的活動，但最近竟然要拋頭露面，同老婆郭晶晶夫妻檔接拍大陸真人騷《極速前進》第三季，從未做過幕前的霍家大少爺，同晶晶公然晒恩愛外，仲要扮鬼扮馬和賣命做出多項高難度挑戰。
據了解，霍英東的遺產一直由一個遺產基金管理，每個霍家成員，都會按月獲分發一定數量的零用，不過，亦只夠霍啟剛一家三口基本使費，一直是娘家經濟支柱的晶晶，惟有拖埋老公，拋頭露面接真人騷，快賺 3千萬養外家。
晶晶踎功了得
長駐內地的郭晶晶媽咪，早前由家鄉保定來香港探望外孫仔霍中曦（ Lawrence），霍啟剛兩公婆帶埋囝囝，一家三口陪外婆到數碼港草地野餐，但現場所見，當日晶媽心情似乎非常麻麻，冇厘笑容燶口燶面，亦冇同孫仔玩，與女婿啟剛更加零交流，只間中同晶晶講幾句。
趁啟剛帶住囝囝去商場買飲品，晶媽又伺機同晶晶講悄悄話，但晶晶卻表現得有些不耐煩，之後更索性攞出電話同人通微信，懶理阿媽。
見老公同中曦折返，晶晶隨即走到囝囝身旁，一二三！以國內大媽最強姿勢，擘大雙腿踎低在囝囝面前飲嘢食嘢。晶晶踎功相當了得，足足五分鐘冇換姿勢，亦唔腳痺。
與晶母無交流
晶晶顧住湊仔，晶媽就有如陌生人搭枱一樣，望都唔望，只持續黑住面，猶如無聲抗議。一行人留多半個小時，就執拾離開。
據了解，郭晶晶嫁入霍家做孫新抱，禮金只有五百萬，除了拍拖時傳聞霍家所贈的物業，再沒有任何資產增持。每月開銷，只靠霍家遺產基金所分配的十幾萬元「零用錢」，雖然住屋同車都是用「阿公」，其他雜項支出亦可以開公數，但六萬蚊連埋囝囝使費，晶晶可以用的錢根本唔多。
事實上，未嫁入霍家前，晶晶因為比賽，獎金可觀，加上接拍大量廣告，當其時確實搵落不少，就算買車買樓，提供一家人優質生活，照樣綽綽有餘。
「晶媽以為個女嫁入 300億豪門，以後就生活無憂，點知晶晶婚後要湊仔，已經好少接嘢做，收入大減；而霍家嗰邊又冇俾錢養埋晶晶外家，所以晶媽有時都會有怨言。」知情者說。
收入大減
做了霍家新抱後，晶晶以做慈善為主，賺錢的代言工作，目前計只剩得一個廚櫃品牌，收入有數得計。
有外家經濟壓力，加上兒子中曦已經三歲，不用時時刻刻要全天候照顧，所以晶晶決定重新「上市」，撞正有大陸真人騷抬錢拍門，晶晶幾經考慮，復出幕前。
「其實自從晶晶放聲氣會復工後，好多不同嘅大陸真人騷，都吼住想爭到晶晶嘅第一次（真人騷），不過佢覺得有部分節目主題唔係好啱，所以一直推，直到呢個《極速前進》第三季，標榜以奧運做主題，又去齊十個曾經舉辦奧運嘅地方拍外景，晶晶先覺得適合自己。本來電視台想搵佢嘅跳水拍檔同佢一齊拍，點知晶晶竟然反建議，話搵佢老公霍啟剛做拍檔，更加有新鮮感。
「電視台方面聽到呢個組合，當然𦧲飯應啦，酬勞亦即時加碼，兩公婆每集起碼收二百五十萬人仔，絕對係一線大牌價錢，如果拍齊十集都冇被淘汰，計落大概收到三千萬港幣。」晶晶身邊人說。
賣命演出
收得大嚿錢，郭晶晶同霍啟剛都交足貨，連極神秘的霍家大宅，都商借出來拍攝，節目中，不乏兩公婆放閃晒恩愛情節，晶晶甚至大爆霍啟剛當年如何追求過程。
不過三千萬唔易賺，節目第一集，晶晶就要在北京鳥巢被吊高到半空，同時做出前空翻同後空翻動作，對於跳水出身的她，當然冇難度；第二集，輪到霍啟剛，吊住威吔玩三十米高跳台滑雪，難度十分高，霍啟剛更玩到連「小啟剛」都被勒住，表情相當痛苦。
表面風光
與霍啟剛拍拖 8年，郭晶晶 12年嫁入霍家，但表面風光，多年來，這個孫新抱冇 cash又冇磚頭，仲要做埋阿四，湊仔執屋清潔一腳踢。
五百萬禮金
12年，郭晶晶正式同霍啟剛拉埋天窗，但搞婚禮要等「阿公」批錢，禮金亦只得五百萬人仔，親家坐經濟客位來港出席婚禮，入住千五蚊一晚的富豪酒店，有指男家拒絕再出錢讓女家在鄉下搞多場婚禮，就連晶晶出嫁時佩戴的鑽石首飾，之後都要還番俾「阿公」。
冇樓揸手
13年，郭晶晶為霍家誕下第四代嫡孫，「阿公」即每月多發放六萬元生活費給啟剛一家，但晶晶則未有獲任何額外獎賞，冇樓冇珠寶，比起其他豪門新抱，待遇差好多。
爭產風波
全國政協副主席霍英東於 06年去世，留下約 300億元遺產，據他生前於 78年所訂立的遺囑，為防後人敗清身家，以「共產」方法分配，太太及子女均獲分得一筆錢，霍震寰有三千萬，震霆及震宇各有二千萬等。此外，家人每月獲派「零用錢」，可依通脹調整，而所有家族成員共住的沙宣道大宅，以至名車，全由「阿公」持有，並列明在霍英東死後 20年，也不准分家產。
11年 12月，長房三子霍震宇以霍英東遺產執行人身份入稟高院，控告二哥霍震寰「私吞」家族資產，要求罷免霍震寰作為遺產執行人職務。爭產案於 12年一度達成和解，各房分階段獲得財產。事隔八個月，霍震寰被爆隱瞞亡父價值數以億計的南沙項目權益，並推翻簽署的「大和解」協議，要求重開案件，但被判敗訴。霍震宇不服， 15年與兩姊霍麗萍及霍麗娜提出上訴得直，案件重開。
上月，霍震宇入稟高等法院，要求法庭頒令繼續委任四大國際會計師事務所之一的畢馬威會計師事務所，協助遺產執行人（長房兄長兼有榮有限公司董事霍震寰），全面查核遺產的資產價值及負債；以及批准授權霍英東生前「御用」處理個人及家族公司事務的會計師，繼續處理相關事宜，案件尚待排期處理。
撰文、攝影、攝錄：娛樂組
|
鍾意就快D Share啦！
|
|
|
