現年26歲的前華姐冠軍張曦雯（Kelly）由美國回港發展，入行短短數年的她雖然緋聞不多，但曾與胡杏兒老公Philip Lee（李乘德）傳出戀情，有指二人拍拖數月已極速分手，及後Kelly即戀上合作主持明珠台節目《港生活．港享受》，同是鬼聲鬼氣由加拿大回港的黃淑儀兒子徐肇平，二人相戀至今感情穩定，更不時雙雙出席友人間的聚會。
香閨過夜
據悉，Kelly及徐肇平拍拖以來愛得甜蜜，已到達見家長的地步，戀得難捨難離的二人，日前雙雙應邀出席於中環舉行的活動後，前後腳返回女方位於北角的寓所二人世界。當晚大約九時許，Kelly於活動結束後，便步往附近的路邊等車，其間見她頻頻講電話，似乎是與男友電話傳情，上車後她直駛返回北角的寓所。梳洗過後她又匆匆離家，並往會合男友，已換上一身簡約打扮，穿上牛仔褲及背心大晒麒麟臂的徐肇平，及後與女友往附近購買了大袋外賣，便急趕返回香閨撐枱腳溫馨，步入香閨時二人表現鬼祟，徐肇平四處張望一輪，才跟隨以長髮遮面的Kelly步入大廈，及至深宵仍未見他離開。
戴罩買餸
而向來深閨的Kelly，對男友亦照顧有加，事隔數天她於下午五時許離家，並前往附近的超市掃貨，戴上口罩的她狀甚避忌，急急購下了不少生果及餸菜後，便即時返家等男友回來齊齊煮飯仔。另一天有工作在身的Kelly，乘的士前往了中環拍攝，見她工作後又極速急趕回家慰男友。
自稱單身
對於被踢爆夜訪女友香閨一事，徐肇平接受訪問時卻極為驚青，死撐的他還不敢認愛，並謂：「我冇上過佢屋企呀！我幾個星期冇見過佢喇，呢排忙到所有朋友都見唔到。（忙咩？）之前喺美國拍完微電影返嚟，依家又要錄VO，又要補Shot。」否認與女方拍拖的他又指自己仍然是單身：「佢（指Kelly）唔識做朋友啦，咁都唔介紹啲女仔畀我。」
口供唔夾
反觀張曦雯與男友口供卻不夾，她承認當晚活動後徐肇平有上香閨作客，但卻連番解釋說：「佢有上嚟呀，思貝都有，思貝仲有我屋企鎖匙添，所以嗰晚係思貝上咗我屋企先，之後到我返屋企，肇平再上嚟。然後其他人都開始上嚟，都差唔多有成十個人。（佢着成咁係打算過夜？）冇呀，佢不嬲都係咁Hea，成日着背心。」提及與對方拍拖一事時，Kelly則突然表現避忌，更笑指：「我另有對象，我話我冇Dating啲人都覺得怪（唔認徐肇平？）佢一定冇份！（你咁講佢會傷心！）佢唔會啦，佢大把女性朋友。」
|
鍾意就快D Share啦！
|
|
|
