人生有幾多個十年！今年就係千億新抱徐子淇同老公恒基二少李家誠結婚十周年紀念，現年33歲嘅徐子淇花十年青春成功箍實老公，兩人嘅婚姻不但經得起時間考驗，仲生咗兩女兩子湊成兩個「好」字，幸福爆晒燈！原來佢哋一家大細去咗美國慶祝錫婚，喺香港時間上周六凌晨兩點幾（美國時間8日下午），被《蘋果》讀者鍾小姐「爆相爆片」捕獲，李家誠當眾攬實索爆老婆連環舌叠舌狂啜，光天化日之下放閃晒恩愛，示範激情同甜蜜嘅兩款錫錫！讀者鍾小姐接受本報訪問表示：「上星期五，下午兩點左右，喺美國西岸環球影城一間露天快餐店，初時見到得徐子淇同老公，佢哋坐埋喺中間位嘅一張枱，見到佢哋好開心傾偈，傾到手舞足蹈，仲成日咀對咀錫，我見到起碼錫咗四、五次，我都影到兩次佢哋錫錫。」從兩張咀嘴相片所見，其中一張李家誠肉緊地用雙手捉實老婆塊面，吸實子淇嘅嘴仔瘋狂啜爆，兩人錫到進入忘我境界，連前面近在咫尺張枱，有工作人員喺度清理枱面，佢哋都可以完全睇佢唔到，繼續錫錫錫啜啜啜，黐纏肉緊到爆；另一張啜嘴相，就見到着背心裙嘅子淇，露出少少養眼嘅雪白胸口，老婆又靚又索，難怪李家誠情難自禁，用右手搭喺老婆嘅香肩上，兩人嘴對嘴變身接吻魚，今次明顯錫得輕柔甜蜜，享受接吻嘅美妙。可能李氏夫婦去到美國，心情都大解開冇避忌，當眾啜爆晒愛之餘，身為恒基二少嘅李家誠，仲親自餵老婆飲嘢，兩人面前只得一杯飲料，你一啖我一啖繼續玩交換口水，鍾小姐表示：「李家誠仲餵埋徐子淇飲嘢，我覺得佢哋好恩愛，好甜蜜。大約半小時後，有幾個小朋友返嚟，小朋友多數係玩完機動遊戲回來，仲有幾個男人同兩個女人，我估係保鑣，因為佢哋周圍望，見到我哋攞住相機都望咗好耐。」徐子淇同李家誠於2006年12月喺澳洲舉行世紀婚禮，兩人嘅首名愛情結晶品喺翌年出生，長女李晞彤今年9歲，之後子淇再為李家誕下現年7歲二女晞兒、5歲三子俊熹同9月大嘅四子建熹。
| (讀者鍾小姐提供圖片) |  好似初戀咁恩愛。(讀者鍾小姐提供圖片) |  完全唔理身邊有冇人。 (讀者鍾小姐提供圖片) |
 (讀者鍾小姐提供圖片) |  (讀者鍾小姐提供圖片) |
|
鍾意就快D Share啦！
|
|
|
