阿滕攬實Bobby翻生衝視后
旺氣十足的歐陽震華再度發功，令熱播劇《一屋老友記》推至30點高收視，更帶挈「老拍檔」滕麗名齊齊坐正「無綫福將」之位，認真犀利！談到網民一致對阿滕的演出讚不絕口，達「視后級」之餘甚至比女主角胡定欣更搶鏡，對獲讚感高興的阿滕說：「佢哋鍾意鋤強扶弱！」而雖然收視報捷可喜可賀，但「女一」胡定欣缺席祝捷會，惹來多方揣測。
藝人歐陽震華（Bobby）、滕麗名、呂慧儀及張彥博等昨日在將軍澳出席無綫劇《一屋老友記》祝捷會，宣布大前晚（5日）第八集最高收視達30點、吸引1,947,300人收看，成為本年度9點半時段劇集中最快取得最高30點收視的劇集，打破《鐵馬戰車》及《EU超時任務》分別以第15集與第20集創下的紀錄，成績斐然。席間Bobby即場捐軀孭起胡楓（修哥）履行30點之約，更任對方當為坐騎狂Un，事後Bobby更笑言被胡楓Un親。而阿滕孭起羅蘭時，則要其他人出手相扶，場面搞笑。雖然收視報捷，但活動未見女主角胡定欣芳蹤，惹來多方揣測。問到缺席原因，監製方駿釗於電話訪問中透露定欣不在香港，又表示她的戲份會愈來愈多。
冧爆老公讚「賤精」
劇集收視高企引來網民熱議，其中不少人大讚阿滕在第七集大鬧徐榮的場口演出精湛，甚至比女主角胡定欣更搶鏡，揚言要力捧她登上視后寶座。對此，她謙虛地說：「唔好咁講，我未試過開成套劇都係講屋企，拍咗五十幾日廠景至拍出面嘅戲，佢（定欣）中段之後會喺屋企多啲，暫時仲有一種陌生感。（網民捧你做視后？）好開心，佢哋鍾意鋤強扶弱！」她又表示老公知道網民一面倒正評後感高興，所以打算請她去旅行慶祝，不過她大爆老公沒有追看劇集：「佢話：『使乜睇，你都係賤賤精精嗰啲！』佢話係讚我，佢同咗Bobby講，Bobby話老公話老婆賤即係好愛佢咁解！」
35歲「細寶」上位唔怕遲
而講到Bobby繼續以「福將」身份發功，他即指台前幕後皆有功勞：「修哥都咁精力充沛，我哋呢啲細幾年梗係加把勁！（想拎獎？）今屆我睇好修哥同羅蘭姐，一個男神一個女神。（網民捧阿滕做視后？）佢直頭係翻生添，憑呢套戲省番靚個招牌！」問到會否考慮拍續集，Bobby笑指修哥連劇名已經度好：「叫《老友記番嚟囉》，我話唔好囉囉聲，不如叫《老友記番嚟喇》！」更以「續集王」自居表示隨時有期開工。至於飾演「細寶」的張彥博在劇中的表現非常亮眼，直言未想過「上位」問題的他，被問到35歲才事業再起步會否太遲？他說：「唔算遲，娛樂圈不嬲係一個長跑。」並表示會為欣賞自己的人繼續跑落去。
文：影視組
|
鍾意就快D Share啦！
|
|
|
