王賢誌同性密友溫哥華結婚
三年前默認同志身份的王賢誌，與相戀七年的初戀男友Kevin Chow結婚了！在雙方家長見證下，兩人在加拿大溫哥華時間8月1日註冊結婚，成為香港首位公開承認與同性結婚的男藝人。七年來歷盡困難及受盡外界目光的他，終於一圓結婚夢，他坦言絕不容易：「已經認定對方，唔會後悔先至咁勇敢行呢一步，希望香港早日同性婚姻合法化。」
王氏港建主席兼行政總裁王忠桐兒子王賢誌（Vinci），昨日在社交網上載以白色花環圍着「Vinci Kevin」字樣的相片，以英語留言：「Aug 1st, A Day to remember!」原來他與相戀七年、從事飲食生意的初戀男友Kevin Chow，於加拿大溫哥華時間八月一日正式註冊結婚！由於Vinci深知Kevin熱愛大自然，今次婚禮於溫哥華著名植物公園VanDusen Botanical Garden的餐廳Shaughnessy Restaurant舉行，婚宴以西式為主，並有簡約及充滿田園風味的布置，一對新人同穿上黑色西裝，在雙方家長及親友包括Vinci父親王忠桐的見證下，完成人生大事。
郵輪「度蜜月」
今年45歲的Vinci，性向一直被外間質疑，直至2013年暗示同志身份，並希望在香港結婚。現身在加拿大溫哥華的Vinci，昨日接受本報電話訪問時難掩喜悅，並邊笑邊自爆已喝醉：「我依家醉得好緊要，驚講錯嘢！係，我係結咗婚！多謝大家祝福！」隔半小時後，他再受訪時直言已身在after party中，醉意已減，他指結婚是一個多月前的決定：「同Kevin一齊咗七年，結婚隨時都可以，今次決定係咁啱同屋企人搭郵輪去阿拉斯加，我同Kevin都有join，又咁啱喺溫哥華出發，好似樣樣都咁巧合下就決定結婚，屋企人都覺得好驚喜。由於今次好匆忙，所以只係請咗最close嘅朋友同屋企人，至親嘅家人都係到。」
由於Vinci是司儀出身，亦有主持婚禮的經驗，故今次無論婚宴、婚禮、after party的布置及食物等全由他負責，並托溫哥華的親友代辦，自己則遙距控制，向來力臻完美的他笑言冇時間試菜是唯一美中不足的地方。能與Kevin踏上人生新一頁，Vinci直言在婚禮中未有太大感覺，他解釋：「行禮時個個都以為我會好激動，但其實當時我個腦係諗緊一陣間婚宴要搞啲乜，enjoy唔到個婚禮，冇大家想像中咁激動。其實最緊要係賓客enjoy，有咁多人見證，氣氛好好。今次冇擺幾百圍，可以慢慢同啲親友逐一傾吓偈。」
雖然Vinci笑言未能完全享受婚禮，但箇中喜悅的心情尚未平復，尤其回首過去七年，他表示經歷不少困難，包括家人及外間的看法。他說：「由細到大我都希望有結婚呢一日，到咗已經四十幾歲先可以願望成真！以我嘅工作背景，真係比普通人艱難兼要面對好多嘢，好彩我一直好努力去工作，無論係生意、演藝工作同慈善，唔會影響到大家對我嘅信心，同時對我好包容接受，我至行到去呢一步。」
感激Kevin包容
他亦非常感激Kevin的包容：「共同生活咁多年，已經認定對方，唔會後悔，先至咁勇敢行呢一步。佢已經習慣面對傳媒，過咗最艱難嘅時間，唔會覺得有咩唔舒服，好慶幸佢接受到，因為普通人未必面對到。我希望大家支持唔同性取向嘅人嘅婚姻，希望比我年輕啲嘅可以早日達成結婚理想，無論同性或異性戀都好，結婚係每個人基本嘅權利，希望香港早日爭取到同性結婚合法化。」曾言希望在港舉行婚禮的他，指今次溫哥華的婚禮已耗盡心思：「搞一次已經好煩，好想休息吓先再諗喺香港搞唔搞。」
Vinci於2013年曾接受電台同志節目訪問，透露38歲才開齋拍拖並想結婚：「大家好快住埋一齊，雖然冇驚天動地，不過我覺得係緣分！愛一個人點解唔可以結婚？」
文：專案組
|
鍾意就快D Share啦！
|
|
|
