早幾日颱風「妮妲小姐」嘅魅力，真係沒法擋！好慷慨咁畀香港打工仔放半日假之餘，仲令到大批旅客搭唔到飛機，搞到佢哋仲勞氣過網絡紅人「火雞姐」。其實唔單止人，連個樓市都畀8號波搞到無哂方向...今個星期，樓市勁哥金榜，風後陀陀擰！
-------------------------------------------
●第3位 一號‧西九龍蝕50萬沽
今次妮妲為大地帶嚟狂風暴雨，莫非係因為林心如同霍建華結婚？事關喺《環珠格格》入面紫薇同爾康講咗句幾娘嘅對白：「山無稜，天地合，才敢與君絕。」諗多咗啦，不過有業主就好慘慘豬啦，要喺暴雨後蝕讓！一號‧西九龍有業主，為咗930萬，同持有咗3年嘅低層單位絕交。呢個單位曾經承按同貸款過唔只一次，今次仲要蝕住近50萬嚟賣，真係陰功豬囉...
-----------------------------------------
●第2位 太古城劈4球仲排第2高
雖然有成交見血，但有樓王就喺颱風之下企穩。太古城銀柏閣1個複式單位，以2800萬易手，成交價更加創歷來嘅第2高！嗱...其實呢個單位，喺年頭都叫價3200萬㗎，之不過而家減咗4球都仲破紀錄，就真係驚喜過網上瘋傳Fisherman Lok同小儀拍拖喇！（高呼：放開個女仔！）
-----------------------------------------
●第1位 欣盛苑貴絕粉嶺綠表價
呢排人人都去做小精靈訓練員，更加一度捉到去解放軍軍營，搞到班警員勁緊張！但唔止小精靈吸引大家一窩蜂去捉，樓盤都有好多人爭㗎！粉嶺欣盛苑就有中層3房單位，喺居二市場以368萬元售出，成功創咗粉嶺居二價歷來嘅新高！而實用呎價亦以5705元，榮登區內第2高，真係要寫個服字！
唉...而家連細價樓樓價都搶高埋，要上車就更加難，金翅真係GG鳥...
|
鍾意就快D Share啦！
|
|
|
