iPhone 7嘅傳聞不嬲都多到數唔晒，不過之前大部分網媒都只係有啲所謂嘅預想圖，真確性當然有限！估唔到今次竟然有埋影片，早前來自加拿大嘅YouTube頻道《Unbox Therapy》就上載咗一段名為「iPhone 7 Plus - Hands On With Prototype!」，片主拎住一部由內地廠商寄嚟嘅獨家iPhone 7 Plus樣板機，仲即場拎埋iPhone 6s Plus做外觀對比。單睇片中嘅新iPhone，造工確實唔錯，玻璃機面、邊角位以至機背金屬嘅反光位都好自然，的確疑幻似真，難怪短短上載咗兩日，已經有接近300萬觀看次數。講番呢部疑似新iPhone，體積、外觀同iPhone 6s好接近，不過就用上類近紫藍色嘅新配色，而機身以往明顯嘅天線位亦冇埋，亦首次採用雙鏡頭設計，特別在於機背下方有3個金屬接點，有機會係配合充電座、鍵盤等配件使用，而先前傳聞已久會取消3.5mm耳機插口嘅設計，亦喺疑似新iPhone上出現。如果新iPhone真係同片中所講嘅一樣，咁又唔算有太大突破喎！
短片：https://youtu.be/L2o_MUPDRRI
Google睇實體育盛事
四年一度嘅體育盛事今日就正式開鑼，唔想錯過任何重要賽事，就梗係要做足功課。Google就趁機推出一系列相關功能，包括整合Google搜尋，只要搜尋「Usain Bolt Rio 2016」、「Gymnastics Rio 2016」等有關詞彙，Google搜尋嘅網頁版或者App版就會將相關資料例如賽事概覽、分項、時間表、運動選手及金牌榜等一併顯示，非常詳盡。此外，YouTube亦與60多個國家及地區的官方廣播商合作，隨時睇番賽事精華！
Instagram新功能 明抄Snapchat？
Instagram啱啱宣布推出新功能Stories，當用家一次過上載大量相片或影片時，相片、影片就會以投影片方式顯示，幫你組合成一個故事。而且喺Stories模式下拍攝影相片、影片，都可以喺上面寫低文字或者畫畫，啱晒創意多多嘅朋友。最特別就係，以上嘅相片、影片，都會喺24小時之後自動刪除，唔會顯示喺個人檔案頁面上面。Stories功能無論iOS或Android用家都用到，試用過後發現都幾過癮，不過成個概念、玩法點解似足《Snapchat》嘅？
3香港個半鐘免費Wi-Fi 又去捉精靈？
Pokémon GO搞到全城狂熱，就連好多品牌、商場都用Pokémon GO活動、優惠。今次就輪到電訊商3香港加入，即日起至9月30日，不論邊間電訊商嘅用戶，只要連接3香港全港超過二萬個嘅「3HK Wi-Fi（Free）」熱點，即可免費享用每日三節共90分鐘嘅Wi-Fi服務。雖然90分鐘唔算好長時間，但對於日煲夜煲嘅精靈訓練員，慳番少少數據都好過冇！而且3香港遲啲仲會喺唔同嘅Wi-Fi熱點舉行「捕捉WiFi熱點」活動，喺特製嘅巨型實景Pokémon Go背景前影相，加上指定hashtag再Upload上社交平台，即時有把USB風扇送畀你，有着數喎！
香港寬頻新台 真係堅抵？
係人都想電話月費平之餘，數據夠多兼上網速度夠快。最近香港寬頻以以新台「MVNO」進軍流動通訊界，首個推出嘅月費HK$108、3GB數據、最高下載速度為21Mbps、3GB後限速至128Kbps既月費計劃，雖然上網速度唔算好快，但比較接近價位嘅中移動「移動42」（月費HK$128、1GB數據、最高下載速度為42Mbps、1GB後限速至384kbps）及sunmobile嘅「4G隨時用」（月費HK$128、1GB數據、最高下載速度為42Mbps），MVNO新月費計落都係抵啲。而且攜號轉台嘅客戶額外送多2GB數據，即係總共有5GB數據。最煞食就係指定的新登記及續約嘅住宅寬頻客戶，8月31日或之前選用香港寬頻的指定服務組合計劃，即時有6個月免月費，撇除一定要畀嘅HK$18行政費，即係平均HK$54月費，肯定平盡全城。值得一提，呢個月費計劃將會使用SmarTone網絡，接收應該唔錯卦！
|
鍾意就快D Share啦！
|
|
|
