2017年7月27日 星期四

翁靜晶幫定慧寺 埋單二百二十萬 [壹週刊 - 1429] __,翁靜晶,定慧寺,M1,

翁靜晶為咗同艷尼釋智定打官司,之前連私人手袋都要拎出嚟變賣籌錢。八卦陣翁靜晶幫定慧寺 埋單二百二十萬翁靜晶揭發大埔定慧寺住持「艷尼」釋智定種種惡行,仲 ...


翁靜晶為咗同艷尼釋智定打官司,之前連私人手袋都要拎出嚟變賣籌錢。

八卦陣

翁靜晶幫定慧寺 埋單二百二十萬

翁靜晶揭發大埔定慧寺住持「艷尼」釋智定種種惡行,仲開咗條「佛門警訊」 beat,專捉假和尚,贏得市民掌聲。佢同艷尼仲打緊官司,拉鋸不下,但近月先發現,原來政府○八年開始,已經三番四次催促定慧寺修葺斜坡,但艷尼一於闊佬懶理,將政府信件收收埋埋。

釋智定早前被爆疑花逾十萬蚊,買葆露絲多功能內衣、化妝品及首飾等,款項撥入定慧寺維修開支。

翁靜晶早幾個月先得悉事件,定慧寺總共欠政府二百二十幾萬,為咗救寺,佢決定變賣股票,加上佢同艷尼仍然有民事訴訟,律師費等雜費,前前後後使咗二百萬,養老金都要套現,佢話下一步可能要賣屋!

查實艷尼搞到定慧寺盤數好亂,上星期,幫定慧寺核數嘅會計師黎家祥,被會計師公會釘牌一年,鬼咩!艷尼開嘅手寫單,例如捐俾大陸景德鎮某寺廟,每次捐幾萬至十萬,張單 hea到爆。呢位被裁定專業失當嘅會計師,居然照批核為寺廟開支,加上艷尼用公款買 bra買護膚品,單據照攞去 claim,咁又過到骨。

艷尼面皮夠厚,就算俾人話佢假結婚,定慧寺善款被挪用,佢都賴死唔走唔肯搬出定慧寺,真係吹佢唔脹!

社工夠薑闖關 寫悔過書先放人

劉曉波逝世加上四個立法會議員被 DQ,唔少香港人都悲傷憤怒。任職社工嘅呂智恆,上星期三晚就用行動抗議,企喺羅湖橋近香港關口位置大聲讀出《零八憲章》,身邊仲放住「我沒有敵人」五個大字。咁夠薑,內地公安當然唔放過佢,立即將佢帶走。

佢之後被帶到深圳一間派出所「教育」。接近深夜時,公安話好鬼眼瞓,叫佢快快手寫完悔過書,就可以各自歸家。佢最初咁樣寫:「我錯了,因為中國沒有言論自由。」公安睇完火都嚟埋,大大聲話:「你玩嘢呀?呢啲返到香港再講,喺深圳唔好講。」最後,佢改咗好幾次,公安先至收貨。由皇崗關口回港時,已係凌晨一點幾。

呂智恆話,當時根本未過關,公安拉佢係一個好大嘅問題,「有咩問題都應該由香港警方處理,無諗過未過深圳關口,公安已經擺明執法,將香港人拉走。」佢話由此可以想像高鐵嘅一地兩檢有咩後果,「香港人唔好太天真,到時有可能隨時被公安帶走。」

呂智恆認為經歷今次事件,可以想像假如高鐵西九龍總站一地兩檢實行,會有咩後果。

社工呂智恆企喺羅湖橋近香港關口讀出《零八憲章》,佢強調當時根本未過關,但就被公安拉走。

熱血公民吸睛有法子

人稱泰博嘅熱血公民立法會議員鄭松泰,隨時成為議員 DQ潮下一波主角,皆因佢被市民入稟,要求高院裁定係咪要被褫奪議員資格,單案今日(星期三)會審理。但佢最近都不忘出席書展,推介一下同拍檔靳民知合作編著嘅新作《基本法改良芻議》。

推介新書之餘,《壹》仔發現,唔少網民更加關心嘅,似乎係泰博身邊出現一名妙齡少女同佢合照,好多網民已經封咗佢做女神。原來女神叫做「法子」,係熱血時報網台節目《深宵 fool人信箱》新進助理主持。法子七月五日喺節目第九十八集首次出現,七月六日就開咗個 facebook page,依家有大約二百人 follow。

有網民話,「熱狗(指熱血公民)唔同時期都會搵個靚女出嚟呃人」,其中一位就係指上年同四眼哥哥鄭錦滿同一張名單,參選立法會選舉港島區直選嘅鍾琬媛( Bonix)。今次法子現身書展幫手叫賣,又喺攤位幫讀者訂報紙,非常吸睛,相信會好似 Bonix咁,迅即成為宅男網民起底對象。

女神法子同泰博一張合照,引起網民關注,唔少人留言要求泰博「放開個女仔」。(鄭松泰 facebook圖片)

笑容甜美嘅法子,現身書展熱血公民攤位,都咪話唔引人注意。(法子 facebook圖片)

鄺神簽名會 女粉絲排長龍

立法會議員鄺俊宇,近日真係忙到癲,除咗要開會同處理泥圍菜園村被恐嚇逼遷事件,仲要去書展。原來,一向愛情語錄多多嘅鄺俊宇,近日出咗本新書,叫做《有一種幸福叫守護》。噢, You are very romantic!

呢位民主黨男神鄺俊宇同《壹》仔講,本新書係上次《有一種幸福叫忘記》嘅續集,除咗有最拿手嘅愛情散文,今次亦會講到動物權益同議會事宜,「今時今日嘅香港,守護真係好重要,尤其係印書嗰段時間,社會發生咗好多不公義事件,守護呢兩個字更加重要。」

有新書出當然有簽名會,《壹》仔去睇過,原來男神真係好多粉絲,條人龍排到水蛇春咁長,好多妹妹仔排隊等簽名,「其實唔只女粉絲,都有好多男仔鍾意睇我嘅書㗎。」男神話,最遺憾係一名支持咗佢好耐嘅女粉絲,因為健康問題唔能夠嚟到現場,「我一四年第一次搞簽名會,佢當時撐住枴杖嚟,之後我搞 Talk Show,佢坐住輪椅嚟支持,今次簽名會,佢因為身體健康欠佳,所以嚟唔到,但我遲吓會親自送本簽名書俾佢。」

男神粉絲非常多,睇吓簽名會條人龍有幾長就知啦。

鄺神係「愛情語錄」嘅元祖級人物,最近又出新書喇,仲會講埋動物權益。

撰文:巫不言

news@nextdigital.com.hk


鍾意就快D Share啦!
Related Posts Plugin for WordPress, Blogger...