翁靜晶為咗同艷尼釋智定打官司，之前連私人手袋都要拎出嚟變賣籌錢。
八卦陣
翁靜晶幫定慧寺 埋單二百二十萬
翁靜晶揭發大埔定慧寺住持「艷尼」釋智定種種惡行，仲開咗條「佛門警訊」 beat，專捉假和尚，贏得市民掌聲。佢同艷尼仲打緊官司，拉鋸不下，但近月先發現，原來政府○八年開始，已經三番四次催促定慧寺修葺斜坡，但艷尼一於闊佬懶理，將政府信件收收埋埋。
翁靜晶早幾個月先得悉事件，定慧寺總共欠政府二百二十幾萬，為咗救寺，佢決定變賣股票，加上佢同艷尼仍然有民事訴訟，律師費等雜費，前前後後使咗二百萬，養老金都要套現，佢話下一步可能要賣屋！
查實艷尼搞到定慧寺盤數好亂，上星期，幫定慧寺核數嘅會計師黎家祥，被會計師公會釘牌一年，鬼咩！艷尼開嘅手寫單，例如捐俾大陸景德鎮某寺廟，每次捐幾萬至十萬，張單 hea到爆。呢位被裁定專業失當嘅會計師，居然照批核為寺廟開支，加上艷尼用公款買 bra買護膚品，單據照攞去 claim，咁又過到骨。
艷尼面皮夠厚，就算俾人話佢假結婚，定慧寺善款被挪用，佢都賴死唔走唔肯搬出定慧寺，真係吹佢唔脹！
社工夠薑闖關 寫悔過書先放人
劉曉波逝世加上四個立法會議員被 DQ，唔少香港人都悲傷憤怒。任職社工嘅呂智恆，上星期三晚就用行動抗議，企喺羅湖橋近香港關口位置大聲讀出《零八憲章》，身邊仲放住「我沒有敵人」五個大字。咁夠薑，內地公安當然唔放過佢，立即將佢帶走。
佢之後被帶到深圳一間派出所「教育」。接近深夜時，公安話好鬼眼瞓，叫佢快快手寫完悔過書，就可以各自歸家。佢最初咁樣寫：「我錯了，因為中國沒有言論自由。」公安睇完火都嚟埋，大大聲話：「你玩嘢呀？呢啲返到香港再講，喺深圳唔好講。」最後，佢改咗好幾次，公安先至收貨。由皇崗關口回港時，已係凌晨一點幾。
呂智恆話，當時根本未過關，公安拉佢係一個好大嘅問題，「有咩問題都應該由香港警方處理，無諗過未過深圳關口，公安已經擺明執法，將香港人拉走。」佢話由此可以想像高鐵嘅一地兩檢有咩後果，「香港人唔好太天真，到時有可能隨時被公安帶走。」
熱血公民吸睛有法子
人稱泰博嘅熱血公民立法會議員鄭松泰，隨時成為議員 DQ潮下一波主角，皆因佢被市民入稟，要求高院裁定係咪要被褫奪議員資格，單案今日（星期三）會審理。但佢最近都不忘出席書展，推介一下同拍檔靳民知合作編著嘅新作《基本法改良芻議》。
推介新書之餘，《壹》仔發現，唔少網民更加關心嘅，似乎係泰博身邊出現一名妙齡少女同佢合照，好多網民已經封咗佢做女神。原來女神叫做「法子」，係熱血時報網台節目《深宵 fool人信箱》新進助理主持。法子七月五日喺節目第九十八集首次出現，七月六日就開咗個 facebook page，依家有大約二百人 follow。
有網民話，「熱狗（指熱血公民）唔同時期都會搵個靚女出嚟呃人」，其中一位就係指上年同四眼哥哥鄭錦滿同一張名單，參選立法會選舉港島區直選嘅鍾琬媛（ Bonix）。今次法子現身書展幫手叫賣，又喺攤位幫讀者訂報紙，非常吸睛，相信會好似 Bonix咁，迅即成為宅男網民起底對象。
鄺神簽名會 女粉絲排長龍
立法會議員鄺俊宇，近日真係忙到癲，除咗要開會同處理泥圍菜園村被恐嚇逼遷事件，仲要去書展。原來，一向愛情語錄多多嘅鄺俊宇，近日出咗本新書，叫做《有一種幸福叫守護》。噢， You are very romantic！
呢位民主黨男神鄺俊宇同《壹》仔講，本新書係上次《有一種幸福叫忘記》嘅續集，除咗有最拿手嘅愛情散文，今次亦會講到動物權益同議會事宜，「今時今日嘅香港，守護真係好重要，尤其係印書嗰段時間，社會發生咗好多不公義事件，守護呢兩個字更加重要。」
有新書出當然有簽名會，《壹》仔去睇過，原來男神真係好多粉絲，條人龍排到水蛇春咁長，好多妹妹仔排隊等簽名，「其實唔只女粉絲，都有好多男仔鍾意睇我嘅書㗎。」男神話，最遺憾係一名支持咗佢好耐嘅女粉絲，因為健康問題唔能夠嚟到現場，「我一四年第一次搞簽名會，佢當時撐住枴杖嚟，之後我搞 Talk Show，佢坐住輪椅嚟支持，今次簽名會，佢因為身體健康欠佳，所以嚟唔到，但我遲吓會親自送本簽名書俾佢。」
撰文：巫不言
news@nextdigital.com.hk
|
鍾意就快D Share啦！
|
|
|
