探熱針
新劇次次被抽 陳智燊心淡孖老婆網上晒愛谷人氣
陳智燊都算黑仔，原本佢有份擔正新劇《三個女人一個因》會緊接《超時空男臣》播出，點知臨出宣傳片前突然又被抽起，其實今次都唔係第一次，之前套《超能老豆》都連被抽起三次先有得出街。
每次都難逃被抽命運，搞到 Jason無晒心機，只好孖住老婆宋熙年在 YouTube狂 po片谷人氣，近日冇劇開得閒到不時接老婆收工。
自設頻道
陳智燊運氣認真麻麻，原本他有份主演的新劇《三個女人一個因》，最初被安排在《不懂撒嬌的女人》後播出，點知突然要播陳年舊戲《蘭花劫》，第一次被抽起，原本又被安排八月底，緊接《超時空男臣》播出，點知又再被抽，改由薛家燕、黎諾懿、姚子羚主演的《燦爛的外母》頂上。
「原本以為套劇八月播， Jason好開心諗定點宣傳，點知套劇又一次臨門被抽，搞到佢無晒心機！其實以前佢做嘅《超能老豆》（前名：《爸 B有話兒》），都試過抽起三次，要改埋名先有得播！認真運滯！」知情者說。
拉老婆走
最近無乜工開，陳智燊就得閒到經常接老婆宋熙年收工，日前本刊發現陳智燊駕車去到西貢碼頭，接剛出海拍完外景的老婆收工，兩人坐車去到西貢市中心買咖啡，不過入去 Starbucks前，宋熙年路過地產鋪，就好有興趣駐足睇樓盤，但心情麻麻的 Jason，睇咗一陣已經拉老婆走，似乎因為劇集被抽唔太開心！
由於連番出師不利，大台又冇乜新工作安排，所以陳智燊孖住老婆宋熙年，在 YouTube設立頻道《 Sarah& Jason》，不時拍片自谷人氣，既然大台唔捧，惟有靠自己 keep住人氣。
「自從多咗網絡平台，藝人都多咗自我宣傳機會，可以喺 fb直播同 po片， Jason兩公婆仲犀利，利用埋 YouTube做宣傳，最緊要啲廣告客 buy！」陳智燊身邊人說。
由明珠台主持到入埋戲劇組，陳智燊一二年更拍住鍾嘉欣演出劇集《幸福摩天輪》擔正男一出位，一度係新一代男神，可惜星運始終麻麻！
「因為講得一口流利英語，靚仔又高學歷， Jason簽 TVB之後就被派咗去明珠台做主持，但其實佢最想拍劇，所以就算只係客串，佢都好珍惜機會，喺《誰家灶頭無煙火》做男二開始受歡迎，佢真係好開心！但因為佢喺 TVB無任何派系，機會就唔及 Sandy派嘅洪永城、黃翠如！」知情者說。
二奶命
自細在英國長大，父母在英國開餐館的陳智燊，在倫敦大學畢業後，於 03年返港加入娛樂圈， 06年加入無綫電視第 20期藝員訓練班，最初被派到明珠台做節目主持，至近年才有機會參與拍劇， 11年在處境喜劇《誰家灶頭無煙火》擔任男二， 12年再拍《幸福摩天輪》終坐正做男一，可惜陳智燊自此就二奶命，未有再在劇集做第一男主角。
撰文：娛樂組
攝影：陳亦龍、李溢敏
|
鍾意就快D Share啦！
|
|
|
