掃呢頁CODE去手機

2017年10月26日 星期四

公主出巡 劉華放寬嚴管政策  5歲劉向蕙撇甩阿媽買名牌 [壹週刊 - 1442] __,劉向蕙,劉德華,劉華,M1,

Hanna早排賣甩媽咪,由保鑣陪住自己去IFCshopping。娛頭公主出巡 劉華放寬嚴管政策 5歲劉向蕙撇甩阿媽買名牌眨吓眼劉華同朱麗倩個寶貝女劉向 ...






Hanna早排賣甩媽咪,由保鑣陪住自己去 IFC shopping。

娛頭

公主出巡 劉華放寬嚴管政策  5歲劉向蕙撇甩阿媽買名牌

眨吓眼劉華同朱麗倩個寶貝女劉向蕙( Hanna),已經五歲大喇!自從阿女出世之後,劉華千方百計將佢收埋,以防廬山真面目曝光。

不過天王女都要過正常生活,劉華終於諗通,決定放寬嚴管政策。人仔細細已經識扮靚嘅 Hanna,呢日撇甩阿媽現身中環 IFC行名店 Lanvin。為咗掩人耳目,劉華今次齋派保鑣同一名生面口親戚,陪住阿女 shopping,冇阿媽喺身邊, Hanna自己揀衫、試香水,又有成隊兵跟住尾服侍,天王女認真架勢!

自己揀衫

Hanna大個女喇!以前見親佢都雙腳唔着地,次次都要人抱。冇見一排, Hanna明顯高咗一截,留咗長頭髮,眼大大、鼻高高,個樣就愈大愈似劉華,尤其係對眼,但就冇遺傳到爸爸的招牌鷹鼻,又靚女又可愛。由於公主出巡,劉華當然做足準備,當日下晝,先派兩名保鑣在四季酒店出入口巡視,確保冇可疑,再通知主子落車。

Hanna落車後,由一名生面囗的親戚拖住,著住白色 T恤襯條牛仔短褲,再加對銀色涼鞋,一身造型似足爸爸華 Dee九十年代經典《天若有情》 look,加上 Hanna比同齡小朋友生得高,睇起上嚟相當有型。

之後 Hanna一行人去 IFC,行入法國名店 Lanvin,其中一名保鑣就繼續守門口戒備,入到鋪頭 sales姐姐似乎都唔發現 Hanna是天王女,不過 Hanna就好雀躍,意見多多,起勢指手畫腳,保鑣哥哥拎起件白色童裝外套俾 Hanna過目,公主似乎好啱心水,點一點頭。之後 Hanna貪得意要試香水,仲拎住兩張香水紙聞完又聞,又將香水紙搽上手,然後又聞隻手,流露住古靈精怪表情,相當得意!逗留半粒鐘,天王女置完裝,一行人返回四季酒店上車返歸。





保鑣哥哥拎住件白色外套俾 Hanna過目, Hanna滿意點頭。





Hanna拎住張香水紙聞完又聞,之後仲搽上手。





Hanna不停指手畫腳,人仔細細對自己衣著已經好有主見。





看見名牌手袋,人仔細細的 Hanna勁興奮。





Hanna置裝的法國名牌 Lanvin,近年出埋童裝,普通裙仔都起碼$1,500。





冇媽咪喺身邊,保鑣們一樣照顧周到。





劉華以前好鍾意白 tee襯牛仔褲, Hanna都跟足爸爸呢個經典 look。

減少老婆跟身

一向唔鍾意將家事公開嘅劉華,自從 Hanna出世後,絞盡腦汁將阿女收埋。每次帶女出埠,一定同老婆分開上機,避免製造混亂,寧願犧牲親子時間,甚少親自帶阿女出街,只有每年的粉絲聚會,劉華先御准老婆同阿女出席,明益粉絲。

「佢明知 IFC呢啲地方多記者,華仔專登叫老婆唔好跟埋去,搵啲生面口嘅人陪阿女,咁就冇咁易俾人認得出。其實佢個女同老婆成日出街㗎,只不過佢哋專揀啲人少嘅地方,有時仲會去啲好平民嘅地方,等人估佢唔到之嘛!不過佢自己就好少同個女出街啦,費事惹起哄動,佢成日同啲 fans講,佢哋如果喺街見到佢個女, say個 hi得喇,千祈唔好大嗌劉德華個女呀!」劉華身邊人透露。

Hanna開始大個,又已經返學,接觸到的人愈來愈多,加上阿女已經曝過光,唔再係好神秘,所以劉華都變得冇咁緊張,放寬了之前嚴管政策,俾 Hanna可以接觸更多人,等佢可以同一般小朋友一樣成長。





去完新加坡返港,罕有唔戴口罩的朱麗倩親自拖住 Hanna出閘。





趁劉華忙住做電影宣傳,朱麗倩帶埋個女返大馬探親,順便飛新加坡玩。

帶女去 food court

在大馬出世的朱麗倩,每年定時定候一定帶埋阿女返娘家探親,年初劉華出事,原本已飛大馬的朱麗倩,急急撲去泰國照顧老公。經歷八個月康復期,劉華而家行得走得,朱麗倩放下心頭大石,早排又帶住 Hanna出發返娘家。

當日身穿花花裙的朱麗倩,有保鑣、工人姐姐傍住,湊住阿女現身機場準備出發。入閘後,朱麗倩想食家鄉菜,一行五人竟然唔係去 lounge,反而走去最多人的 food court,仲要揀正路口位。坐低後叫咗幾杯飲品同小食, Hanna似乎好好胃口,不停將嘢食擺入口,又開籠雀咁撩人傾偈,醫飽肚後朱麗倩幫阿女抹手, Hanna仲攞支 hand cream出嚟搽,人仔細細已經識得護膚,同埋又鍾意行名店買衫搽香水,相信將來大個 Hanna一定更貪靚,之後一行人趕到閘口登機。





入閘後,朱麗倩唔揀入 lounge,反而走去 food court食馬拉菜。





食完嘢, Hanna仲要媽咪幫佢抹手,之後搽埋 hand cream,認真貪靚。





上個月在粉絲聚會,劉華播出住院時片段,當中有一家三口溫馨合照,又有在病床時阿女餵飲水場面。

新加坡放電

趁劉華忙住宣傳新戲《追龍》,兩母女探完娘家,順便再飛新加坡,玩足十日先返港,出閘時朱麗倩罕有唔戴囗罩,親自拖實個女,保鑣手上就拎住六盒當地名產「斑蘭蛋糕」。閘口外又有三名保鑣一早 stand by,成隊兵齊齊操去停車場上車。

玉女路線

12年,朱麗倩以 46歲高齡為劉德華誕下愛女劉向蕙,為了女兒有健康的成長生活,多年來一家三口也很低調,盡量避免向蕙曝光。不過本刊自向蕙 3歲開始看着她成長,由當初的長腿 B女,到今年 5歲遺傳了媽媽的氣質,絕對可走玉女路線。





15年 3歲

長腿 B女行得快





16年 4歲

眼仔碌碌愛撒嬌





17年 5歲

散發氣質

潮 B魅力高

Fashion嘅嘢大家可能都係識條鐵,但其實世界各地好多明星二代都係潮 B,在父母的打造下,魅力非凡。

哈七

碧咸與潮爆老婆 Victoria的愛女小哈七( Harper Beckham Seven)一直都係兒童界的潮流指標,有潮媽 Victoria做形象指導,哈七的衫、褲、鞋襪主打是英國兒童名牌 Rachel Riley、 Marie Chantal及英國老品牌 Burberry。

劉秀樺

劉鑾雄愛送 Hermès給家人,單是劉太甘比已收藏超過 700個 Hermès mini bag、 Kelly clutch等手袋,囡囡秀樺不遑多讓, 1歲半時已拎住價值 4至 5萬的 Hermès Kelly Doll,認真巴閉。

小蕊蕊

吳佩慈與百億富豪紀曉波於 14年誕下女兒小蕊蕊( Hillary),最喜歡來港掃貨的她, 15年被發現未夠兩歲的 Hillary,已孭住幾萬蚊的 Hermès小斜袋。

Suri Cruise

Tom Cruise與 Katie Holmes的女兒 Suri Cruise, 3歲時已被美國高級童裝廠商舉辦的「名人時尚兒童票選」選為冠軍,想當年,細細個已愛穿名牌高跟鞋,單是服飾行頭已超過一千五百萬港幣。

撰文:娛樂組

攝影、攝錄:李溢敏、森美、陳亦龍、楊紫


鍾意就快D Share啦!