武俠小說泰斗金庸（原名查良鏞）上月30日逝世，享年94歲，昨日在香港殯儀館設靈，遺體今日移往大嶼山寶蓮寺火化。現年67歲的形象設計師劉培基與金庸相交多年，更一直以「查哥哥」稱呼對方。劉培基在40歲生日時，更獲金庸親筆題詩慶賀，寫上「妙手縫成夢裏詩」，回報劉培基為太太設計婚紗。
一代武俠小說作家金庸上月30日離世，其家屬昨在北角香港殯儀館為金庸設靈，多位演藝界名人包括白雪仙、劉培基、黃曉明及杜琪峯等亦前往殯儀館向金庸作最後致意。與金庸相識多年的劉培基日前接受《蘋果》電話訪問，他表示一直尊稱金庸為「查哥哥」：「一個好偉大長輩，我極尊敬佢，有江湖嘅地方都景仰佢，因為佢嘅作品有情有義，佢唔係一個簡單嘅武俠小說作家，裏面有好多文學同教育，佢係充滿智慧嘅長者，獨一無二，後無來者！」
因黃霑結緣
談到跟金庸的相交經過，劉培基憶述：「應該同黃霑一齊時識，嗰時黃霑向林燕妮求婚，都喺查哥哥屋企，當時我哋差唔多個個禮拜都喺查哥哥度食飯。」他又提到自己會向金庸請教搞生意，在40歲生日時，更獲金庸饋贈墨寶：「佢對我好好，有好多嘢唔係太識，好似做生意搞合同，我都會問佢，佢會好詳細幫我分析。有年我生日，佢寫咗幅字畀我，當日我好開心。」
收到這份珍貴墨寶的畫面，劉培基仍歷歷在目：「我喺佢屋企食飯，好多人坐喺度，佢話呢張枱裏面，佢寫得最多字畀嗰個，就係我。嗰時查太（林樂怡）同我講『好多人會好恨有你呢篇嘢。』我真係好多謝查哥哥，我搬咁多次屋，但呢篇嘢由佢交喺我手後，到今時今日都係跟住我。」劉培基更表示雖然他未曾為金庸設計西裝，但就曾為金庸太太林樂怡設計婚妙：「佢太太嘅婚紗係我做嘅，查哥哥搵我設計，因為查太係好低調嘅人，所以我從來冇講過畀人知。婚紗米白色好簡單、優雅、端莊，好高貴好襯佢，細細嘅頭紗。佢哋冇擺酒，只係影婚紗相。」
金庸離世後，劉培基在微博貼出他00年網站發佈會的合照悼念，相中還有張國榮、梅艷芳、沈殿霞、黃霑、林燕妮、白雪仙及汪明荃等，他說：「查哥哥對後輩好好，尤其對我好好，我所有舖頭開張佢一定嚟，佢唔去呢啲地方㗎，嗰次係我嘅發佈會，佢個女陪佢一齊嚟。」
屋企多遺照
可惜劉培基與金庸最後一次見面，已是10年前的事：「我呢一生冇乜遺憾，喺我身邊實在太多叻嘅人好嘅人，珍惜曾經有過呢啲緣份，嗰張相走咗6個！所以有朋友話想嚟屋企探我，我話出去飲杯咖啡就算，因為我屋企最多係遺照。」
另外，曾演繹《神鵰俠侶》楊過一角的劉德華，日前接受電台訪問，他表示在中學時已看過金庸著作，較喜歡《射鵰英雄傳》，直到第一次在電視螢幕看到《神鵰俠侶》，就被楊過與小龍女一段刻骨銘心的愛情所吸引：「從來冇諗過自己可以飾演楊過，拍攝過程我都擔心自己有冇能力去應付，好彩有機會遇到金庸老師，佢畀咗好多意見我去演繹楊過嘅反叛同用情專一嘅一面。」
採訪：余燕儀
|
鍾意就快D Share啦！
|
|
|
