《大帥哥》入面嘅冬來，係四兄弟中最少說話嗰個，但相信已經係飾演者李嘉為TVB拍劇十幾年以嚟，最多對白嘅一個角色。畢竟做臨記多年、受白眼都當修行嘅佢，曾經只有一個卑微要求：唔係演一集就死嘅角色。
1999年17歲嘅李嘉，考入無綫動作特技演員訓練班做龍虎武師，後因傷患轉讀藝員訓練班，開始咗某某手下、大漢、侍衛嘅二打六生涯。懷才不遇、鬱鬱不得志？李嘉當係習武嘅一種修行。無得表現身手？咪注重武術細節囉，好似有套劇係明朝但用咗清朝兵器，同監製反映下囉，都係一種武術推廣嚟。當然啦，一個茄哩啡講嘅嘢點會有人重視！李嘉經歷嘅，通常都係被呼喝：「你哋甲乙丙幾個死老臨，同阿姐企好啲！」佢話試過有衝動想郁手。
直到2010年，李嘉終於有第一個叫得出名嘅角色──《巾幗梟雄之義海豪情》嘅黑木隆盛。另外2016年《城寨英雄》中馮夏滿一角，雖然只有短短4集，但吞生蛋猥褻林穎彤嘅下流樣，真係好深印象。角色唔討好，亦唔介意做御用奸角，李嘉話過總好過一集就死咗。
今次《大帥哥》冬來，角色對白的確唔多，但口齒唔伶俐反而有啲可愛，同佢粗獷外型產生強烈對比，更討觀眾歡心。唔只，更有少爺仔同顧落蘆呢條線，再加被藝伎摸身摸勢兼面對女體盛嘅劇情，李嘉何止唔會一集就死，簡直苦盡甘來。
來源 source: http://nextplus.nextmedia.com
|
鍾意就快D Share啦！
|
|
|
