真面目
估佢唔到 神秘富豪帶挈 麥包炒金炒鋪身家過億
入行超過 25年的「麥包」麥長青，近年終於上到二線， 10年仲憑於《巾幗裊雄之義海豪情》梁飛凡一角攞埋「最佳男配角」，一夜之間名利雙收。
麥包雖然上咗位，但作風低調，經常被影到牛記笠記，名下又只有一個市值 8百多萬的鰂魚湧舊樓單位。但本報得悉，麥包原來禾稈冚珍珠，秘密做咗鋪王。據知麥包獲一富豪暗中出手幫助，近年炒金又炒鋪，身家已過億，最難得係麥包依然為人低調冇曬命，圈中隱形富豪竟然係佢！
99年與拍拖多年女友林孜結婚，現有一仔一女的麥包麥長青，自 06年參演《西遊記》飾演沙僧後開始備受重視，可惜星途一般，直至 10年，終於憑《巾幗梟雄之義海豪情》內的梁飛凡得到人生第一個獎項，「最佳男配角」。
口密受富豪賞識
於電視圈企穩，據知麥包更開始投資商鋪吸金。早在 06年，麥包已離奇地被「神奇小子」黄海明（商鋪炒家）睇中，邀他幫手在旺角東京銀座做「商場醫生」，當時麥包出心出力，招攬多位藝人於該商場開鋪製造明星效應。雖然商場最終執笠收場，但卻令麥包成功埋到黄海明及「鋪王」鄧成波身，即使銀座執笠，但二人不時畀料麥包，買鋪又預麥包一份，麥包身家日漸豐厚。
06年麥包為電視劇《寫意人生》開工，便同一時間跟「波叔」鄧成波學做商場項目總監。知情人透露：「麥包對長輩有禮貌，加上佢份人好老實，從來應承咗咩都會做到，老闆都好睇佢，直頭當佢細佬咁，所以有好嘢都會預佢一份，最好就係麥包唔口疏、又唔會擺款，你睇佢發咗達咁多年冇人知就知啦！」據知麥包現時已有多個商鋪在手，如旺角砵蘭街的新文華商場（ MPM）、以及澳門兩個鋪位。知情者更透露麥包跟有「上海仔」之稱的江湖中人郭永鴻友好，近年也有孖住投資，但為免富貴身家曝光，該商場業主名單並沒有麥包名。
炒金賺過億
麥包熱衷投資商鋪，水頭充足的他近年亦開始投資黄金，於本地一著名金業投資公開開設戶口，「大約 4、 5年前，有位香港商人搵咗個相熟經紀幫麥包買金，佢一開頭都拎咗幾千萬出嚟，主要都係炒黄金，小部分至用嚟投資基金。佢眼光幾準，前幾年金價係咁升，佢嗰份成本碌吓碌吓已經過億。」一名金業經紀說，即使近月金價大跌，他仍損手不大。
雖然身家有番咁上下，不過麥包並無因此而退出幕前，反而有劇就接、有騷就出，實行搵得幾多得幾多。本刊曾致電麥包，但至截稿前仍未聯絡得上。
吹雞好友撐
06年時麥包任旺角東京銀座「商場醫生」開幕時，姚樂怡同埋未整容嘅吳文忻都有畀面現身撐場。
據知位於旺角砵蘭街的新文華商場，鋪王鄧成波、綽號「上海仔」的郭永鴻和麥包都有份投資，但本刊查冊，只顯示是由資深投資者黎永滔及大鴻輝集團主席梁紹鴻共同持有。
蕭正楠：佢有生意頭腦！
蕭正楠、姚樂怡和李思蓓都曾經於 06年受麥包吹雞，租過旺角東京銀座商鋪經營小生意，雖然商場最終靜過鬼，但各人都冇跟麥包反面，更大讚麥包有生意頭腦。
低調住深井
麥包和老婆林孜於 08年以 4百多萬購入鰂魚湧惠安苑一單位，亦同時以約 3萬元月租租住深井碧堤半島一高層望海單位至今。身家過億，住屋就好低調囉！
|
鍾意就快D Share啦！
|
|
|