4/5曬黑曬
去完葡萄牙曬得一身古銅膚色嘅陳山聰，返港面對傳媒不但冇黑面，反而仲笑笑口，不過答案就來來去去得兩句。
我日日都咁開心！
真面目
食飽上路 禁區獨家專訪 倫敦同屋冇偈傾 超雲山聰最後晚餐
賭王三房大千金何超雲自從 4月初上載一張書夾拗出變形心，並寫上「 Love=Money」，自爆跟陳山聰分手後，一直留在英國倫敦療情傷。而為箍煲，山聰不惜盡地一煲，飛撲到當地死超雲。可惜上週六（ 4日）陳山聰獨自返港，而超雲亦校啱時間，於「好朋友」陳山聰登機後兩小時在 facebook宣布單身。
本英國時間 5月 2日晚上，即陳山聰登機返港前一晚，於超雲位於倫敦市中心的豪宅，發現二人在屋內表現疏離，二人在廚房內共晉 40分鐘「最後晚餐」後，超雲先返客廳睇電視，而山聰則留守廚房洗碗。三星期箍煲之旅，失敗而回。
上月初超雲突然在微博說到「 Love=Money」，即令人聯想到山聰和超雲出現感情問題，更有報道指山聰曾爆粗鬧超雲而導致分手。
小聰子洗大餅
「失戀」、「失財」、「失業」、「失形象」，「四失」山聰於上月 12日飛往英國死𦧲超雲補鑊。山聰除咗做牛做馬，二人更重遊舊地葡萄牙重拾甜蜜回憶。
遊完葡萄牙，二人返回超雲位於倫敦市中心家中。本刊記者於當地時間 5月 1日開始守候都未見二人外出，其間只見一名女友人上門探訪。
2日晚上約 9時，超雲家亮起燈，才見山聰於窗前行過，一時攞水飲，一時攞生果，半小時後，山聰再次走入廚房，而這次超雲緊隨其後，身穿吊帶背心的超雲先在窗邊食提子，再坐底與山聰共晉晚餐。跟熱戀期間不同的是，二人表現生疏，除了沒有攬頭攬頸，記者更看不見二人有偈傾。
約 40分鐘後，超雲先離開廚房返回大廳，而山聰繼續留守廚房，估計負責洗碗，約 10分鐘後至關燈離開廚房。
里數換經濟位
翌日（ 3日）晚上，山聰在超雲的黑人司機陪同下現身倫敦希思路機場，二人前往國泰櫃位辦理登機手續，據知山聰今次要自費機票，所以他用以往同超雲遊埠得到的里數，換取「特選經濟客位」機票，座位比普通經濟位略闊，唔使屈住咁辛苦。
冇超雲在身邊，山聰仍顯得容光煥發。入閘後由於不能享用貴賓候機室，山聰惟有走入名店掃貴價銀包，直到最後召集才急急腳登機。航班機程約 11小時，坐窗口位的陳山聰雙眼不時四圍𥄫以防有人偷影，不過飛機關燈後，服侍超雲 3星期的山聰始終身心疲累，乖乖瞓覺。
飛機於週六（ 4日）下午到港，山聰一馬當先落機，入境後更以極速走入洗手間整理頭髮。山聰面對於洗手間門外守候的本刊記者並不意外，更於禁區範圍大方受訪。
F：《 FACE》 陳：陳山聰
F：用咩方法氹番掂超雲？
陳：感情嘅事唔回應，多謝大家。
F：但係今日有報道話你哋又散咗喎？
陳：每日都有唔同故仔同報道啦，唔回應喇……真係冇嘢講！
F：咁幾時返 TVB拍劇呀？
陳：未有呢個……不過喺呢度要多謝樂小姐（樂易玲）同添哥（李添勝）。
F：添哥寸你喎！（李添勝曾說他最適合沙塵、騎呢角色）
陳：我唔覺得……唔知喎！不過我覺得添哥不嬲都好支持我嘅。如果有用得着我嘅地方，隨時打畀我，我都會考慮吓。
F：仲要考慮？
陳：係呀！
F：做咩丟低超雲自己返嚟先？
陳：我有嘢要做。
F：做咩？拍劇？
陳：我拍劇你哋實知啦，不過唔係，係唔關娛樂圈事嘅……不過都唔係你哋之前話同超雲夾份搞男裝嗰啲。總之𠵱家未講得住。
搣甩肥山聰
陳山聰對記者提問有問有答，有講有笑，心情勁靚。記者指他心情開心，山聰話：「我不嬲都好開心㗎！」記者指早前他曾為情而唔開心，山聰即話：「我邊有唔開心？我日日都咁開心！」之後記者讚他 fit咗，山聰即以得戚樣望一望記者。
陳山聰心情完全唔似剛失戀，不過將於本週三（ 8日）返港的超雲卻將分手宣言夾啱時間放上網。二人堅分手定轉地下情？相信喺最後晚餐時傾掂數囉！
箍足一個月
由陳山聰追何超雲，到拍拖、鬧分手，二人似在上演一齣華麗的大龍鳳。上月初超雲先在微博發功鬧分手，及後陳山聰即飛撲往英國箍煲。成功與否都好，享用曬靚景、靚衫，所有都係上等享受時，唔怪得返到香港山聰都係笑到見牙唔見眼啦。
三房求戀期
超雲戀事多，而佢細妹超蓮同細佬猷啟都唔弱。近日就爆出嬌滴滴嘅超蓮因呷醋而在網上爆粗，而細佬猷啟仲被傳出 gay聞。
|
鍾意就快D Share啦！
|
|
|