雖然常有網友笑 DaDa「人字咪」，不過 DaDa一於冇有怕，今次拍廣告都豁出去，着好耐冇着過嘅三點式泳衣，電視及平面廣告將於本月 14日出街。
封面
攞完獎撇物流才俊 DaDa：男人信唔過！
以「百果園 E神」出道嘅 DaDa（陳靜），一直靠事業線上位，出寫真、拍大膽戲。但自去年《低俗戲劇》內「爆炸糖」一角彈起，更攞埋金像獎最佳女配角， DaDa終於由𡃁模搖身變實力演員。
事業有突破，但愛情就未有着落。雖然一月份同從事物流生意嘅圈外男友蜜運，但拍拖唔夠半年， DaDa竟話因工作太忙而分手。唔使瘟仔， DaDa專心闖影壇，最近仲凱旋回歸道地百果園，為其新產品西瓜汁擔正拍廣告， 6位數酬勞事小，最重要是強大廣告宣傳。男人信唔過，當然睇名利好過！
入行 5年的 24歲 DaDa， 5年前被睇中同陳柏宇拍百果園飲品廣告，當年清純外表已引起網民關注。兩年後簽約施念慈的 Jasco經理人公司後， DaDa即開始走性感路線，以 34E身材作賣點，有頭威冇後着，直至上年被彭浩翔𥄫中請佢拍《低俗喜劇》，才有機提名金馬獎最佳女配角，再攞埋金像獎最佳女配角， DaDa終於爭番啖氣。
4新片輪住上
演技被肯定， DaDa終於可以洗走「𡃁模」惡名，被導演關注。
今年除了已落實接拍 2套由彭浩翔執導的電影，更被陳果睇中，連續邀演兩套戲。雖然不算年度大片，但已贏盡同期行性感如 Carol等𡃁模。就連百果園亦睇中 DaDa人氣，事隔 5年再請佢代言即將推出的西瓜汁。
廣告上月於東湧取景，好耐冇着過三點式嘅 DaDa，當日最緊張唔係事業線而係腰線，於拍廣告前二星期日日做過百下 sit up。拍攝 9小時，穩袋 6位數字酬勞。 DaDa話今年主攻電影，「多謝導演畀機會我，我今年應該會有 4套戲上畫，寫真就暫時唔會再出。」
嚇走大客？
3年前簽約施念慈的經理人公司 Jasco後， DaDa經常賣性感，出過兩本寫真，就算行騷都以內衣騷為主。不過 DaDa唔認以前嚇走時裝品牌大客。「其實有唔露肉嘅 job，不過大家冇留意，亦都有唔少時裝品牌搵我，不過價錢唔啱，所以我冇接啫！」攞獎後當然唔同往日。
彭導禦用
DaDa自從 11年推出第二本寫真後，事業便陷入低潮期，冇靚廣告，靠返內地登台吸人仔。好彩上年被彭浩翔睇中，邀拍《低俗喜劇》後成為彭浩翔禦用班底，除咗客串即將上畫的《飛虎出征》，接住有《香港仔》，加埋陳果導演嘅《那夜淩晨，我坐上了旺角開往大埔的紅 van》及《迷離夜：驚蟄》， DaDa今年起碼有 4片在手，拍得住娜姐。
「信自己多過男人」
事業得意，但愛情就白果。 DaDa入行初期，只與奀星王宗堯及 Square成員 Gary趙俊承拍過拖，到今年 1月 DaDa再有新歡，她自爆跟一位喺上海工作嘅才俊蜜運，據知該才俊經營物流生意，二人經朋友介紹認識後極速撻着，可惜拍拖唔夠半年便極速玩完。
DaDa話：「其實佢好細心，對我好好。我諗大家嘅工作性質唔同。有時我做嘢十幾個鐘冇聽電話，佢就會好緊張。我覺得唔習慣所以都係選擇做朋友就算囉！同埋𠵱家我冇時間拍拖，我覺得信自己多過信男人。所以暫時都唔會拍拖住。」
DaDa仲自稱唔吼富二代，「我都識唔少富二代朋友，我覺得佢哋不可一世，唔顧人感受，所以好多都發展唔到，我都係鍾意白手興家嘅男仔多啲。」接 job接到手軟，當然可以聲大唔使靠男人！
告別奀星
宅男女神 DaDa自然多人追，除咗先前傳聞嘅物流才俊外， DaDa仲同圈內男星拍過拖，亦傳過有富商朋友。 DaDa說：「我最唔鍾意就係富二代，我接觸過嘅通常都冇乜水準，講嘢又囂張，我鍾意啲靠自己嘅男仔。」隨着人氣升呢，男友亦寧缺莫濫告別奀星。
|
鍾意就快D Share啦！
|
|
|