阿梅臨終前交由信託基金分配生活費給梅媽，原意是保障母親晚年仍豐衣足食，不會斷糧，但今日的梅媽卻非如此。
探熱針
阿梅故居分得十一萬 梅媽哭訴：醫藥費都要賒！
梅艷芳逝世十周年，過去一直就女兒遺產長年打官司的梅媽，最後搞到債務纏身，被法院頒令破產外，去年更一度遭遺產信託基金斷糧，山窮水盡。一心諗住賣出阿梅壽山村道故居，可以有百萬落袋解困，但因賣樓收益要先用以抵債，梅媽的百萬美夢最後扣剩十一萬。
近年開始靠 fans接濟的梅媽，醫藥費、香燭金、買餸錢統統靠賒借度日。望住眼前的十一萬支票，梅媽激動哭訴：「點解仲要剋扣我！」
爭取到底
上月底，阿梅的壽山村道故居成功以一億五千萬售出，法庭要求滙豐信託在千萬訂金中，於本月三日先向梅媽發放拖欠年多的一百二十萬生活費，其中部分用作繳付梅媽居所的欠租。
去年被滙豐信託以「乾塘」為由，斷糧十四個月的梅媽，以為今次「袋袋平安」，不用再靠阿梅 fans接濟度日；豈料空歡喜一場，呢頭滙豐放水，破產信託人即入稟要求把有關款項直接用作還債。
七除八扣，上週四（九月五日）梅媽收到滙豐信託發放的支票，總數得番十一萬，自覺被「欺壓」的梅媽激動說：「做乜要咁搞我，呢啲錢係我個女支持我生活，俾我食飯，點解仲要剋扣。之前十四個月唔俾我食，好在好多人可憐我，我先撐到而家。原本諗住攞番百萬我唔會再打新官司，但咁樣剋扣我生活，我就唔會罷休。」據了解，就梅媽生活費的案件，已排期下月展開審理。
向診所賒藥
梅媽解釋，除了因為欠租搞到一身債，早前因滙豐拒為她清還聖保祿醫院的五萬多元醫藥費，令她無法返醫院覆診，唯有靠向醫生賒三萬多元藥費撐住身體，就連省善真堂的燒衣香燭錢，一樣要賒。「呢年幾我多得個工人姐姐同我渡過難關，每日幫我搵最平、五蚊份嘅餸當一餐。我向來喺聖保祿醫院睇心臟，但上年佢哋（滙豐信託）話唔再幫我俾醫藥費，好在幫我睇開嘅西醫見我可憐，就叫我去佢診所睇，又賒藥俾我，中藥都係。街市肉檔都肯賒俾我，啲 fans又接濟我，我唔可以賒咗唔還。」梅媽喊住說。
衣冠塚欠租
靠賒借度日的梅媽，最難受是一直未能為阿梅立碑造衣冠塚。「阿梅死咗咁耐，一個墓碑都冇我好難過。所以佢一走，我幫佢同佢家姐買咗兩副棺材，放曬佢哋生前衣服物品做衣冠塚，諗住一有錢就喺內地買塊地為兩姊妹安葬立墓。但十年嚟都冇錢買，諗住賣到屋可以買地，點知又俾佢哋 hold住。搞到兩副衣冠塚一直安置喺人哋庵堂，上年我連一萬蚊安置費都俾唔到。」梅媽邊說邊拭淚。
昔日每月有十二萬生活費豪慣的梅媽，因要照顧不務正業的長子梅啟明一家，搞到彈藥鋪鋪清。
今年五月，高院法官就梅媽被拖欠生活費，質疑信託基金，為何律師費及管理費唔可以拖，但阿婆飯錢就可拖欠，有感違反阿梅生前要照顧母親的意願，故要求發放兩萬元生活費給她應急。雙方官司糾纏至今，九十歲的梅媽仍堅持到底。
心臟科醫生王國耀：我係賒藥俾佢！
為梅媽診病多年的心臟科醫生王國耀承認，去年開始讓梅媽到他中環的診所賒藥。
王國耀說：「之前我喺聖保祿醫院幫梅媽做通波仔手術，之後佢一直喺嗰度搵我覆診。後來因為醫院條數無找，但佢唔可以停藥，所以我叫佢去我私家診所繼續攞藥。佢需要咩我都會幫，藥費慢慢先找，唔會追，最緊要佢老人家身體冇事。」
據了解，梅媽賒藥年多，每三個月覆診一次，診金一千元，每次提取的三個月心臟藥費要七千九百多元，加加埋埋，梅媽約欠三萬六千元醫藥費。
省善真堂賒數四千
阿梅過身後，骨灰安放在大嶼山寶蓮寺，但梅媽及一班 fans則於九龍塘省善真堂設靈位供奉。梅媽聲言山窮水盡，去年盂蘭節為阿梅燒衣及設齋宴的四千多元費用，至今仍拖欠。本刊向省善真堂求證，職員（下圖）拿出梅媽的欠單證明屬實，雖然舊債未清，但剛過去的盂蘭節，省善真堂仍繼續賒數為阿梅燒衣。
|
鍾意就快D Share啦！
|
|
|